ەلباسىمىزدىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا مەدەۋ اۋدانىنىڭ اكىمى ەرجان جىلقىبايەۆتىڭ «ۇرپاقتار ساباقتاستىعى» باستاماسىمەن وتكەن تاعى ءبىر تاماشا كەش №125 بوبەكجاي-بالاباقشا شاڭىراعىندا ءوتتى. اشىلعانىنا ەكى جىل ۋاقىت بولعان بالاباقشانىڭ تاريحى دا كەرەمەت. 2015 جىلى تۇڭعىش پرەزيدەنت كۇنىنە تارتۋ رەتىندە اشىلعان بالاباقشانىڭ بۇل كۇن ءارى تۋعان كۇنى ىسپەتتى. ەلباسىمىز ن.نازاربايەۆتىڭ قاتىسۋىمەن اشىلعان بالاباقشا ءۇش جارىم مىڭ شارشى مەتر اۋماقتى الىپ جاتىر.

مەملەكەتتىك جەكەمەنشىك ارىپتەستىكتى دامىتۋ باعدارلاماسى اياسىندا سالىنعان بالاباقشا 216 ورىندى. ءدال ءقازىر 9 توپتاعى بۇلدىرشىندەر مەملەكەتتىك ستاندارتقا ساي مەكتەپكە دەيىنگى تاربيە مەن ءبىلىمدى يگەرۋ ۇستىندە. سونىمەن قاتار، مەملەكەتىمىزدىڭ جۇمىسپەن قامتۋ باعدارلاماسىن دا ورىنداپ وتىرعان بۇل بالاباقشا 3–6 جاس ارالىعىنداعى بالالاردى ورىنمەن دە قامتىپ وتىر. ەلىمىزدىڭ بارلىق بۇلدىرشىندەرى سياقتى №125 بالاباقشانىڭ كىشكەنتاي بالاقايلارى «ەلباسىمەن ەل باقىتتى» دەپ اتالاتىن مەرەكەلىك ءىس-شارا وتكىزدى.

«ەلباسىمىز» دەپ اتالاتىن انمەن باستالعان كەش مازمۇنى تاۋەلسىز قازاقستاننىڭ بۇگىنگى بەيبىت ءومىرى مەن تىنىس-تىرشىلىگىنە ارنالدى. بالاباقشانىڭ قوناقجاي شاڭىراعىنا قازاقستاننىڭ ەڭبەك ەرى، الماتى قالاسىنىڭ قۇرمەتتى ازاماتى اياگۇل ميرازوۆا، قوعام جانە مەملەكەت قايراتكەرى ءشامشا بەركىمبايەۆا، قالالىق ءماسليحات دەپۋتاتى، «Koktem Group LTD» باس ديرەكتورى مۇرات ءادىلحان ۇلى، اكتەر نۇرلان ءالىمجانوۆ، مەدەۋ اۋدانى اكىمىنىڭ ورىنباسارى عاني مايلىبايەۆ ارنايى كەلىپ قاتىستى.

– مەن بالاباقشاعا بارماعالى ءبىراز ۋاقىت بولىپ ەدى. كەڭ ءارى جارىق، بۇگىنگى تالاپقا تولىعىمەن ساي كەلگەن ءارى ەلىن سۇيگەن، پاتريوت ازاماتتىڭ ەڭبەگىمەن سالىنعان عيماراتتىڭ يگىلىگىن كورىپ جاتقان بۇلدىرشىندەرگە قاراپ شەكسىز ريزا بولىپ وتىرمىن. ارينە، مۇنداي يگىلىكتى ءىستىڭ ءبارى ەلباسىمىز نۇرسۇلتان ءابىش ۇلىنىڭ تىكەلەي باستاماسىمەن جۇزەگە اسىپ جاتقانى انىق، – دەيدى ءشامشا بەركىمبايەۆا.

كۇنى ەرتەڭ سەندەر دە مۇرات ءادىلحان ۇلى اعالارىڭ سياقتى ەل ومىرىنە ارالاسىپ، وسىنداي ءزاۋلىم عيماراتتار تۇرعىزىپ، ءوز وتاندارىڭا، ءوز قالالارىڭا تارتۋ ەتەتىندىكتەرىڭە مەن سەنىمدىمىن، – دەگەن اياگۇل تورە قىزى بۇلدىرشىندەردىڭ باقىتتى مەكەنىنە تارتۋ رەتىندە اكەلگەن ويىنشىقتارىن تابىس ەتتى.  بۇلدىرشىندەردىڭ ەسىندە ەلباسى بەينەسىمەن ساقتالىپ قالعان نۇرلان ءالىمجانوۆتى بالاقايلار زور قوشەمەتپەن قارسى الىپ، اعالارىنا بىرنەشە ءان ايتقىزدى.

بالاباقشانىڭ كىشكەنتاي ونەرپازدارى «بالا سۇلتاننىڭ بالالىق شاعى» اتتى شاعىن قويىلىمدى ساحنالادى. انمەن ءورىلىپ، كۇيمەن كومكەرىلگەن كەش كوپشىلىكتىڭ كوڭىلىنەن شىقتى. كەش سوڭىنان اتا-انالار ريزاشىلىقتارىن ءبىلدىرىپ، بالاباقشا مەڭگەرۋشىسى ارايلىم قازبەك قىزى مەن ونىڭ ۇجىمىنا شىعارماشىلىق تابىس تىلەدى.