بۇگىن ءماجىلىس ءتوراعاسى نۇرلان نىعماتۋلين فينليانديانىڭ قازاقستانداعى توتەنشە جانە وكىلەتتى ەلشىسى ميككو كيۆيكوسكيدى قابىلدادى، دەپ جازادى Qamshy.kz اقپارات اگەنتتىگى.

تاراپتار ەكىجاقتى قارىم-قاتىناستى، سونىڭ ىشىندە، پارلامەنتارالىق ىنتىماقتاستىقتى نىعايتۋدىڭ وزەكتى ماسەلەلەرىن تالقىلادى.

ءماجىلىس سپيكەرى ەلشىنى جاڭا قىزمەتكە تاعايىندالۋىمەن قۇتتىقتاپ، ەندى بىرنەشە كۇننەن كەيىن ءسۋوميدىڭ 100 جىلدىق مەرەيتويى اتالىپ وتىلەتىندىگىن العا تارتا كەلە، فين حالقىنا گۇلدەنۋ مەن باق-بەرەكە تىلەدى. سونىمەن بىرگە، وسى جىلى ەكى ەل اراسىندا ديپلوماتيالىق قارىم-قاتىناستىڭ ورناعانىنا 25 جىل تولدى. سپيكەر اتاپ وتكەندەي، فينليانديا سولتۇستىك ەۋروپا ەلدەرىنىڭ ىشىندە العاشقىلاردىڭ ءبىرى بولىپ، قازاقستاننىڭ تاۋەلسىزدىگىن مويىندادى. وسى ۋاقىتتار ىشىندە قوس مەملەكەت باسشىلارىنىڭ ساليقالى ساياساتىنىڭ ارقاسىندا قازاقستان مەن فينليانديا ورتالىق ازيا مەن سولتۇستىك ەۋروپاداعى ستراتەگيالىق ارىپتەستەرگە اينالدى. 

ءماجىلىس سپيكەرىنىڭ پىكىرىنشە، اتالعان مەملەكەت بارلىق دەڭگەيدە سىندارلى ءۇنقاتىسۋعا قول جەتكىزگەن قازاقستاننىڭ سىرتقى ساياسي جانە ەكونوميكالىق ارىپتەسى.

ءوز كەزەگىندە ەلشى مىرزا قازاقستاننىڭ تابىستارىنا وتە جوعارى باعا بەرىپ، ءبىزدىڭ ەلىمىزدىڭ ەكونوميكالىق سالاداعى تاجىريبەسى الەمدەگى ءبىرقاتار ەلدەرگە ۇلگى ەكەنىن جەتكىزدى.

تاراپتار قازاقستاندا وتكەن ەكسپو حالىقارالىق كورمەسىنە ايرىقشا نازار اۋدارىپ، بۇل ەكى ەلدىڭ بايلانىسىنا جاڭا سەرپىن بەرەتىندىگىنە توقتالدى.