پارلامەنت ءماجىلىسىنىڭ دەپۋتاتتارى سارسەنبىدە قازاقستاننىڭ كەيبىر زاڭنامالىق اكتىلەرىنە اقپارات جانە كوممۋنيكاسيالار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن تالقىلاپ، ەكىنشى وقىلىمدا ماقۇلدادى،- دەپ Qamshy.kz اقپارات اگەنتتىگى ازاتتىققا سىلتەپ جازادى.
كەيبىر ساراپشىلار بۇل قۇجات ءسوز بوستاندىعىن شەكتەپ، جۋرناليست قىزمەتىنە كەدەرگى كەلتىرەدى دەپ ەسەپتەيدى.
قۇجاتتى تانىستىرعان اقپارات جانە كوممۋنيكاسيا ءمينيسترى داۋرەن ابايەۆ جوبادا مەملەكەتتىك ورگانداردىڭ جۋرناليستەر ساۋالىنا جاۋاپ بەرۋ مەرزىمى بۇعان دەيىن ۇسىنىلعان 15 كۇننەن 7 كۇنگە ازايتىلعانىن ايتتى. العاشقى وقىلىمدا دەپۋتاتتار 15 كۇننەن كەيىن الىنعان اقپاراتتىڭ ماڭىزدىلىعى جويىلىپ، ەسكىرىپ كەتەتىنىن ايتىپ، قارسىلىق بىلدىرگەن بولاتىن. ابايەۆ دەپۋتاتتاردىڭ بۇل ۇسىنىسىن جۇمىسشى توبىندا تالقىلاۋعا دايىن ەكەنىن ايتقان ەدى.
ابايەۆتىڭ سوزىنشە، جوبادا مەملەكەتتىك ورگانداردىڭ "قوعام ومىرىنە اسا ماڭىزدى وقيعا نەمەسە توتەنشە جاعدايلار" كەزىندە ءۇش ساعات ىشىندە رەسمي اقپارات تاراتۋىن مىندەتتەيتىن تالاپ قويىلعان.
مينيستر بۇل جولعى جوبادا تەلەارنالاردا ءدىني تاقىرىپتاعى جانە بالالارعا ارنالعان باعدارلامالار اراسىندا جارناما بەرۋگە تىيىم سالۋ جايى دا قاراستىرىلعانىن ايتتى. بۇعان قوسا، جۋرناليستەرگە ازاماتتاردىڭ جەكە باسىنا قاتىستى، اتاپ ايتقاندا قارجىلىق جاعدايى، ەسەپشوتى، بالا اسىراپ الۋى سياقتى اقپاراتتاردى ولاردىڭ رۇقساتىمەن جاريالاۋىن مىندەتتەۋ قاراستىرىلعان.
مينيستر ابايەۆ ب ا ق تۋرالى زاڭ جوباسىن پارلامەنتتە العاش تانىستىرعان كەزدە جەكە ازاماتتار نەمەسە زاڭدى تۇلعالار مەن ب ا ق اراسىنداعى داۋدى تاراپتار سوتقا جەتكىزبەي رەتتەۋىنە دە، مەدياتور ارقىلى شەشۋىنە دە بولاتىنىن جانە ب ا ق سالاسىنداعى كەز-كەلگەن قوعامدىق ۇيىمنىڭ مەدياتور قىزمەتىن اتقارا الاتىنىن ايتقان بولاتىن.
