ءتورت بالانىڭ اناسى ءقازىر اقتوبەدەگى داعدارىس ورتالىعىندا تۇرىپ جاتىر. قاتتى قينالعانىن ايتقان كەلىنشەك ءتارتىپ ساقشىلارىنان كومەك سۇراعان. بۇل تۋرالى aktobenews.kz جازادى.

«ايەلدى جەلىلىك پوليسيا قىزمەتكەرلەرى الىپ كەلدى. ءتورت بالاسى بار ەكەن. ەكى كۇن تەمىرجول ۆوكزالىندا تۇنەگەن. تەمىرجولداعى پوليسيا قىزمەتكەرلەرى كەلىنشەكتى ول جەردەن قۋىپ جىبەرگەن.  ايەل «باراتىن جەرىم جوق» دەپ قايتىپ كەلە بەرگەن. ۇلكەن بالاسى 6  سىنىپتا وقيدى، كىشىسى ءتورت ايلىق. ءقازىر بىزدە تۇرىپ جاتىر. جولداسى جۇدىرىق جۇمساعان سوڭ، كەتىپ قالعان. ايەل بالالارىمەن باراتىن جەر تاپپاي قينالعان»،—دەيدى «ماليكا» داعدارىس ورتالىعىنىڭ ديرەكتورى گۇلبادان داۋت.

اكىمدىكتىڭ قولداۋىمەن اشىلعان داعدارىس ورتالىعىندا تۇرمىستىق زورلىق كورگەن 20-عا جۋىق كەلىنشەك تۇرىپ جاتىر.

«بىزگە ەشقانداي جۇمىسى، قۇجاتى جوق كەلىنشەكتەر دە كەلەدى. ولاردىڭ بالالارىن بالاباقشاعا، وزدەرىن جۇمىسپەن قامتاماسىز ەتەمىز. ءبىزدىڭ جۇمىسىمىزعا اكىمدىك قىزمەتكەرلەرى كوپ قولداۋ كورسەتەدى»، — دەيدى گۇلبادان داۋت.