الماتىداعى اۆياسيالىق بازاعا كەزەكتى س-295 اسكەري-كولىكتىك ۇشاعى كەلىپ ءتۇستى، - دەپ جازادى Qamshy.kz
ۇشاقتىڭ بۇل ءتۇرى ماكسيمالدى ۇزاق قاشىقتىقتىڭ بارلىق اۋماعىن قوسىمشا جانار-جاعار مايسىز ۇشىپ وتۋگە قابىلەتتى. س-295 ۇشاعى وتە قاراپايىم ءارى پايدالانۋعا ءتيىمدى. «Airbus Military» اۆياسيالىق كونسەرنى بۇل مودەلدى ءوزىنىڭ سەنىمدىلىگى، باسقارۋ جۇيەسىندەگى ۇزىلىسسىزدىگى، جانار-جاعار ماي ۇنەمدەۋى، تەحنيكا مەن جەكە قۇرامدى تاسىمالداۋ كەزىندەگى مانيەۆرى مەن موبيلدىلىگى بويىنشا وزگە ۇشاقتاردان ەرەكشە جاساعان. س-295 ۇشاعىن يسپانيادان قازاقستانعا ەكيپاج كومانديرى 1 سىنىپتى ۇشقىش پودپولكوۆنيك دميتريي گروس باسقارعان قازاقستان اۋە قورعانىسى كۇشتەرىنىڭ ۇشقىشتارى باسقارىپ الىپ كەلگەن بولاتىن. «وسىعان ۇقساس ۇشاقتاردان ەرەكشەلىگى بۇل ۇشاق 5 500 شاقىرىمعا دەيىنگى قاشىقتىقتاعى ۇشۋلاردى ورىنداۋعا قابىلەتتى. سونىمەن بىرگە، وسى ۋاقىت ارالىعىندا ۇشاقتىڭ جاعار ماي شىعىنى وزگە ۇشاقتارعا قاراعاندا ەكى ەسەەگە از»، - دەپ اتاپ ءوتتى ەكيپاج كومانديرى پودپولكوۆنيك دميتريي گروس. قازاقستان ارمياسىنىڭ اسكەري-كولىكتىك اۆياسياسى قاتارىن تولىقتىرىپ جاتقان جاڭا تەحنيكالار جاۋىنگەرلىك قابىلەتىمىز بەن ۇتقىرلىعىمىزدى ارتتىرۋعا، سونداي-اق جەكە قۇرام مەن تەحنيكانى الىس قاشىقتىققا تاسىمالداۋعا زور مۇمكىندىك بەرەدى.
بۇل تەكتەس ۇشاقتار قازاقستاندا 2012 جىلعى جەلتوقساننان بەرى پايدالانىلىپ كەلەدى. بۇگىندە قازاقستاندىق ۇشقىشتار مەن تەحنيكتەر ولاردى تولىقتاي يگەردى. س-295 ەكيپاجدارى قازاقستان اۋماعىندا جانە الىس شەتەلدەردە وتكەن بارلىق وقۋ-جاتتىعۋلارعا قاتىسىپ ءجۇر. پايدالانۋعا بەرىلگەن ەكى جىل ىشىندە س-295 ءبىزدىڭ تابيعي-كليماتتىق جاعدايدا ءوزىن سەنىمدى جانە كۇي تالعامايتىن ۇشاق رەتىندە كورسەتتى.
قازىرگى تاڭدا قارۋلى كۇشتەردىڭ تەحنيكالىق جاراقتانۋى ايتارلىقتاي ارتتى. قارۋلى كۇشتەردى قازىرگى زامانعى اۆياسيالىق تەحنيكالارمەن جاراقتاندىرۋ اسكەرلەردىڭ ۇتقىرلىعىن ارتتىرىپ، اسكەري-كولىكتىك اۆياسيا پاركىن جاڭارتۋعا مۇمكىندىك بەرەدى.
اۋە قورعانىس كۇشتەرىن جابدىقتاۋ ءۇشىن ۇزدىكسىز جاڭا زىمىراندار مەن ۇشاقتار الىنىپ كەلەدى. اسكەري-كولىكتىك اۆياسيانى 2020 جىلعا دەيىن تولىق جابدىقتايمىز، دەگەن ەدى ءساۋىر ايىنداعى ق ر پارلامەنتى ءماجىلىسىنىڭ قارۋلى كۇشتەر قىزمەتى بويىنشا ۇكىمەتتىك ساعاتىندا قورعانىس ءمينيسترى ساكەن جاسۇزاقوۆ.
«بۇگىندە ق ر قارۋلى كۇشتەرىن قارۋلى اسكەري تەحنيكامەن جابدىقتاۋ 92 پايىزعا جەتتى. ميگ-27، ميگ-23، ميگ-29 ۇشاقتارى شىعارىلىپ جاتىر. ەكى سۋ-30 ۇشاعىنىڭ كەلىپ تۇسەدى دەپ جوسپارلانعان. جوعارى باس قولباسشىعا بۇل ۇشاقتاردىڭ اسا قاجەتى ەكەنى جانە جىل سايىن تورتەۋىن قابىلداپ وتىرساق دۇرىس بولاتىندىعى تۋراسىندا ايتىلعان»، - دەگەن بولاتىن مينيستر جاسۇزاقوۆ.
سي-295 اسكەري-ترانسپورتتىق ۇشاعى - يسپاندىق «ەيرباسس ميليتاري» كاسىپورنىندا جاسالعان جانە زاماناۋي ناۆيگاسيا جۇيەسىمەن جابدىقتالعان ۇشاق. سي-295 ۇشاعى 9 تونناعا دەيىن جۇكتى جەتكىزىپ، 70 اسكەري قىزمەتشىنى تولىق قارۋ-جاراعىمەن تاسىمالداي الادى جانە قوسىمشا جانارماي قۇيماي 5 مىڭ شاقىرىمعا دەيىن ۇشا الادى.
پىكىر قالدىرۋ