2017 جىلعى 22 قاراشادا اقوردادا قازاقستان رەسپۋبليكاسىنىڭ مەملەكەتتىك حاتشىسى گ.ن.ءابدىقالىقوۆانىڭ توراعالىعىمەن ق ر پرەزيدەنتى جانىنداعى ازاماتتىق ماسەلەلەرى جونىندەگى كوميسسيانىڭ كەزەكتى وتىرىسى ءوتتى،- دەپ جازادى Qamshy.kz اقپارات اگەنتتىگى. 

وتىرىستا قازاقستان ازاماتتىعىنا قابىلداۋ جانە ودان شىعۋ ماسەلەلەرى قاراستىرىلدى.

مەملەكەت باسشىسى ءتيىستى جارلىققا قول قويعاننان كەيىن بىزگە جاقىن جانە الىس شەتەلدەردەن كەلگەن ءار ءتۇرلى ەتنوستاردىڭ 734 وكىلى جاڭا قازاقستاندىقتارعا اينالادى.

مەمحاتشى تاۋەلسىزدىك العان ساتتەن بەرى 1 ملن-نان استام ادام ەلىمىزدىڭ ازاماتتىعىن العانىنا توقتالىپ ءوتتى، بۇل ەلباسى ن.ءا.نازاربايەۆتىڭ باسشىلىعىمەن باتىل وسىپ-وركەندەپ كەلە جاتقان مەملەكەت رەتىندەگى قازاقستاننىڭ الەمدەگى تارتىمدىلىعىن ايعاقتايدى.

گۇلشارا ءابدىقالىقوۆا تۇڭعىش پرەزيدەنت كۇنى قارساڭىندا ەلىمىزدىڭ جاڭا ازاماتتارىن قۋانا قارسى الاتىنىمىزدى ايتىپ، ولارعا باقىتتى ءومىر جانە ەندى ءوز وتانى بولىپ سانالاتىن ەلىمىزدىڭ يگىلىگى جولىنداعى ەڭبەكتەرىنە تابىس تىلەدى.

مەملەكەتتىك حاتشى جاڭا وتانداستاردىڭ ەلىمىزدىڭ لايىقتى ازاماتى بولا وتىرىپ، ەگەمەن قازاقستاننىڭ بۇدان ءارى دامۋى مەن باقۋاتتىلىعىنا ءوز ۇلەسىن قوساتىنىنا سەنىم ءبىلدىردى.

سونداي-اق سىرتقى ىستەر مينيسترلىگىنىڭ جەكەلەگەن باعىتتارىنداعى قىزمەتىنىڭ قورىتىندىلارى تالقىلاندى.

كوميسسيا وتىرىسىنىڭ قورىتىندىسى بويىنشا ءتيىستى شەشىمدەر مەن ۇسىنىمدار قابىلداندى.