نازاربايەۆ ۋنيۆەرسيتەتىندە وسى تاقىرىپتا زاماناۋي ماستەر-كلاسس ءوتتى. شارانى «جاس وتان» جاستار قاناتى مەن «بولاشاق» اسسوسياسياسى بىرلەسە وتىرىپ ۇيىمداستىردى. استانا قالاسىنداعى جوعارى وقۋ ورىندارىنىڭ ستۋدەنتتەرى مەن جاس ماماندار كوشباسشى بولۋدىڭ قىر-سىرىن مەڭگەردى، دەپ جازادى Qamshy.kz اقپارات اگەنتتىگى. 

ماستەر-كلاسس بارىسىندا قاتىسۋشىلار كوشباسشى ۇعىمىن ەلىمىزدىڭ ساياسي تاجىريبەسىندە ورىن العان جاعدايلاردى مىسالعا الا وتىرىپ قاراستىردى. جاستار ەلباسى نۇرسۇلتان نازاربايەۆتىڭ ەل تاريحىنىڭ ءار ءتۇرلى كەزەڭىندە قابىلداعان شەشىمدەرىنە تالداۋ جاسادى. ەلباسىنىڭ قابىلداعان شەشىمدەرىنە بايلانىستى كوشباسشىعا ءتان باستى قاسيەتتەردى انىقتادى. يادرولىق قارۋدان باس تارتۋ، «بولاشاق» پەن «نۇرلى جول» باعدارلامالارىنىڭ ىسكە اسۋى تۋرالى ناقتى مىسالدار ءسوز بولدى.

شارادا جەكەلەگەن تاقىرىپتاردى تالقىلاۋمەن قاتار، ارنايى شاقىرىلعان قوناقتار بۇگىنگى ەلىمىزدەگى وزەكتى ماسەلەلەر مەن ولارعا قاتىستى شەشىمدەر تۋرالى ءوز ويلارىن ورتاعا سالدى. «نۇر وتان» پارتياسىنىڭ حاتشىسى عابيدۋللا ابدراحيموۆ پارتيانىڭ جاڭعىرۋىنا بايلانىستى باستامالارى جايلى ءسوز قوزعادى. الداعى ەكى ايدا پارتيا حالىقتى الاڭداتقان ماسەلەلەرگە بايلانىستى ناقتى ۇسىنىستارىن جينايتىن «قوعامدىق باستاما» ونلاين-پەتيسيالار الاڭىن جۇزەگە اسىرادى. ۇسىنىستار داۋىس بەرۋ ارقىلى باسقا دا ازاماتتاردان قولداۋ تاپسا، پارتيا مىندەتتى تۇردە تالقىعا سالماق. بۇل قۇرال قوعامنىڭ كوڭىل كۇيىن انىقتاپ قانا قويماي، ازاماتتاردى مازالاعان ماسەلەلەردىڭ شەشىمىن تابۋعا كومەكتەسەدى جانە حالىق پەن مەملەكەت اراسىندا كوپىرگە اينالادى دەپ سەنەدى. سونداي-اق، پارتيا حاتشىسى وبلىس اكىمدەرىن تاعايىنداۋعا بايلانىستى «پارتيالىق نوميناسيا» جوباسىنا توقتالدى. اكىمدەردى تاڭداۋ بارىسىنا جەرگىلىكتى تۇرعىنداردىڭ قاتىسۋىن قولعا الماق.   

سونداي-اق، ماستەر-كلاسس قوناقتارى بۇگىنگى وزەكتى تاقىرىپتاردا ءوز پىكىرلەرىن ءبىلدىردى. «ForteBank» اق باسقارما باسشىسى ماعجان اۋەزوۆ بانك سفەراسىنداعى سوڭعى وزگەرىستەر جايلى تالقىلاسا، «سامرۇق-قازىنا» اق ادام رەسۋرستارىن باسقارۋ جانە كوممۋنيكاسيا جونىندەگى باسقارۋشى ديرەكتورى ۇلان تاجىبايەۆ مادەني جاڭعىرۋ تاجىريبەسى تاقىرىبىندا ءسوز قوزعادى. ال ەۋرازيالىق ينتەگراسيا ينستيتۋتىنىڭ ديرەكتورى عاني نىعىمەتوۆ رۋحاني جاڭعىرۋ ۇعىمىن وزگەرىستەردى باسقارۋ ارقىلى ءتۇسىندىرىپ، كەز كەلگەن وزگەرىس ءوزىمىزدىڭ ءجۇرىس-تۇرىسىمىزدان باستاۋ الۋ كەرەكتىگىن ايتتى.

ماستەر-كلاسس سوڭىندا قاتىسۋشىلارى نۇرسۇلتان نازاربايەۆتىڭ كورەگەندىك، شەشىم قابىلداۋ قابىلەتتىگى مەن قيىن تاڭداۋ جاساۋ، پراگماتيزم سىندى كوشباسشىلىق قاسيەتتەرىن اتاپ ءوتتى.