الماتى قالاسى رەسپۋبليكا سارايىندا الماتى قالاسى اكىمدىگىنىڭ باستاماسىمەن استانانىڭ قالىپتاسۋى مەن دامۋىنا ۇلەس قوسقان لاۋرەاتتاردى «استانا – ارداعىم مەرەكەلىك سىيلىعىمەن ماراپتتاۋ ءراسىمى ءوتتى.
«استانا – ارداعىم» مەرەكەلىك سىيلىعىمەن الماتى قالاسىندا تۇرعان ءارى تۋىلعان جانە استانانىڭ قالىپتاسۋىنا ايتارلىقتاي ۇلەس قوسقان، پرەزيدەنتتىڭ استانانى كوشىرۋ تۋرالى شەشىمىنە بارىنشا قولداۋ كورسەتكەن قايراتكەرلەر ماراپاتتالدى.
«استانا – ارداعىم» سىيلىعى 20 كاتەگوريا بويىنشا بەرىلدى، ولار - ءبىلىم مەن عىلىم، ساۋلەت پەن قۇرىلىس، دەنساۋلىق ساقتاۋ، سپورت، ونەر، كينەماتوگرافيا، جۋرناليستيكا جانە ادەبيەت سالالارى.
«ەل ەڭسەسىن ەندى تىكتەگەن كەزەڭدە ەلباسى كوش باستاپ استاناعا بەت بۇرۋ تۋرالى شەشىمىنە كۇمانمەن قاراعاندار بولعانى بەلگىلى. جاسامپاز 20 جىلدا 1997 جىلعا 10 جەلتوقساننان باستاپ ەل ورتالىعىن رەسمي استاناعا كوشىرۋى اسقان كورەگەن شەشىم بولعانى راس. تەڭدەسسىز شەشىم الاتاۋدىڭ باۋرايىندا قابىلدانىپ، شاھارىمىزدىڭ باستى قارجى ەكونوميكالىق، عىلىم مەن ءبىلىم، سپورت ورتالىعى رەتىندە دامۋىنا جول اشتى. وسى قالادا ق ر تاۋەلسىزدىگى تۋرالى زاڭ، جاڭا ەلوردا تۋرالى تاريحي قاۋلى قابىلداندى. ەگىز ورىمدەي بولعان قوس قالاعا ەلباسىنىڭ قولداۋى ەرەكشە ەكەندىگى راس. وسىنداي قالامىزدىڭ دامۋىنا كۇش سالعان ازاماتتاردىڭ ەڭبەگىن اتاپ ءوتۋ دۇرىس دەپ ويلايمىن»، - دەدى الماتى قالاسىنىڭ اكىمى باۋىرجان بايبەك.
نومينانتتاردى ىرىكتەۋ كونكۋرستىق كوميسسيانىڭ سايتىندا اشىق داۋىس بەرۋ ارقىلى جۇزەگە استى.
- ءعىلىم-بىلىم سالاسىندا استانانىڭ دامۋىنا قوسقان ۇلەسى ءۇشىن - ق ر ورتالىق مەملەكەتتىك مۋزەيىنىڭ ديرەكتورى نۇرسان ءالىمباي؛
- دەنساۋلىق ساقتاۋ سالاسىندا استانانىڭ دامۋىنا قوسقان ۇلەسى ءۇشىن - №1 قالالىق پەرزەنتحانانىڭ باس دارىگەرى راقىشيەۆ ناۋرىزباي؛
- سپورت سالاسىنداعى استانانىڭ دامۋىنا قوسقان ۇلەسى ءۇشىن - بۇرىنعى تۋريزم جانە سپورت ءمينيسترى تەمىرحان دوسمۇحامبەتوۆ؛
- ءبىلىم بەرۋ سالاسىندا استانانىڭ دامۋىنا قوسقان ۇلەسى ءۇشىن - عالىم، جازۋشى مىرزاتاي جولداسبەكوۆ؛
- ادەبيەت سالاسىندا استانانىڭ دامۋىنا قوسقان ۇلەسى ءۇشىن - جازۋشى، جۋرناليست دۋمان رامازان مەن اقىن مارالتاي رايىمبەك ۇلى؛
- قۇرىلىس سالاسىندا استانانىڭ دامۋىنا قوسقان ۇلەسى ءۇشىن - «بازيس-ا» كورپوراسياسىنىڭ ديرەكتورى الەكساندر بەلوۆيچ پەن ينجەنەر-قۇرىلىسشى وسمان شاحانوۆ؛
- ونەر سالاسىندا استانانىڭ دامۋىنا قوسقان ۇلەسى ءۇشىن - ديزاينەر قۇرالاي ءنۇرقادىلوۆا مەن ءمۇسىنشى بولات دوسجانوۆ، ق ر كوركەمونەر اكادەمياسىنىڭ پرەزيدەنتى اماندوس اقانايەۆ؛
- ساۋلەت سالاسىندا استانانىڭ دامۋىنا قوسقان ۇلەسى ءۇشىن - ساۋلەتشى، ق ر ساۋلەتشىلەر اكادەمياسىنىڭ پرەزيدەنتى اقمىرزا رۇستەمبەكوۆ؛
- يننوۆاسيا سالاسىندا استانانىڭ دامۋىنا قوسقان ۇلەسى ءۇشىن - دارىگەر-ينفەكسيونيست قارلىعاش ابدييەۆا؛
- اقپارات سالاسىندا استانانىڭ دامۋىنا قوسقان ۇلەسى ءۇشىن - «ايقىن» گازەتىنىڭ باس رەداكتورى نۇرتورە ءجۇسىپ، فوتوگراف ماكسيم زولوتۋحين، 31-ارنانىڭ باس پروديۋسەرى نۇرجان مۇحامەدجانوۆا؛
- كينەماتوگرافيا سالاسىنداعى استانانىڭ دامۋىنا قوسقان ۇلەسى ءۇشىن - رەجيسسەر ەرمەك شىناربايەۆ، اكتەر ءادىل احمەتوۆ؛
- مۋزىكا سالاسىنداعى استانانىڭ دامۋىنا قوسقان ۇلەسى ءۇشىن كومپوزيتور مارات وماروۆ، ءانشى ناعيما ەسقالييەۆالار ماراپاتتالدى.
لاۋرەاتتاردىڭ بارلىعىنا 1 ملن تەڭگەدەن اقشالاي سىيلىق بەرىلدى.
«جاسىم 80-گە كەلگەندە ءوسىپ ونگەن، شاپاعاتىنا بولەنگەن، ءتالىمىن العان الماتىدا تالاي قاسيەتتى جيىن بولعان رەسپۋبليكا سارايىندا وسى سالتاناتتى كەشتە كەزدەسىپ جاتقانىمىزعا قۋانىشتىمىن. وسى زالدا ق ر تۇڭعىش پرەزيدەنتىنىڭ تاققا وتىرعان ءراسىمىن وتكىزگەن ەدىك. ول ماعان جۇكتەلگەن ەدى. استانادان ارنايى شاقىرىپ، سىيلىقپەن ماراپاتتاپ وتىرعان الماتى ءماسليحاتىنىڭ دەپۋتاتتارىنا، باۋىرجان ىنىمە العىس ايتامىن»، - دەدى پروفەسسور مىرزاتاي جولداسبەكوۆ.
ەسكە سالساق، كەلەر جىل قازاقستان استاناسى ءۇشىن مەرەيلى جىل. الماتىدا استانانىڭ 20 جىلدىعىن مەرەكەلەۋگە ارنالعان ءبىرقاتار اۋقىمدى مادەني شارالار-كونسەرتتەر، فەستيۆالدەر، كورمەلەر وتكىزۋ جوسپارلانعان.
