شىعىس قازاقستان وبلىسى رەسپۋبليكادا «رۋحاني جاڭعىرۋ» قوعامدىق سانانى جاڭعىرتۋ باعدارلاماسىن ىسكە اسىرۋ بويىنشا كوشباسشى بولىپ تۇر. بۇل تۋرالى 2017 جىلدىڭ 13 قاراشاسىندا «رۋحاني جاڭعىرۋ» باعدارلاماسىن ىسكە اسىرۋ جونىندە ارداگەرلەر كەڭەسىنىڭ قاتىسۋىمەن وتكەن دوڭگەلەك ۇستەلدە ايتىلدى.

«رۋحاني جاڭعىرۋ» قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى سۇراقتار بويىنشا «رۋحاني جاڭعىرۋ» جوبالىق كەڭسە قىزمەتىنىڭ شقو بويىنشا جەتەكشىسى ولگا شابالينا ءسوز سويلەدى. ول وسىنداي تەڭدەسسىز باعدارلامانىڭ ورىندالۋىن قاراجات ءبولۋ سياقتى بۇرىنعى كريتەرييلەر مەن ينديكاتورلار بويىنشا باقىلاۋ مۇمكىن ەمەس ەكەندىگىن اتاپ ءوتتى، ويتكەنى رۋحانيلىق پەن پاتريوتيزم اقشامەن ولشەنبەيدى. سول سەبەپتى قوعامدىق سانانى جاڭعىرتۋ باعدارلاماسىن ىسكە اسىرۋ ءۇشىن جوبالىق ءتاسىل تاڭدالدى.

ق ر پرەزيدەنتى نۇرسۇلتان ءابىش ۇلى ءوز سوزىندە 6 ارنايى جوبانى اتاپ ءوتتى. ءبىزدىڭ وبلىستا 61 ايماقتىق جوبا جۇمىس ىستەيدى. بۇل جوبالار رەسپۋبليكالىق تىزىلىمگە ەنگىزىلدى. ساراپشىلاردىڭ ارنايى كەڭەسى ولاردىڭ جۇزەگە اسىرىلۋىنا قوعامدىق باقىلاۋدى جۇزەگە اسىرادى. ولگا سەرگەيەۆنا رەسپۋبليكا بويىنشا تەڭدەسى جوق جوبالاردىڭ ءبىرى رەتىندە شقو اكىمى دانيال احمەتوۆتىڭ باستاماسىمەن جۇزەگە اسىرىلعان ءۇش تىلدە ءبىلىم بەرۋ جوباسىن اتادى. «بۇل جوبا ءوز مارەسىنە جەتكەن كەزدە باسقا وبلىستاعىلار بىزدەن ۇيرەنەتىن بولادى» دەدى ول.

بۇگىنگى تاڭدا شىعىس قازاقستان مەن اقتوبە وبلىسى بولىنگەن قاراجات كولەمىمەن عانا ەمەس، ماقساتتىڭ ايقىندىعى مەن نەگىزگى كورسەتكىش بويىنشا باعدارلامانى ىسكە اسىرۋ جونىندە  كوشباسشى بولىپ تابىلاتىنىن ايتا كەتۋ كەرەك.