شىعىس قازاقستان وبلىسىنىڭ مەكتەپتەرىندە «قازاق حالقىنىڭ ءسالت-داستۇرى مەن ادەت-عۇرىپتارى» اتتى جاڭا فاكۋلتاتيۆتىك كۋرس ەنگىزىلەدى. ونى وسى جىلى بەسىنشى سىنىپ وقۋشىلارى وقيتىن بولادى. اتالعان كۋرس 2017-2018 وقۋ جىلىنىڭ ەكىنشى توقسانىندا باستالادى. فاكۋلتاتيۆتىك كۋرس 17 ساعاتتان تۇرادى جانە ونى سىنىپ ساعاتىنىڭ ەسەبىنەن سىنىپ جەتەكشىلەر جۇرگىزەدى.

جوبانى ماقساتى – تۋعان ولكەنىڭ تاريحى، مادەنيەتى مەن داستۇرلەرىن تەرەڭ زەرتتەۋ. وتكەن وقۋ جىلىنىڭ ەكىنشى جارتىسىندا بۇل كۋرس وبلىستاعى توعىز مەكتەپتە سىناقتان ءوتتى. وسكەمەندە فاكۋلتاتيۆتى مۇحتار اۋەزوۆ اتىنداعى №17 ورتا مەكتەپتە، قۇماش نۇرعالييەۆ اتىنداعى №43 مەكتەپ-ليسەيدە سىناقتان وتكىزدى. سىنىپ ساعاتتارىندا وقۋشىلار توپقا ءبولىنۋ ارقىلى قازاقتىڭ ادەت-عۇرپىن زەرتتەپ، ءارتۇرلى رولدەردى ءبولىسىپ الىپ، ءارتۇرلى ءسالت-داستۇردى كورسەتتى جانە پلاكاتتار جاساپ، سىنىپ الدىندا قورعادى.

تۋعان جەردىڭ تاريحى مەن مادەنيەتىنە ەش بايلانىسى جوق ماتەماتيكا، اعىلشىن ءتىلى جانە باسقا دا ءپان مۇعالىمدەرى ءۇشىن بۇل تاپسىرما قيىنعا سوقپاي ما؟

جوبانىڭ سپيكەرى، شقو ءبىلىم باسقارماسىنىڭ «شىعىس» ايماقتىق ورتالىعى باسشىسىنىڭ ورىنباسارى اركاديي يسايەۆقا وسى سۇراقتاردى قويدىق.

اركاديي اناتوليەۆيچ:

– بىلتىر وبلىستاعى توعىز مەكتەپتە كۋرستىڭ سىناقتان ءوتىپ جاتقان كەزدە ءبىز سىنىپ جەتەكشىلەرىن دە قوسىمشا ءپاندى قالاي جۇرگىزۋ كەرەك ەكەندىگىن ۇيرەتتىك. بۇل كۋرستى جۇرگىزۋ ءۇشىن ەكى وقۋ باعدارلاماسى دايىندالدى. ونىڭ ءبىرىن پروفەسسور جىلقىبايەۆا باسشىلىق ەتكەن س.امانجولوۆ اتىنداعى شقمۋ-داعى عالىمدار توبى دايىنداسا، ەكىنشىسى «ءسيتۋاتيۆتى قازاق ءتىلى» دەگەن اتاۋمەن اۋىل شارۋاشىلىعى عىلىمدارىنىڭ كانديداتى تاسىبەكوۆتىڭ باسشىلىعىمەن دايىندالدى. 2017-2018 وقۋ جىلىنىڭ ەكىنشى جارتىجىلدىعىندا ءبىز سىنىپ ساعاتتارىنىڭ ادىستەمەلىك ازىرلەمەلەرىنىڭ كونكۋرسىن وتكىزگەلى وتىرمىز. سونىڭ قورىتىندىسى بويىنشا ادىستەمەلىك قۇرال شىعارامىز، – دەيدى.

يرينا پلوتنيكوۆا

فاكۋلتاتيۆتىك كۋرس «رۋحاني جاڭعىرۋ» قوعامدىق سانانى جاڭعىرتۋ باعدارلاماسىنىڭ اياسىندا باستاۋ العان «تۋعان ولكەتانۋ تاريحى» جوباسى اياسىندا ەنگىزىلدى.