ءبىر جىلدان استام ۋاقىت تۇرمەدە وتىرعان قازاقستان جۋرناليستەر وداعىنىڭ ءتوراعاسى سەيىتقازى ماتايەۆ 4 جەلتوقساندا شارتتى جازامەن بوستاندىققا شىقتى. الماتى وبلىسى زارەچنىي اۋىلىنداعى جالپى قونىستانۋ كولونياسى الدىندا ماتايەۆتىڭ تۋىستارى، ارىپتەستەرى، جاقتاستارى مەن ب ا ق وكىلدەرى جينالدى. ول جۋرناليستەرگە جۇمىسقا كىرىسپەس بۇرىن، ۋاقىت قاجەت ەكەندىگىن ايتتى، دەپ Qamshy.kz اقپارات اگەنتتىگى ازاتتىققا سىلتەپ جازادى.
«مەندە اسا قۋانىش جوق. سەبەبى، ۇلىم تۇرمەدە وتىرعاندا، ءوزىمدى بوستاندىققا شىقتىم دەپ ەسەپتەمەيمىن. ءبىز كىنامىزدى مويىنداعان جوقپىز. بارلىق ايىپتاردى تەرىسكە شىعاردىق. ءبىزدىڭ ۇلىمىز ەكەۋمىزدىڭ رۋحىمىز بار. سول رۋحتىڭ ارقاسىندا بەرىك بولدىق. كەك الۋدى ويلامايمىن»، - دەدى سەيىتقازى ماتايەۆ.
قاپشاعاي قالاسىنىڭ سوتى 16 قاراشا كۇنى سەيىتقازى ماتايەۆتىڭ ءوزىن مەرزىمىنەن بۇرىن شارتتى جازامەن بوساتۋ تۋرالى ءوتىنىشىن قاراپ، ونى تۇرمەدەن بوساتۋعا شەشىم شىعارعان.
2016 جىلى 3 قازاندا استانانىڭ ەسىل اۋداندىق سوتى ماتايەۆتى "قارجى جىمقىردى" جانە سالىقتان جالتاردى" دەگەن ايىپتارمەن التى جىلعا، ال قازتاگ اگەنتتىگىنىڭ ديرەكتورى اسەت ماتايەۆ "قارجى جىمقىردى" دەگەن ايىپپەن بەس جىلعا سوتتاعان. ۇكىم بويىنشا ماتايەۆتار اقپارات جانە كوممۋنيكاسيا مينيسترلىگىنە - 169 ميلليون تەڭگە، "قازاقتەلەكوم" كومپانياسىنا 140 ميلليون تەڭگە قايتارۋى ءتيىس بولعان. ماتايەۆتار وزدەرىنە تاعىلعان ايىپتى مويىندامايدى. جەرگىلىكتى جانە حالىقارالىق قۇقىق قورعاۋ ۇيىمدارى ماتايەۆتىڭ سوتتالۋىن ايىپتاعان بولاتىن.
بيىل ءساۋىر ايىندا سەيىتقازى ماتايەۆتىڭ جازاسىن راقىمشىلىققا بايلانىستى ەكى جىل سەگىز ايعا قىسقارتقان.
