الماتىدا كولىك رەفورماسى جانە قوعامدىق كولىك جۇيەسىن تۇراقتاندىرۋ اياسىندا جىلجىمالى سوستاۆتى جاڭالاۋ جۇمىستارى جۇرۋدە. جۇمىس ساپارى بارىسىندا الماتى اكىمى باۋىرجان بايبەك №70 باعىتى بويىنشا قىزمەت كورسەتۋدى باستاعان جاڭا اۆتوبۋستاردى قاراپ شىقتى.

قالانىڭ جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ماقسۇت يساحوۆ جەكە تاسىمالداۋشىنىڭ №70 باعىتى بويىنشا جەتكىلىكتى قوزعالمالى سوستاۆى بولماۋى سالدارىنان جولاۋشىلار تاراپىنان كوپ شاعىمدار تۇسكەنىن ايتتى.

«باعىت وتە قاجەت، ويتكەنى «كوكجيەك» ىقشام اۋدانىنان باستالىپ، قالانىڭ ورتالىعىن باسىپ ءوتىپ، «تاۋلى قىرات» ەلدى مەكەنىندە سوڭعى ايالداماسىن جاسايدى. قاجەتتى اۆتوبۋستار ءبولۋ ارقىلى بۇل باعىتقا «الماتىەلەكتروترانس» ج ش س قىزمەت كورسەتۋى ءتيىس دەگەن شەشىم قابىلداندى. بۇلار- كونديسيونەرلەرمەن، پاندۋستارمەن، ۆيدەوباقىلاۋمەن جابدىقتالعان ءارى ەكلوگيالىق ەۆرو-5 سىنىبىنداعى 12 مەترلى تومەن ەدەندى اۆتوبۋستار. ەندى جولاۋشىلار لەگى ارتادى دەگەن سەنىمدەمىز، - دەدى م.يساحوۆ.

ەستەرىڭىزگە سالساق، بۇرىن №86، 65، 103، 50، 126، 112 باعىتتارى بويىنشا جاڭا اۆتوبۋستار جولعا شىققان بولاتىن، №77 باعىتى قايتا اشىلدى.

جالپى، بيىلعى جىلى الماتىدا 388 اۆتوبۋس الۋعا قارجى بولىنگەن ەدى، ولاردىڭ 165 – ءى ءتۇرلى باعىتتار بويىنشا قىزمەت كورسەتۋدە، قالعان 223 –ءى جىل اياعىنا دەيىن ىسكە قوسىلادى.

كولىك رەفورماسى اياسىندا جەكە تاسىمالداۋشىلار دا 254 جاڭا اۆتوبۋس ساتىپ الدى، ولاردىڭ 79-ى باعىتتار بويىنشا جۇرۋدە. جىل اياعىنا دەيىن تاعى 32 اۆتوبۋس جولعا شىعادى، قالعان جاڭا 163 اۆتوبۋس 2018 جىلدىڭ ءبىرىنشى توقسانىندا كەلەدى.