ءبىر قاراعاندا مەملەكەتتىڭ ارى قارايعى دامۋى ءۇشىن اسا قاجەتتى ەمەس جانە قالتاڭىزعا دا وڭاي تۇسپەيتىن سالا بار. الايدا ونسىز ۇلتتىڭ ءقادىرى مەن بەدەلىنىڭ كوتەرىلۋىن ەلەستەتۋ مۇمكىن ەمەس. ءتىپتى، كەرەك دەسەڭىز ۇلتتىڭ ساۋلىعى دا وسى ورتاعا بايلانىستى، دەپ جازادى Qamshy.kz اقپارات اگەنتتىگى. اڭگىمە اۋانى نە تۋرالى ەكەنىن بايقاعان بولارسىز؟ ارينە، سپورت جايلى!

ولگا رىپاكوۆا 1984 جىلى وسكەمەن قالاسىندا دۇنيەگە كەلگەن. كىشكەنتاي  كەزىنەن ولگا سپورتپەن شۇعىلداناتىن بالالارعا ارنالعان مەكتەپكە بارىپ، جەڭىل اتلەتيكامەن تۇراقتى تۇردە  اينالىسادى باستايدى. ول سپورتتاعى ءبىرىنشى جەڭىسىن 2007 جىلى ۇلتتىق جەڭىلاتلەتتەر قۇراما كومانداسىنىڭ ساپىندا جۇرگەندە الادى.  دەگەنمەن، ءاربىر سپورتشى وليمپيادا شىڭىنان كورىنۋگە ۇمتىلاتىنى ايدان انىق.

ولگا رىپاكوۆا 2012 جىلعى لوندونداعى XXX جازعى وليمپيادا ويىندارىندا جەڭىستىڭ بيىك تۇعىرىنان كورىنىپ، ءدۇيىم جۇرتتى قۋانتتى. ول وليمپيادا دا ءۇش قارعىپ سەكىرۋدەن «التىن» جۇلدە يەگەرى اتاندى. بۇل ەل قورجىنىن تولىقتىرعان التىنشى «التىن»  بولدى.

ەلباسى جەڭىل اتلەتىمىزدى «بارىس» وردەنىمەن ماراپاتتاي وتىرىپ، جەڭىسىمەن شىن جۇرەكتەن قۇتتىقتادى.

سپورتتىق ءومىر قىسقا. ءبىر سپورتشىنىڭ بىرنەشە وليمپيادا ويىندارىنان بوي كورسەتۋى سيرەك كەزدەسەدى. ولگا رىپاكوۆا 2016 جىلى ريو-دە-جانەيرودا وتكەن وليمپيادا ويىندارىنا قاتىسىپ، قولا جۇلدەگەر اتاندى.

نۇرسۇلتان نازاربايەۆ قازاقستاندىق وليمپياداشىلارعا قۇرمەت كورسەتە وتىرىپ بىلاي دەدى: ولگانىڭ «قولا» جۇلدەسى ءبىز ءۇشىن «التىنمەن» پارا پار. نەلىكتەن؟ سەبەبى،  ول لوندون مەن ريودا وتكەن ەكى وليمپيادانىڭ اراسىندا التىن اسىقتاي ۇلىن جارىق دۇنيەگە اكەلىپ ۇلگەردى. ول بارلىعى ەكى بالانى ومىرگە اكەلگەنىنە قاراماستان، دارىنىن جوعالتپاي، سپورتتاعى قاسيەتتەرىن دە ساقتاپ قالدى. جارايسىڭ! ەڭ الدىمەن - انا! ەكىنشىدەن، باتىر! ياعني، باتىر-انا!

ۇزدىك اتانعان سپورت ساڭلاقتارى ۇلت ماقتانىشىنا اينالاتىنى ءسوزسىز. ولاردىڭ جەتىستىكتەرى جاستاردى ەڭبەكتەنۋگە، جەڭىلىستەن كەيىن قايتا تۇرۋعا ۇيرەتەتىنى حاق. سونىمەن بىرگە، كۇندەلىكتى ءومىردى سالاۋاتتى ءومىر سالتىن ۇستانۋعا دا باۋليدى.