ورتالىق كوممۋنيكاسيالار قىزمەتىندە وتكەن ءباسپاسوز-ماسليحاتىندا شىعىس قازاقستان وبلىسىنىڭ اكىمى دانيال احمەتوۆ ايماقتىڭ الەۋمەتتىك-ەكونوميكالىق دامۋى، ەلباسى ن.ءا. نازاربايەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىنىڭ، سونىمەن قاتار «رۋحاني جاڭعىرۋ» باعدارلاماسىنىڭ جۇزەگە اسۋ بارىسىنا توقتالدى. 

«بيىلعى كورسەتكىشتەرگە كوز جۇگىرتسەك، شىعىس قازاقستاندا ەكونوميكالىق باعىتتا اۋىز تولتىرىپ ايتارلىق ءوسىم بايقالادى. رەسپۋبليكا پرەزيدەنتىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا كورسەتىلگەن ماقسات پەن مىندەتتەردى، ستراتەگيالىق جوبالاردى، مەملەكەتتىك باعدارلامالاردى ىسكە اسىرۋ ءۇشىن وبلىستا بارلىق جاعداي جاسالعان، قاجەتتى رەسۋرستار كوزى دە جەتەرلىك»، – دەدى دانيال احمەتوۆ.

جىل باسىنان بەرى شىعىس قازاقستان ەكونوميكاسىنىڭ ىشكى ايماقتىق ءونىمى 102%-عا ءوستى. ءىاو ارتۋى، ەڭ ءبىرىنشى، اۋىل شارۋاشىلىقتاعى ىشكى ءونىمنىڭ 102%-عا، سونداي-اق، قۇرىلىس سالاسىندا 108%-عا ۇلعايۋى ەسەبىنەن بولىپ وتىر. 234 مىڭ ش.م. اۋماقتى قۇراعان تۇرعىن ءۇي بوي كوتەرىپ، قولدانىسقا بەرىلدى. بۇل رەتتە كورسەتكىش دەڭگەيىنىڭ 104%-عا ەسەلەنگەنىن اتاپ وتكەن ورىندى. ال نەگىزگى كاپيتالعا تارتىلعان ينۆەستيسيا كولەمى اقشالاي ەسەپتەگەندە 107%-عا ءوستى (تكي – 100%).

ايماقتا يندۋستريالدى-يننوۆاسيالىق جوبالار تابىستى ءارى جوعارى قارقىنمەن جۇزەگە اسىپ جاتىر. اعىمداعى جىلدىڭ وزىندە كاسىپكەرلىكتى قولداۋ كارتاسى اياسىندا قۇنى 381،4 ملرد. تەڭگە قۇرايتىن 6 جوبا ىسكە قوسىلادى. ناتيجەسىندە، 1800 ادام تۇراقتى جۇمىسپەن قامتىلماق.

اگرو-ونەركاسىپتىك كەشەن. ەكونوميكالىق ءوسىمنىڭ درايۆەرى رەتىندە شىعىس قازاقستاندا اۋىل شارۋاشىلىعى سالاسىنىڭ دامۋىنا جوعارى كوڭىل ءبولىنىپ كەلەدى. اوك-گە تارتىلعان ينۆەستيسيا مەن قۇيىلعان سۋبسيديانىڭ جالپى كولەمى 30 ملرد. تەڭگەنى قۇراپ، وتكەن جىلمەن سالىستىرعاندا 600 ملن. تەڭگەگە ارتىپ وتىر. قولعا الىنعان كەشەندى شارالاردىڭ ارقاسىندا بيىل اۋىلشارۋاشىلىق ىشكى ءونىمىنىڭ دەڭگەيى 2016 جىلمەن سالىستىرعاندا 11 پايىزعا ارتتى.

ءبىلىم. وبلىستا 2015-2019 جىلدارعا ارنالعان ءۇشتىلدى ءبىلىم بەرۋدى دامىتۋعا باعىتتالعان كەشەندى جوسپار قابىلدانىپ، جەرگىلىكتى بيۋدجەتتەن سوڭعى ەكى جىلدا 1،7 ملرد. تەڭگە ءبولىندى.

«رۋحاني جاڭعىرۋ» باعدارلاماسى نەگىزىندە شىعىس قازاقستان مەكتەپتەرىنىڭ حيميا، بيولوگيا، فيزيكا جانە روبوت تەحنيكاسى سىنىپتارىن جاڭارتىپ، وزگەرتۋگە باعىتتالعان «مەنىڭ مەكتەبىم» جوباسى قولعا الىندى.

ءبىلىم سالاسىنداعى تاعى ءبىر ماڭىزدى باستاما – ول مەكتەپ تۇلەكتەرىنىڭ سىرتقا كەتۋىن توقتاتۋ ماقساتىندا اتقارىلىپ جاتقان جۇيەلى جۇمىس. وبلىس اكىمدىگى ايماقتىڭ نەگىزگى جوو-نا سۇرانىسقا يە ماماندىقتارعا 200 گرانت جانە وبلىس ەكونوميكاسىن وركەندەتۋگە قاجەتتى ماماندىقتار ءۇشىن مەملەكەتتىك تاپسىرىس اياسىندا 200 ورىن بولەدى.

دەنساۋلىق ساقتاۋ. وبلىستا اتالعان سالانى دامىتۋعا باعىتتالعان ءۇش جىلدىق ستراتەگيالىق جوسپار قۇرىلعان. ونىڭ اياسىندا ونكولوگيا، كارديولوگيا، بوساندىرۋ، انا مەن بالا دەنساۋلىعىن ساقتاۋ سياقتى باسىم باعىتتار بويىنشا 1،2 ملرد.تەڭگەگە ءۇش دەڭگەيلى ارنايى وقىتۋ باعدارلاماسى جۇزەگە اسۋدا.

3 جىل ىشىندە شەتەل كلينيكالارىندا 150 مامان وقىتىلماق. بۇعان قوسا، بيىل وبلىستىڭ بارلىق مەديسينالىق مەكەمەلەرىندەگى مەديسينالىق قۇرال-جابدىق كەشەندى تەكسەرۋدەن وتكىزىلىپ، ولاردىڭ قاتارى الداعى ءۇش جىلدا 23 ملرد تەڭگەگە جاڭارتىلادى. ەرەكشە اتاپ وتەر جاڭالىق، ق ر دەنساۋلىق ساقتاۋ مينيسترلىگىمەن بىرلەسە وسكەمەن قالالىق №1 اۋرۋحانا بازاسىندا ەلدەگى تۇڭعىش ءارى بىرەگەي روبوتتاندىرىلعان حيرۋرگيا جانە ترانسپلانتولوگيا ورتالىعىن اشۋ تۋرالى شەشىم قابىلداندى.

ەكسپو-2017 جوبالارىنىڭ ىسكە اسۋى. استانا قالاسىندا وتكەن ەكسپو – 2017 كورمەسىندە شىعىس قازاقستان وبلىسىنان 4 جوبا بۇقارا نازارىنا ۇسىنىلدى. ونىڭ ىشىندە 2 جوبانىڭ (زىريان اۋدانىندا تۇرعىسىن سۋ قويماسىندا قۋاتتىلىعى 24،9 مۆت جانە 20 مۆت بولاتىن گەس-1 مەن گەس-2 قۇرىلىسى) جۇزەگە اسۋى باستالىپ تا كەتتى.

سونداي-اق، «قازاقستان» پاۆيلونىنىڭ «جاسامپاز ەنەرگيا» بولىمىندە كۋرچاتوۆ قالاسىنىڭ ۇلتتىق يادرولىق ورتالىعى «قازاقستاندىق توكاماق تەرمويادرولىق ماتەريالتانۋ رەاكتورى» جوباسىن ۇسىندى.

ەكسپو-2017 كورمەسىنە قويىلعان جوبالاردى زەرتتەۋ بويىنشا قۇرىلعان وبلىستىق جۇمىس توبى ايماقتا ەنەرگەتيكا سالاسىنا قاتىستى 15، ەكولوگيا – 5، سۋمەن جابدىقتاۋعا باعىتتالعان 2 جوبانى قامتىعان، جالپى سانى 22 جوبانى جۇزەگە اسىرۋ مۇمكىندىگىن قاراستىرىپ وتىر. 

رۋحاني جاڭعىرۋ. وبلىستا 28 ملرد. تەڭگە بيۋدجەتى بار، قاتارىنا 61 جوبا كىرگەن بەس جىلدىق «رۋحاني جاڭعىرۋ» كەشەندى ايماقتىق باعدارلاما قۇراستىرىلدى. كوپ ەتنيكالىق حالىقتىڭ تاريحىن، باي مادەني مۇراسىن، ءسالت-داستۇرىن زەرتتەۋ، ساقتاۋعا باعىتتالعان جوبالاردىڭ ماڭىزدىلىعى جوعارى. «كونە قازىنالار» جوباسى بويىنشا 5 ارحەولوگيالىق-زەرتتەۋ جۇمىستارى زەرتتەلىندى (كاتون-قاراعاي اۋدانىنداعى بەرەل، زايسان اۋدانىنداعى شىلىكتى قورعاندارى، ۇلان اۋدانىنداعى ابىلايكيت ءقورعان-موناستىرى، تارباعاتاي اۋدانىنداعى ەلەكە سازى، اباي اۋدانىنداعى قىرىقۇڭگىر ەسكەرتكىشى). 

ءوڭىردىڭ تاريحي-مادەني مۇراسىن، تانىمدىق ءتۋريزمىن دامىتۋعا باعىتتالعان «شىعىس قازاقستاننىڭ مارجانى» اتتى ايماقتىق جوبا جاقىن ارادا كوپشىلىككە جول تارتادى. ونى جۇزەگە اسىرۋ اياسىندا شىعىس قازاقستاننىڭ كيەلى جەرلەرىنىڭ كارتاسى جاسالدى. ايتا كەتۋ كەرەك، شقو 10 نىسانى رەسپۋبليكالىق ساراپتاۋ كوميسسياسىنىڭ قاراۋىنان كەيىن «قازاقستاننىڭ كيەلى جەرلەرى» تىزىمىنە ەنگىزىلدى. سونداي-اق، مۇراجاي، كىتاپحانا، مۇراعات قورلارىن سيفرلىك فورماتقا اۋىستىرۋ بويىنشا جۇمىستار باستالدى.

«رۋحاني ءبىلىم بەرۋ» جوباسى اياسىندا سەمەي قالاسىندا 100 ورىنعا شاقتالعان شىعىسقازاقستاندىق ءدىنتانۋ كوللەدجى قۇرىلادى.

بۇدان بولەك، «تۋعان جەر» باعدارلاماسىنا 21 ملرد. تەڭگەدەن استام قاراجات جينالدى.

تۋريزم. قازاقستان رەسپۋبليكاسىنىڭ تۋريستىك سالاسىن 2023 جىلعا دەيىنگى دامىتۋ كونسەپسياسى اياسىندا وبلىستا «التاي مارجانى» تۋريستىك كلاستەرىن قۇرۋ بويىنشا جۇمىستار جالعاسىن تابۋدا. سوڭعى 2 جىلدا 4،3 ملرد. تەڭگەگە نەگىزگى تۋريستىك باعىتتاعى جولدار جوندەۋدەن ءوتتى. جاعاجاي ءتۋريزمىن دامىتۋ ماقساتىندا 550 ملن. تەڭگەگە سىبە كولدەرى مەن الاكول جاعالاۋى اباتتاندىرىلىپ، دەمالۋشىلارعا قولايلى جاعداي جاسالدى.

بۇدان بولەك، شەتەلدىك تۋريستەر كاتون-قاراعاي اۋدانى مەن مارقاكولگە كوشى-قون پوليسياسىنىڭ قوسىمشا رۇقساتىنسىز كىرىپ-شىعۋى تۋرالى ۇسىنىس ۇكىمەت تاراپىنان قولداۋ تاپتى. اتالمىش باستاما ايماقتىڭ ەكوتۋريزمىن دامىتۋ ەكپىنىن ارتتىرارى ءسوزسىز.

سونىمەن قاتار، الاكول جاعالاۋىندا قحر-مەن شەكارا ارالىق ىنتىماقتاستىق ايماعىن قۇرۋ تۋرالى ۇسىنىس ەنگىزىلدى. ونىڭ نەگىزىندە قىتايلىق تۋريستەرگە جەڭىلدەتىلگەن كوشى-قون جانە ۆيزالىق رەجيمى قاراستىرىلادى. اتالعان ماسەلە سىرتقى ىستەر، مادەنيەت جانە سپورت مينيسترلىگىنىڭ قاراۋىندا جاتىر.