الماتى مەملەكەتتىك بيزنەس كوللەدجىنىڭ اكت زالىندا ەلباسى ن.نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىنا وراي مەرەكەلىك ءىس-شارا ءوتتى، دەپ جازادى Qamshy.kz اقپارات اگەنتتىگى. 

مەرەكەلىك كونسەرتكە ءانشى، سازگەر مارات وماروۆ، جازۋشى، ديداحمەت ءاشىمحان ۇلى اتىنداعى ادەبي بىرلەستىكتىڭ ءتوراعاسى نۇرداۋلەت اقىش جانە تاعى باسقا قوناقتار قاتىستى. كەش مارات وماروۆتىڭ «ارۋ قالا – استانا» انىمەن اشىلدى. ءانشى بۇل ءاندى قىزى بيبىمارياممەن بىرگە ورىندادى. بۇكىل قازاقستانعا تانىمال ونەر قايراتكەرىنە ستۋدەنتتەر دۋ قول شاپالاقتاپ قوشەمەت كورسەتتى.

مارات وماروۆ تەك ءان ايتۋمەن شەكتەلمەي، كوللەدج باسشىلىعىنا، ونىڭ ديرەكتورى گۇلفايرۋز قاسىموۆاعا وسىنداي كەش ۇيىمداستىرىپ جاتقانى ءۇشىن العىس ايتىپ، اقجارما تىلەك ارنادى. «گۇلفايرۋز قابدەن قىزى تالاي مادەني ءىس-شارالاردىڭ باسى-قاسىندا جۇرگەن كىسى. استانا قالاسى ەندى اياعىنان ەندى تۇرىپ جاتقان شاقتا، سول قالانىڭ مادەني جۇمىستارىنا مۇرىندىق بولىپ، قانشا ىرگەلى جۇمىستار اتقاردى. مىنە، ەندى وسى كىسىنىڭ ارقاسىندا يگى جۇمىستار الماتىدا جالعاسىن تاۋىپ وتىر. گۇلفايرۋز حانىم ەلىمىزدىڭ رۋحاني جاڭعىرۋىنا ون بەس-جيىرما جىلدان بەرى قىزمەت ەتىپ كەلەدى» دەدى ول.

بۇل مەرەكەلىك ءىس-شارانىڭ باستى ەرەكشەلىگى – ونى اتالعان وقۋ ورنىنىڭ جاس ماماندارى ۇيىمداستىردى. مىسالى، كونسەرتتى كوللەدج وقىتۋشىلارى اينۇر تاسۋبايەۆا مەن ايدار كۇنتۋباي جۇرگىزسە، باسقا وقىتۋشىلار ەلباسىنىڭ ماقالاسىنا وراي وزدەرىنىڭ باياندامالارىن وقىدى، جاس مامانداردىڭ ءبىر توبى ساحنادا ءان ايتىپ، بي بيلەدى.

كەش بارىسىندا ءسوز العان جازۋشى، ديداحمەت ءاشىمحان ۇلى اتىنداعى ادەبي بىرلەستىكتىڭ ءتوراعاسى نۇرداۋلەت اقىش رۋحاني جاڭعىرۋدا كىتاپ وقۋدىڭ پايداسى زور ەكەنى تۋرالى ايتتى. «كىتاپ وقۋ ءبىزدى رۋحاني بايىتاتىن نەگىزگى قۇرال. سەبەبى كىتاپ ءبىزدى بابالامىز قالدىرىپ كەتكەن مۇرالارمەن ساباقتاستىرادى. سوندىقتان، جاستاردى اركەز كىتاپ وقۋعا باۋلۋىمىز كەرەك» دەدى جازۋشى.

مەرەكەلىك ءىس-شارانى الماتى مەملەكەتتىك بيزنەس كوللەدجىنىڭ ديرەكتورى گۇلفايرۋز قاسىموۆا قورىتىندىلادى. ول كەشكە قاتىسقان بارلىق قوناقتارعا العىسىن ءبىلدىرىپ، ولارعا وقۋ ورنىنىڭ اتىنان ازداعان تارتۋ-تارالعى جاسادى.

جاسۇلان ناۋرىزالييەۆ