2017 جىلعى 1 جەلتوقساندا الماتى وبلىسى قاراساي اۋدانىنىڭ شامالعان اۋىلىندا ق ر تۇڭعىش پرەزيدەنتى - ەلباسى ن.ءا. نازاربايەۆتىڭ «اتامەكەن» تاريحي-مادەني ورتالىعى اشىلدى. شارا الماتى وبلىسىنىڭ اكىمشىلىگى جانە ق ر تۇڭعىش پرەزيدەنتى - ەلباسى قورىنىڭ قولداۋىمەن ۇيىمداستىرىلدى، دە جازادى Qamshy.kz اقپارات اگەنتتىگى. 

ورتالىق ەلباسىنىڭ كىشى وتانىندا قۇرىلدى. ونىڭ ماقساتى - قازاقستاندىقتار اراسىندا ەلباسىنىڭ شىعارماشىلىق جانە ساياسي جولىن كەڭىنەن تاراتۋ، سونداي-اق پرەزيدەنتتىڭ ءومىرى مەن قىزمەتىنىڭ ايشىقتى ۇلگىلەرى نەگىزىندە جاستاردىڭ پاتريوتتىق تاربيەسىن كۇشەيتۋ بولىپ تابىلادى.

«اتامەكەن» تاريحي-مادەني ورتالىعىندا ق ر تۇڭعىش پرەزيدەنتى – ەلباسىنىڭ  قورى مەن كىتاپحاناسى، تۇڭعىش پرەزيدەنتتىڭ مۋزەيى، پرەزيدەنت ءىس باسقارماسى، ق ر ۇلتتىق كىتاپحاناسى، شامالعان اۋىلىنىڭ مەكتەپ-مۋزەيى، قاراساي اۋداندىق تاريحي-ولكەتانۋ مۋزەيى جانە م. تىنىشپايەۆ اتىنداعى الماتى وبلىستىق تاريحي-ولكەتانۋ مۋزەيى بەرگەن قۇجاتتار، كىتاپتار، فوتوماتەريالدار جانە باسقا ەكسپوناتتار جينالعان. 

جاڭا ورتالىقتا حرونولوگيالىق رەتپەن ورنالاستىرىلعان ن.ءا. نازاربايەۆتىڭ ءومىرى مەن قىزمەتىنىڭ، قازاقستان رەسپۋبليكاسىنىڭ قالىپتاسۋى مەن دامۋىنىڭ  نەگىزگى كەزەڭدەرىنە سايكەس كەلەتىن ەكسپوناتتار ورتالىققا كەلۋشىلەرگە قازاقستاندىق مەملەكەتتىلىكتىڭ قايتا جاڭعىرۋى پروسەسىندەگى، ەكونوميكاداعى جانە الەۋەمەتتىك سالاداعى، تاريحي دامۋداعى تۇبەگەيلى تەرەڭ وزگەرىستەر وتكىزۋدەگى  جانە قازاقستاننىڭ حح جانە ءححى عاسىرلار شەڭبەرىندە حالىقارالىق بەدەلىنىڭ نىعايۋىنداعى ەلباسىنىڭ اۋقىمدى ۇلەسىن، ءرولى مەن ەڭبەگىن كوزبە-كوز باعالاۋ مۇمكىندىگىن تۋدىرادى.  

ءبىرىنشى زالدا بولاشاق مەملەكەت باسشىسىنىڭ بالالىق جانە ءجاسوسپىرىم جىلدارىنا، ەڭبەك جولىنىڭ باستالۋىنا ارنالعان ەكسپوزيسيا ورنالاسقان.

ەكىنشى زالدىڭ ەكسپوناتتارى ەلباسىنىڭ وداقتىق رەسپۋبليكا باسشىسى قىزمەتتەرىن اتقارعان جانە تاۋەلسىز قازاقستاننىڭ بۇكىل حالقى  تۇڭعىش پرەزيدەنت ەتىپ سايلاعان كەزەڭدەرگە جاتادى.

«اتامەكەن» ورتالىعىنىڭ ءۇشىنشى زالى ەلباسىنىڭ باسشىلىعىمەن ىسكە اسىرىلعان اۋقىمدى قايتا قۇرۋلارعا، قازاقستان رەسپۋبليكاسى تاۋەلسىزدىگىنىڭ شيرەك عاسىرىنداعى دامۋ قورىتىندىلارىنا ارنالعان.  سونداي-اق مۇندا ن.ءا. نازاربايەۆتىڭ تۋعان اۋىلى شامالعانعا ءار جىلدارى بارعان ساتتەرى تۋرالى فوتوماتەريالدار دا بار.

ءتورتىنشى زالدا ەلباسىنىڭ سىرتقى ساياساتتىق قىزمەتى – استانادا وتكىزىلگەن سامميتتەر جانە ەكسپو-2017 قوسا العانداعى ءىرى حالىقارالىق شارالار، قازاقتاردىڭ بۇكىلالەمدىك قۇرىلتايى، شەتەلدەردىڭ مەملەكەت جانە ۇكىمەت باسشىلارىنىڭ رەسمي كەلگەن ساپارلارى تۋرالى ماتەريالدار ورنالاستىرىلعان.

ەلباسىنا شەتەلدىك كوشباسشىلار تارتۋ ەتكەن حاتتامالىق سىيلىقتار ۇلكەن قىزىعۋشىلىق تۋدىرادى. 

«اتامەكەن» ورتالىعىندا پرەزيدەنت ەڭبەكتەرىنىڭ، سونداي-اق ءتۇرلى اۆتورلار جازعان ەلباسىنىڭ جولى تۋرالى كىتاپتاردىڭ ۇلكەن توپتاماسى جيناقتالعان.

ورتالىققا كىرەبەرىستە قازاقستان رەسپۋبليكاسى كارتاسىنىڭ اياسىندا تانىمال ءمۇسىنشى شاميل قوجاحانوۆ ورىنداعان قولا كومپوزيسيا ورنالاستىرىلعان.

ق ر تۇڭعىش پرەزيدەنتى - ەلباسىنىڭ قورى ەرەكشە سىي – مەملەكەت باسشىسى پايدالانعان ۇكىمەتتىك ءاۆتوموبيلدى تارتۋ ەتتى.

ق ر تۇڭعىش پرەزيدەنتى - ەلباسى قورىنىڭ اتقارۋشى ديرەكتورى قانات جۇمابايەۆ: «ءبىز بۇگىن تاريحي ءمانى بار ۇلكەن وقيعاعا كۋا بولۋدامىز. بۇل كۇن بارلىق قازاقستاندىقتار ءۇشىن ەلەۋلى بولىپ تابىلادى، ويتكەنى ەلباسى نۇرسۇلتان ءابىش ۇلى نازاربايەۆ  –  قارقىندى الەۋمەتتىك-ەكونوميكالىق جانە ساياسي دامۋى بار مەملەكەتتىڭ بىرەگەي ۇلگىسىن جاساعان زامانىمىزدىڭ تانىمال مەملەكەتتىك جانە ساياسي قايراتكەرى. ەلباسى سەكىلدى تاريحي تۇلعا ءبىزدىڭ جاستارىمىز تەڭەلۋگە تىرىسىپ،  وزدەرى ءۇشىن دۇرىس باعدار بەلگىلەۋى، ەلىكتەۋ ءۇشىن ايشىقتى ۇلگى بولىپ تابىلادى، ال ونىڭ يدەيالارى مەن ەڭبەگىنىڭ جەمىسى حالىق يگىلىگىنە اينالۋعا ءتيىس»، - اتاپ ءوتتى.