ءيا، كەشەگى كۇن "ەلىم!"، — دەپ شىن ەمىرەنەر ءبىر قاۋىم ەلدىڭ تاعىلىم ۇيىندە باس قوسقان كۇنى بولدى. وسىدان 80 جىل بۇرىن ۇلت ۇستازى، كوسەمى احمەت بايتۇرسىن ۇلىنىڭ جازىقسىز، ناقاقتان اتىلعان
ازالى كۇنى ەدى. قازاق جۇرتىنىڭ، كەلەشەك ۇرپاعىنىڭ وزگەگە قىزىقپاي، ءوز جۇرتىنىڭ تاريحىنا ۇڭىلسە ەكەن دەگەن ەرلىك ىستەرى مەن ارمان-تىلەكتەرى ءۇشىن "حالىق جاۋى" اتانعان ۇلت جاناشىرلارىمىزدىڭ رۋحىنا ارناپ قۇران باعىشتاۋدى بورىشىمىز رەتىندە سانادىق.
وسى ورايدا ءال-فارابي اتىنداعى قازاق ۇلتتىق ۋنيۆەرسيتەتى فيلولوگيا جانە الەم تىلدەرى فاكۋلتەتى، «لينگۆوارنا» عىلىمي-زەرتتەۋ جانە وقۋ ادىستەمەلىك ورتالىعى، «ايارۋ» رۋحاني-تانىمدىق قىزدار ورتالىعى جانە احمەت بايتۇرسىن ۇلى مۋزەي-ۇيىنىڭ قولداۋىمەن «الاش مۇراسى: جاستار كوزىمەن» اتتى ءىس-شارا ءوتتى.
سونىمەن بىرگە قۇربان بولعان الاش ارىستارىنىڭ رۋحىنا ارنالعان تۇسكى اس بەرىلىپ، قۇران وقىتىلدى. قازۇۋ، قازۇتۋ جانە اۋ ستۋدەنتتەرى اراسىندا تانىمدىق باياندامالار مەن ولەڭدەر وقىلىپ، بىر-بىرىمەن وي ءبولىستى. شارا بارىسىندا وي سالارلىق، تاعىلىمدى سوزدەر ايتقان تورعايلىق قايدار بايدەبەك ۇلى مەن ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلولوگيا فاكۋلتەتىنىڭ اعا وقىتۋشىسى شورتانبيەۆ شوقان اعايىمىز ستۋدەنتتەردىڭ الاش مۇراسىنا قىزىعۋشىلىعىن ارتتىرا ءتۇستى. احمەت بايتۇرسىن ۇلىنىڭ جيەن نەمەرەسى ايمان بايسالوۆا اپامىزدىڭ كەلۋى دە جاستاردى قۋانتتى.
ارىستاردىڭ رۋحىنا بەرىلگەن استىڭ وتۋىنە سەبەپكەر الاشتىڭ شىن جاناشىرى رايحان ساحىبەك قىزى مەن عاني سماحان ۇلىنىڭ يگىلىكتى ىستەرى ەڭبەكتەگەن جاس پەن ەڭكەيگەن كارىگە دەيىن ۇلگى الارلىق باستاما. ستۋدەنتتەر اراسىندا وي-پىكىر ءبولىسۋ اياقتالعاننان سوڭ، استىڭ باستاماسى رەتىندە ورتالىق مەشىتتىڭ يمامى ازامات ايتمۇحامەت ۇلى كوشكىنبايەۆ قۇران وقىدى.
سونىمەن قاتار، قۇران باعىشتاپ، قول جايۋدى پارىز دەپ ءبىلىپ، جاستارعا تاعىلىمدى سوزدەرىمەن وي سالعان قوناقتارىمىز شالقار راديوسىنان باقىت جاعىپار، اقىن سەرىك قالييەۆ، تاريحشى-عالىم نۇرداۋلەت مانكەيەۆتىڭ ايتقان جىگەرلى سوزدەرى جان ازىعىن مولايتا ءتۇستى.
ەسىگىنىڭ الدىنداعى يتىنە دەيىن جامانداعان ادامدى جاۋ كورىپ، بەتتەن الىپ، توسكە شابار قازاقتىڭ قانى بار كەيبىر "بەدەلدىلەردىڭ" بۇل كۇندى ەلەمەك تۇگىلى، ەستەرىنە الۋعا "قىرۋار ماڭىزدى جۇمىستارىنان" قولدارى تيمەي جۇرگەندىگى ءبىزدىڭ جانىمىزعا باتادى. ءولى ريزا بولماي، ءتىرى بايىماس. وتكەنىمىزدى ۇمىتساق، كەلەشىگىمىزدىڭ دە باسىمىزعا سونداي كۇيدى سالىپ بەرمەسىنە كىم كەپىل؟! الاش ارىستارىنىڭ ەرلىكتەرىن ايعا تانىتپاساق تا، جەرگە تاپتاتپايىق، باۋىرلار!
قازۇۋ فيلولوگيا جانە الەم تىلدەرى فاكۋلتەتىنىڭ
3-كۋرس ستۋدەنتى سمان جانسايا
