الماتىدا باس شىرشا 18 جەلتوقساندا تاۋەلسىزدىك كۇنىنەن كەيىن جاعىلاتىن بولدى.    

«قالانى جاڭاجىلدىق ارلەۋدە ۇلتتىق ناقىشتاعى ەلەمەنتتەر قولدانىلادى»، - دەيدى الماتى قالاسى اكىمدىگىنىڭ باسپا ءسوز قىزمەتى.

قالالىق اكىمدىكتىڭ باسپا ءسوز قىزمەتىندە حابارلاعانداي، الماتى قالاسىن جاڭاجىلدىق بەزەندىرۋ جۇمىستارى قازاقستان رەسپۋبليكاسى تاۋەلسىزدىگى كۇنىنەن سوڭ 18 جەلتوقساندا باستالادى. جاڭاجىلدىق باس شىرشا 18 جەلتوقساندا جاعىلادى. وتكەن جىلداعى بەزەندىرۋ بۇيىمدارى بيىل دا قولدانىلاتىن بولادى. الايدا قالا تۇرعىندارى اراسىندا ۇرلاۋ، توناۋ ءجيى كەزدەسەدى. شىرشاداعى ويىنشىقتار، شاعىن ارحيتەكتۋرالىق پىشىندەردى، كونسترۋكسيالاردى بۇزۋ، سىندىرۋ ءجيى كەزدەسەدى.سوندىقتان كوپتەگەن بۇيىمدار جارامسىز بولىپ قالادى.

ءداستۇر بويىنشا جاڭاجىلدىق بەزەندىرۋگە كاسىپورىندار اراسىندا بايقاۋ جۇرگىزىلەدى. بايقاۋعا كاسىپورىندار، مەكتەپتەر، جوو، اۋرۋحانالار قاتىساتىن بولادى.

ايتا كەتەر بولساق، ق ر تاۋەلسىزدىگى كۇنى قارساڭىندا 15 جەلتوقساندا رەسپۋبليكا سارايىندا اباي اتىنداعى مەملەكەتتىك اكادەميالىق وپەرا جانە بالەت تەاترىندا مەرەكەلىك كونسەرتتەر وتەدى.

16 جەلتوقساندا ن.تىلەندييەۆ اتىنداعى مەموريالدىق مۋزەيدە اشىق ەسىك كۇندەرى ۇيىمداستىرىلادى.

وسى كۇنى الماتى مۋزەيىندە «الماتى - تاۋەلسىزدىكتىڭ التىن بەسىگى» كورمەسى وتەدى.

باستى مەيرام 16 جەلتوقسان كۇنى استانا الاڭىندا مەرەكەلىك وتشاشۋمەن اياقتالادى.

سونىمەن قاتار، مەرەكە قارساڭىندا «الماتى جاستارى» باعدارلاماسى بويىنشا جاستارعا باسپانا كىلتى تابىستالادى. 

16-17 جەلتوقساندا «تاۋەلسىزدىك» مونۋمەنتى مەن «تاۋەلسىزدىك تاڭى» مونۋمەنتىنە گۇل شوقتارىن قويۋ ءراسىمى وتەدى.

سونىمەن قاتار، الماتىدا قوس مەرەكە الدىنداعى بەزەندىرۋ جۇمىستارىنا 175 ملن تەڭگە جۇمسالادى.

بيىل قالالىق مادەنيەت جانە ارحيۆ باسقارماسىنا ق ر تاۋەلسىزدىگى كۇنى جانە جاڭا جىل مەرەكەسى الدىنداعى بەزەندىرۋ جۇمىستارىنا 175 ملن تەڭگە ءبولىنىپ وتىر. بىلتىر بۇل سوما 215 ملن تەڭگەنى قۇراعان بولاتىن.  

«بيىل تەك باستى كوشەلەر عانا ەمەس، 8 اۋدانداعى كوشەلەردىڭ بارلىعى ارلەنەدى. قالاداعى ۇزىندىعى 260 كم بولاتىن بارلىق كوپىرلەر مەن جول ايىرىقتارىندا گيرلياندالار، يلليۋميناسيالار، بارلىعى 6800 ەلەمەنت ىلىنەدى، سونداي-اق شاعىن ارحيتەكتۋرالىق مۇسىندەر مەن كرونشتەيندەر ورناتىلادى. بۇلاردىڭ بارلىعى كەلەسى جىلى دا پايدالانىلاتىن بولادى. ودان بولەك ءار اۋداننىڭ اكىمدىكتەرى شىرشا ورناتىپ، بالالارعا مەرەكەلىك شارالار وتكىزەدى»، - دەدى قالالىق مادەنيەت باسقارماسىنان.

قالادا 18 جەلتوقساننان كەيىن رەسپۋبليكا سارايى، اباي اتىنداعى وپەرا جانە بالەت تەاترى، ق ر تۇڭعىش پرەزيدەنتى پاركى، الماتى ارەنا سارايى ماڭىندا 15 شىرشا ورناتىلادى.