قىرعىزستان پرەزيدەنتى سوورونباي جەەنبەكوۆ ەلدىڭ بۇرىنعى باسشىسى المازبەك اتامبايەۆقا «اك شۋمكار» ەرەكشە بەلگىسىمەن قاتار «قىرعىز رەسپۋبليكاسىنىڭ باتىرى» اتاعىن بەرۋ تۋرالى جارلىققا قول قويدى. بۇل تۋرالى قىرعىز پرەزيدەنتىنىڭ باسپا ءسوز قىزمەتى حابارلادى، دەپ جازادى Qamshy.kz  اقپارات اگەنتتىگى.

24 قاراشادا وتكەن ۇلىقتاۋ راسىمىندە جەەنبەكوۆ العاشقى جارلىعىمەن-اق اتامبايەۆتى ماراپاتتاۋعا ۋادە بەرىپ، باسشىلىق قىزمەتتەگى جەتىستىكتەرى ءۇشىن ريزاشىلىق بىلدىرگەن ەدى. وسىدان كەيىن اتامبايەۆ كوزىنە جاس العان. 

"قىرعىزستاننىڭ مەملەكەتتىك تاۋەلسىزدىگىن، حالىق بىرلىگىن، ەلدەگى بەيبىتشىلىك پەن كەلىسىمدى نىعايتۋعا قوسقان ۇلەسى، قىرعىز رەسپۋبليكاسىنىڭ تۇراقتى دامۋىنا بەرىك نەگىز قالاعانى ءۇشىن، سونداي-اق كورسەتكەن ساياسي ەرىك-جىگەرى مەن باتىلدىعى ءۇشىن المازبەك اتامبايەۆقا «اك شۋمكار» ەرەكشە بەلگىسىمەن بىرگە «قىرعىز رەسپۋبليكاسىنىڭ باتىرى» جوعارى دارەجەلى ەرەكشەلىك بەلگىسى بەرىلەدى"، — دەلىنگەن حابارلامادا.

23 قاراشادا ۇلىقتاۋ ءراسىمى بارىسىندا «اتا مەكەن» فراكسياسىنىڭ دەپۋتاتى سايدۋللا نىشانوۆ اتامبايەۆقا قىرعىز رەسپۋبليكاسىنىڭ باتىرى اتاعىن بەرۋدى ۇسىنعان.