مارجان تۇرلىبايەۆا... بۇل ەسىمدى بۇگىندە ءبىرى بىلسە، ءبىرى بىلمەس. اقىل-ەسى دۇرىس بولسا دا، ءومىرىنىڭ سەگىز جىلىن جىندىحانادا وتكىزگەن بويجەتكەن. بىرنەشە جىل بۇرىن مارجاننىڭ تاعدىرى بۇكىل الەۋمەتتىك جەلىدە دە، جاڭالىقتاردا دا ايتىلعان بولاتىن. سول كەزدەن باستاپ مارجاننىڭ تاعدىرىنا، ومىرىنە الاڭداعان، كوڭىل بولگەن، جاناشىرلىق تانىتىپ، تىلەۋلەس بولعان حالىقتىڭ قاراسى كوپ ەدى. ونىڭ ىشىندە باسىم كوپشىلىگى ەلىمىزدىڭ جارىق جۇلدىزدارى.
مارجان جىندىحانادا جاتقان كەزىندە حالىقتان كومەك سۇراپ حات جازعان بولاتىن.
«شالقىپ جۇرسىڭدەر، ادامدار. مىنا جاقتا 8 جىل ەمەس، 8 ساعات وتىرا الماس ەدىڭدەر. وڭكەي اقىلى اۋىسقان ادامداردىڭ ورتاسىندا. ادامدار وزدەرىڭىزدى مەنىڭ ورىنىما قويىپ كورىڭىزدەرشى، تۋعاننان شەشەلەرىڭ تاستاپ كەتەدى، انانىڭ جىلۋىن سەزبەي، جەتىمxانادا جىلاپ ءوستىم، ءسويتىپ جۇرگەندە ون جاسىمدا ءبىر ايەل كەپ «اناڭمىن» دەپ اكەتىپ، ۇيىنە اپارىپ كورسەتپەگەندى كورسەتەدى، اقىرى مەنەن قۇتىلۋ ءۇشىن جىندىxاناعا جاۋىپ تىندى. ءتىرى اكەمدى «اكەڭ جىندىxانادا ولگەن، سەن دە سويتەسىڭ» دەدى. اكەم ءتىرى بولسا، ءولدى دەگەن انىقتاما جاساتقان با؟ ول دا ساتىلا ما؟ ماسقارا. مەنىڭ قازىرگى دارەتحاناعا تاستالىپ جاتقان بالادان ەش ايىرماشىلىعىم جوق قوي سوندا. ول ايەل مەنى شىعارماس ءۇشىن جىلاسا دا سىقتاسا دا، ءبارىن ىستەپ جۇرگەن بولار، ونى جاقسى بىلەم. سوندا انا جۇرەگى جىلىماسا دا، ار الدىندا وز-وزىنەن ۇيالماي ما؟ قۇدايدان قورىقپاي ما؟ ون توعىز جىلىم وسىنداي ازاپپەن ءوتتى. التى-اق سىنىپ ءبىلىمىم بار، ماعان ءالى اتتەستات الۋ كەرەك، وقۋ كەرەك، تۇرمىس قۇرۋ كەرەك. ۋاقىت دەگەن زۋلاپ ءوتىپ جاتىر. ال شىمكەنتتەگى «ارتىن» ويلاعاندار بىر-بىرىنە سىلتەپ، ءىستى جۇرگىزۋگە، مەنى بوساتۋعا اسىعار ەمەس! وتىنەم سىزدەردەن، وسى ءىس ءادىل شەشىمىن تابۋ ءۇشىن قوعام بولىپ كومەكتەسىڭىزدەرشى» دەپ حالىقتان كومەك سۇراعان بولاتىن. بۇل جازبا بۇكىل قازاق بالاسىنىڭ جۇرەگىنە پىشاق سۇعىپ العانداي بولعان ەدى.
2016 جىلدىڭ مامىر ايىندا مارجان ءوزىنىڭ اقىل ەسىنىڭ دۇرىس ەكەنىن دالەلدەپ شىققان بولاتىن.سول كەزدە مارجاننىڭ قۋانىشىنا قۋانباعان ادام بولماعان شىعارس ءسىرا؟
بۇرىندارى بۇكىل ب ا ق بەتىن شۋلاتقان مارجاننىڭ ەسىمىن ءقازىر ەستىمەيتىن بولدىق. بۇگىنگى قال-جاعدايى قانداي، سوڭعى جىلدارداعى ءومىرى قالاي وزگەردى، وسى جانە وزگە دە سۇراقتاردىڭ جاۋابىن ءبىلۋ ءۇشىن Qamshy.kz اقپارات اگەنتتىگىنىڭ ءتىلشىسى مارجاننىڭ وزىمەن سۇحباتتاسقان ەدى.
- مارجان، ءسىزدىڭ جاعدايىڭىزعا الاڭداماعان قازاقستاندىق جوق شىعار؟ قازىرگى جاعدايىڭىز قالاي؟
اللاعا شۇكىر جاقسى. كەشتە بولسا مەكتەپتە ءبىلىم الدىم. جوعارعى وقۋ ورنىنا ءتۇستىم.
ءومىرىڭىزدىڭ سوڭعى جىلدارى قالاي وزگەردى؟
ءومىرىمنىڭ سوڭعى جىلدارىندا دا كوپ قيىنشىلىقتار بولدى. جىندىحانادان شىققاننان كەيىندە كوپتەگەن قيىنشىلىقتاردى باستان وتكەردىم. شىنى كەرەك جىندىحانادان شىققاننان كەيىن بارلىعى ارتتا قالادى دەپ ويلاپ ەدىم، ءبىراق ولاي ەمەس ەكەن. قازىرگى تاڭدا ءبىلىم الىپ جۇرگەنىم بولماسا، باسقا ەشقانداي وزگەرىس بولعان جوق.
العا قويعان ماقساتىڭىزبەن جوسپارىڭىز قانداي؟
مەنىڭ الداعى جوسپارىم اياققا تۇرىپ كەتۋ. ەل قاتارلى ءبىلىم الىپ، ءوز-وزىمدى جەتىلدىرسەم دەيمىن.
ارماندارىڭىز قانداي؟
مەن بالا كۇنىمنەن اكتريسا بولۋدى ارماندايتىنمىن. ال بۇگىندە جۋرناليست بولعىم كەلەدى. جۋرناليست بولعىم كەلەتىن سەبەبىم مەن جۋرناليستەر مەن حالىقتىڭ ارقاسىندا ەل قاتارىنا قوسىلدىم. ەكىنشى ارمانىم جاقسى جار كەزدەستىرىپ، وتباسىن قۇرۋ. جالپى ايتقاندا ەل قاتارلى جاقسى ءومىر سۇرگىم كەلەدى.
باسىڭنان قانشاما قيىنشىلىقتار ءوتتى. ال ءسىزدى العا جەتەلەپ، سۇيرەگەن نە نارسە؟
مەن سەگىز جىل جىندىحانادا تۇردىم، ءومىر ءسۇردىم. مەن سول كەزدە ءوز-وزىمدى قۇزعا لاقتىرا سالۋىما بولاتىن ەدى، ءبىراق مەنى ءبىر نارسە العا سۇيرەدى. نە نارسە العا سۇيرەگەنىن وزىمدە بىلمەيمىن. بالكىم ارمانىم شىعار، ءومىردى جاقسى كورۋىم شىعار. ادام بولىپ ومىرگە كەلدىم بە، ادام بولىپ ومىردەن وتكىم كەلدى.
ومىردەگى وكىنىشىڭىز نە؟
شىنى كەرەك مەنىڭ جيىرما جىلىمدا وكىنىشكە تولى. انام مەنى دۇنيەگە اكەلگەنىنىڭ ءوزى ءومىرىمدى قۇرتتى دەۋگە بولادى. بىرەسە بالالار ۇيىندە، بىرەسە جىندىحانادا بولدىم. اتا-انام قاتەلىك ىستەمەگەندە مەن مۇنداي ءومىر سۇرمەسپە ەدىم. جالعىزدىقتى كورمەسپە ەدىم، جەتىمنىڭ كۇيىن كەشپەسپەدىم دەپ ويلايمىن. مەن تاعدىردىڭ باسقا سالعانىنا كوندىم. ءبىراق مەنىڭ جانىمدى جەگىدەي جەيتىن ءبىر-اق نارسە، ول- جالعىزدىق. بۇل مەنىڭ تاعدىرىم. بار ءومىرىم الدا دەپ ءوز-وزىمدى جۇباتۋمەن كەلەمىن.
سۇحباتىڭىزعا راحمەت!
سۇحباتتاسقان: اقنۇر مۇحتارحان
