قىرعىزستان پرەزيدەنتى المازبەك اتامبايەۆ 22 قاراشا كۇنى ماراپاتتاۋ ءراسىمى بارىسىندا قىرعىزستاننان امەريكالىق «ماناس» ترانزيتتىك ورتالىعىن الىپ كەتەتىنىنە ەشكىم سەنبەگەنىن مالىمدەدى. ونىڭ ايتۋىنشا، مۇنداي شەشىمگە كەلۋىنىڭ سەبەبى – «كورشىلەس ەكى ۇلكەن دەرجاۆانى قاتتى رەنجىتىپ العان».

«جاسىراتىنى جوق – رەسەي مەن جۇڭگو. بىزدە اتادان قالعان ءسوز بار «الىستاعى تۋىستان جاقىن كورشىڭ ارتىق» دەگەن. ءبىرىنشى كەزەكتە، جۇڭگو جانە رەسەي سىندى ۇلى دەرجاۆالارمەن دوس بولۋعا ءتيىسپىز. كەيدە ءبارى كەرىسىنشە بولادى. مەن قارىم-قاتىناستى بۇزۋعا ءماجبۇر بولدىم»، - دەدى اتامبايەۆ.

2001 جىلى بىشكەكتەگى «ماناس» اۋەجايى ماڭىندا اقش-تىڭ اسكەري بازاسى اشىلعان. 2003 جىلى بازا ترانزيتتىك ورتالىققا اينالدى. ەكى جاقتى كەلىسىمنىڭ مەرزىمى 2014 جىلى اياقتالعان، ال قىرعىزستان كەلىسىمدى ۇزارتۋدان باس تارتتى.