داريعا نازاربايەۆا الماتىداعى فۋرمانوۆ كوشەسى اتاۋىنىڭ وزگەرگەنىنە قاتىستى پىكىر ءبىلدىردى.

الماتى قالاسىنداعى فۋرمانوۆ كوشەسى نۇرسۇلتان نازاربايەۆ اتىنداعى داڭعىل بولىپ وزگەرتىلگەن بولاتىن. وسى ورايدا سەنات دەپۋتاتى داريعا نازاربايەۆا اتالعان ماسەلەگە قاتىستى ءوز پىكىرىن ايتتى.

«مەن بۇل تۋرالى جانا عانا ءبىلدىم. ماعان ءتۇرلى سەبەپتەرگە بايلانىستى سىزدەردىڭ سۇراقتارىڭىزعا وبەكتيۆتى جاۋاپ بەرۋ قيىن. ءبىراق ءوز ەلىن جاقسى كورەتىن ازامات رەتىندە جانە ونىڭ تاۋەلسىز 25 جىلدا جەتكەن جەتىستىگىن ماقتان تۇتاتىن ادام رەتىندە مەن اتالعان شەشىمدى دۇرىس دەپ سانايمىن. كوشباسشىمىز ۇلكەن قۇرمەتكە لايىقتى. ونىڭ ارقاسىندا ءومىرىمىز بەيبىت جانە تىنىش وتۋدە»، – دەدى ول سەنات وتىرىسىنان كەيىن جۋرناليستەرگە.

وسى ورايدا سەنات دەپۋتاتى ەلىمىزدىڭ 25 جىلدا قۋاتتى مەملەكەتكە اينالعانىن اتاپ ءوتتى.

«سوڭعى 10-15 جىلدا ەكونوميكامىز بەن ساياسي جۇيەمىز بارلىق قيىندىققا قارسى توتەپ بەردى. بۇل 25 جىلدا قۋاتتى دا تۇراقتى مەملەكەتتى قۇرا بىلگەنىمىزدى كورسەتەدى. ەلىمىز – وسى وڭىردەگى كوشباسشى مەملەكەت. سونداي-اق ءبىز پرەزيدەنتىمىزدىڭ الەمدە بەدەلىنىڭ جوعارى ەكەنىن بىلەمىز. ول يادرولىق قارۋعا قارسى جانە حالىقارالىق تەرروريزممەن كۇرەسۋ جونىندە عالامدىق ماڭىزى بار باستامالاردى كوتەردى»، – دەدى داريعا نازاربايەۆا.

سونىمەن قاتار ول ەلىمىزدىڭ الەمدەگى بەيبىتشىلىككە قوسقان ۇلەسىن جوعارى باعالادى.

«ءبىز – الەمدە يادرولىق قارۋدان ءوز ەركىمەن باس تارتقان العاشقى مەملەكەتپىز. سىزدەر استانانىڭ جانجالداسۋشى تاراپتارعا ءۇمىت بەرەتىن، كەزدەسۋ الاڭىنا اينالعانىن جاقسى بىلەسىزدەر. سونداي-اق حالىقارالىق جانە ءوڭىرارالىق دەڭگەيدەگى ماسەلەلەردى شەشۋگە ءوز ۇلەسىمىزدى قوسۋدامىز. ەگەر اتالعان جاعدايعا ءادىل ءارى وبەكتيۆتى باعا بەرەتىن بولساق، ەلباسى جوعارى قۇرمەتكە يە. ول تاريحتا قالاتىن ازامات»، – دەدى سەناتور ب ا ق وكىلدەرىنە.