تۇڭعىش پرەزيدەنت كۇنى ەلىمىزدە سوڭعى بىرەر جىلدىڭ كولەمىندە پايدا بولعان ايرىقشا مەرەكەلەردىڭ ءبىرى. ايرىقشا بولعاندا قالاي، ناعىز ءمانى مەن ماڭىزى وتە قاستەرلى دە قۇرمەتتى مەرەكەنىڭ ءبىرى.

ءار ەلدى ءوزىنىڭ اراسىنان جارىپ شىققان كوسەمى، ۇلىعى باسقارادى. قازاق قازاق بولىپ جاراتىلعالى بەرى بۇگىنگىدەي جاسامپاز كۇيگە ەنىپ، جەر جاھانعا تانىلىپ، قوي ۇستىنە بوزتورعاي جۇمىرتقالاعان زاماننىڭ ورناعانى، ەڭ الدىمەن تاۋەلسىزدىكتىڭ جانە سول ەگەمەندىكتى باياندى قىلا بىلگەن تۇڭعىش پرەزيدەنتىمىز ءنۇرسۇلتان ءابىش ۇلى نازاربايەۆتىڭ ارقاسى ەكەنى ايان. سوندىقتان دا قاي سالادا بولسا دا ەلباسىمىزدىڭ جاسامپاز ىزدەرى سايراپ جاتىر. ونى ۇرپاقتان ۇرپاققا جەتكىزىپ، قازاق ءۇشىن قامدانىپ، قىر وتكەلدىڭ ۇستىندە «جانىم ەلىم ءۇشىن ساداعا» دەپ قادام باسقان ەل اسىلى – ەلباسىنىڭ ءار ىسىنە قۇرمەت بىلدىرەتىن كۇن بۇل. وسى كۇنى سونىمەن قاتار، ەل يگىلىگى ءۇشىن دە تالاي يگى ىستەر پاراسى اتقارىلىپ جاتاتىندىعىن دا كورىپ ءجۇرمىز. ماسەلەن، تۇڭعىش پرەزيدەنت كۇنىنە وراي كەڭ بايتاق ەلدىڭ ءار وڭىرىندە مەكتەپ، بالاباقشا، اۋرۋحانا، تۇرعىن ءۇي سىندى الەۋمەتتىك نىساندار بەرىلىپ كەلەدى. بۇل وتە يگى ءداستۇر. لايىم ول جىلداردان جىلعا جالعاسا بەرسىن.

بيىل تۇڭعىش پرەزيدەنت كۇنىنە وراي قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىندا دا قۋانىشتى شارا ءوتىپ، 65 اسكەري قىزمەتشى وتباسى قونىس تويلارىن تويلادى.  اتاپ ايتقاندا، الماتى قالاسى جۇبانوۆ كوشەسى 10 ا مەكەنجايىندا وڭىرلىك قولباسشىلىقتىڭ قىزمەتتىك جاتاقحاناسى بار بولاتىن. سالىنعانىنا جارتى عاسىردان ۋاقىت ەتكەن باسپانا كەيىنگى ۋاقىتتارى ءتىپتى توزىپ، كارىز قۇبىرلارى جارىلىپ، جىلدام ارادا جوندەۋ جۇمىستارىن قاجەت ەتىپ تۇرعان بولاتىن. ونىڭ دا ءساتى بيىل ءتۇسىپ، رەسپۋبليكالىق بيۋدجەتتەن ارنايى قارجى ءبولىنىپ، جىل بويىندا قارقىندى قۇرىلىس جۇمىستارى جۇرگىزىلدى. ەندى مىنە، اسكەري قىزمەتشىلەر يگىلىگىنە بەرىلەر ءسات تە كەلدى.

قونىس تويى شاراسىن «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور قايرات اقتانوۆ مىرزا ءوزى اشىپ، ىزگى تىلەك، قۇتتىقتاۋىن ءبىلدىردى.

• قۇرمەتتى ارىپتەستەر، ەلباسىنىڭ ساليقالى ساياساتىنىڭ ارقاسىنداەلىمىز توقسانىنشى جىلداردىڭ  تولقىندى-تولقىندى اۋىر كەزەڭدەرىندە ەتەڭ-جەڭىن جيناپ، دامۋدىڭ داڭعىل جولىنا تۇسە الدى. زامان وزگەردى، ەل تۇلەدى، قازاق ەلى كوركەيدى. مۇنىڭ بارلىعى دا ارينە، وڭاي كەلگەن جوق. ۇلتتى ورتاق يگىلىككە ۇيىتۋ، ەل بىرلىگىن ساقتاۋ، تىنىشتىقتى قامداۋ، وندىرىستەگى وركەندى ىستەرگە جول اشۋدىڭ بارلىعى دا ەلىن سۇيە بىلگەن، ەلدىكتى بەكەمدەي بىلگەن ۇلت كوشباسشىسىنىڭ ەرەن ەڭبەگىنىڭ جەمىسى. بۇگىن مىنە، تۇڭعىش پرەزيدەنت كۇنىنە وراي تۇرعىن ءۇي كەزەگىندە تۇرعان اسكەري قىزمەتشىلەرىمىزگە قىزمەتتىك باسپانا بەرىپ وتىرمىز. بۇل دا يگىلىك. تاۋەلسىزدىك يگىلىگى، ەلباسىنىڭ ەلىمىزدى جاسامپازدىقپەن العا باستاعان وركەندى ىستەرىنىڭ يگىلىگى. قونىستارىڭىز قۇتتى بولسىن، - دەپ اتاپ ءوتتى.

شارادا وڭىرلىك قولباسشىلىقتىڭ الماتى گارنيزونىنداعى 5571، 7552، 3660 اسكەري بولىمدەرىندە جانە وڭىرلىك باسقارمادا قىزمەت اتقاراتىن باس-اياعى 65 اسكەري وتباسىنا قىزمەتتىك جاتاقحاناداعى باسپانا كىلتتەرى سالتاناتتى تۇردە تابىس ەتىلدى.

ءوز كەزەگىندە «وڭتۇستىك» وڭىرلىك قولباسشىلىق قولباسشىسىنىڭ تىل جونىندەگى ورىنباسارى پودپولكوۆنيك ناريمان كوپەيەۆ: «اسكەري قىزمەتشىلەردىڭ الەۋمەتتىك جاعدايلارىن جاقسارتۋعا باسا مەن بەرۋ، ولاردى تۇرعىن ۇيمەن قامتۋ - بۇل مەملەكەتتىك ماڭىزداعى ستراتەگيالىق مىندەتتەردىڭ ءبىرى بولىپ تابىلادى. بۇل  ماسەلەگە ۇلتتىق ۇلان باس قولباسشىلىعى ۇدايى باسا نازار اۋدارىپ كەلەدى. بۇل ماقساتتا جىل سايىن قوماقتى قاراجات قاراستىرىلىپ، جاڭا پاتەرلەر ساتىلىپ الىنۋدا. بيىلعى اتالعان قىزمەتتىك جاتاقحانا تولىقتاي كۇردەلى جوندەۋدەن وتكىزىلىپ، تۇرعىن ءۇيدىڭ بارلىق قاجەتتى جۇيەلەرى جاڭارتىلدى»، - دەپ اتاپ ءوتتى.

قۇرىلىستى ۇستىمىزدەگى جىلدىڭ اقپان ايىنان باستاپ «الۆيس» ج ش س جۇرگىزگەن بولاتىن. شارا بارىسىندا اتالعان قۇرىلىس كومپانياسىنىڭ باسشىسى ناريمان  بەليالوۆقا العىس جاريالاندى. شارا سوڭىندا گەنارال-مايور قايرات اقتانوۆ سۋ جاڭا باسپانانىڭ شىمىلدىقاشار لەنتاسىن قيدى. سوڭىنان ءوزى ءار باسپاناعا كىرىپ، تانىسىپ شىقتى. زاماناۋي ۇلگىدە كۇردەلى جوندەۋدەن وتكىزىلىپ، شاتىرى، كارىز، جىلىتۋ جۇيەلەرى تولىقتاي جاڭارىلىپ، ءىشى-سىرتى تولىقتاي جوندەلگەن، اۋلاسى اباتتاندىرىلىپ، بالالارعا ويىن اۋلاسى جاسالعان قىزمەتتىك باسپانادان بولمە الۋشىلار ءوز قۋانىشتارىن جاسارىمادى. ىزگى تىلەكتەرىن ءبىلدىرىپ جاتتى. قۋانىش كوبەيسىن!

مايور ارمان اۋباكىروۆ،

الماتى قالاسى