شىعىس قازاقستان وبلىسى — ءبىزدىڭ ەلىمىزدىڭ ەڭ كورىكتى ايماقتارىنىڭ ءبىرى. ول سۇلۋ تابيعاتىنىڭ ءارتۇرلى بولۋىمەن تانىمال.

بوريس ششەرباكوۆ — ءبىزدىڭ ءوڭىرىمىزدىڭ ناعىز پاتريوتى. ول باتىس التايداعى ەرەكشە قورعالاتىن اۋماقتاردى مەكەندەيتىن قۇستاردى زەرتتەگەن ورنيتولوگ. شىعىس قازاقستان وبلىسىنداعى جانۋارلاردىڭ الۋان تۇرلىلىگىن ساقتاۋ ءۇشىن تۇبەگەيلى كۇرەس جۇرگىزگەن قوعام قايراتكەرى. سونىمەن قاتار، دارىندى جازۋشى، ناتۋراليست جانە ولكەتانۋشى. تۋعان جەرى تۋرالى 30-عا جۋىق كىتاپ جازعان.

2011 جىلى بوريس ۆاسيليەۆيچ «شىعىس قازاقستان – ەۋرازيانىڭ جۇرەگى» اتتى كىتابىنىڭ تۇساۋىن كەستى. ولكە تاريحىنا زور ۇلەس قوسقان باعالى كىتاپ كاسىپكەر ۆلاديمير ءپونياۆيننىڭ قولداۋىمەن «ليبريۋس» باسپاسىندا دايىندالىپ، شىعارىلدى.

ءوز قۇنىن ايقىنداعان كىتاپ ەلباسىمىزدىڭ نازارىنان تىس قالمادى. تۋعان ولكە جايلى جازىلعان كىتاپتان ەرەكشە اسەر العان نۇرسۇلتان ءابىش ۇلى باسىلىمنىڭ اۆتورى مەن دەمەۋشىسىنە جىلى لەبىزىن ءبىلدىرىپ حات جازدى. ول ءبىزدىڭ ەلىمىزدىڭ تۇمسا تابيعاتىن قاعاز بەتىنە تۇسىرگەن دارىندى تۇلعاعا جانە دەمەۋشىسىنە كىتاپقا سىڭىرگەن ەڭبەكتەرى ءۇشىن العىس ءبىلدىردى. ەلباسىمىز تاۋلارعا ەرەكشە قۇمارتاتىنىن جانە ولاردىڭ سۇلۋلىعىنا تامسانا قارايتىنىن  اشىق جەتكىزدى.

«مەن تاۋ بوكتەرىندە تۋىلىپ، سوندا ەر جەتتىم. سوندىقتان، كەربەز تاۋلار ءارقاشان مەنى وزىنە باۋراپ تۇرادى.  ەگەر مۇنداي تاريحي شەجىرە وتانىمىزدىڭ ءار وڭىرىندە جازىلسا، ۇرپاقتارىمىزعا جەرىمىز بەن ونىڭ تاريحى، مادەنيەتى تۋرالى باعا جەتپەس مۇرا قالدىراتىن ەدىك. بارلىعى وزگەرسە دە، كىتاپقا تۇسكەن دۇنيە ساقتالىپ قالادى»، – دەپ جازدى نۇرسۇلتان نازاربايەۆ.