ءبىر كەزدەرى وسكەمەن حوككەي مەكتەبىنىڭ داڭقى بۇكىل كەڭەس وداعىنا تاراعان ەدى. 1989 جىلى سپورت مەكتەبى كسرو-دا ەڭ ۇزدىك دەپ تانىلدى. تاۋەلسىزدىكتىڭ العاشقى جىلدارىندا قازاقستان ۇلتتىق قۇراماسىنىڭ 99%-ىن وسكەمەندىك «تورپەدو» ويىنشىلارى قۇراعانى تاريح بەتتەرىنەن بەلگىلى.
وكىنىشكە وراي، داعدارىس بەلەڭ العان جىلدار ەلىمىزدەگى سپورتتىڭ دامۋىنا كەرى اسەرىن تيگىزبەي قويمادى. جاس سپورتشىلاردى دايىنداۋدا داستۇرگە اينالعان ادىس-تاسىلدەردى قايتا جاڭعىرتۋعا تۋرا كەلدى.
ءار ءۇيدىڭ اۋلاسىندا ورنالاسقان حوككەي قوراپتارىنىڭ ارقاسىندا، بۇل سپورت ءتۇرى حالىق اراسىندا كەڭىنەن تاراي باستادى. قالامىزدىڭ ءاربىر بۇلدىرشىنىندە كونكي، تاياق جانە شايبا بولدى. XXI عاسىردا وبلىس باسشىلارى اۋلالاردان بالالارعا ارنالعان حوككەي قوراپتارىن قايتادان اشا باستادى.
2012 جىلى نۇرسۇلتان نازاربايەۆ شىعىس قازاقستانعا جۇمىس ساپارى بارىسىندا جاس سپورتشىلارعا جاساندى مۇزدان جاسالعان جابىق حوككەي ءمودۋلىن اشتى. بۇل مودۋل «قازاقمىس» ءجشس-نىڭ قاراجاتى ەسەبىنەن سالىنعان بولاتىن.
مۇنداي تاريحي كۇنى مۇزعا سىرعاناۋعا كەلگەن جاس ۇلاندار ەلباسىنان قولتاڭباسى بار شايبا سىيلىققا العان ەدى. ال، №10 مەكتەپ-گيمنازياسىنىڭ بەسىنشى سىنىپ وقۋشىسى رۋسلان ساعىمبايەۆتىڭ باسقا جاسوسپىرىمدەرگە قاراعاندا جۇلدىزى ەرەكشە بولدى. نۇرسۇلتان ءابىش ۇلى وعان حوككەي تاياعىن سىيعا تارتتى.
2013 جىلى «قازاقمىس» ج ش س مەكتەپ وقۋشىلارىنا تاعى ءبىر مودۋل تارتۋ ەتىپ، قۋانىشتى ەسەلەي ءتۇستى. وسىنىڭ ارقاسىندا 3 مىڭعا تارتا بالا سۇيىكتى سپورت تۇرىمەن اينالىسۋ مۇمكىندىگىنە يە بولدى.
