تۇركيا پرەزيدەنتى رەجەپ تايىپ ەردوعان ءيزرايلدى تەرروريستىك مەملەكەت دەپ اتادى. بۇل تۋرالى Hurriyet Daily News باسىلىمى حابارلادى، دەپ جازادى Qamshy.kz اقپارات اگەنتتىگى.

«يەرۋساليم – ءبىزدىڭ جارىق كوزىمىز. ونى ۇرلاۋ-توناۋ، باسقىنشىلىقپەن اينالىساتىن مەملەكەتتىڭ قاراماعىنا قالدىرمايمىز. زاڭ مەن دەموكراتيا اياسىندا سوڭىنا دەيىن كۇرەسەمىز»، - دەدى تۇرىك پرەزيدەنتى.

سونداي-اق ەردوعان پالەستينالىق نارازىلىق بىلدىرۋشىلەرگە قارسى كۇش قولدانعان ءيزرايلدى ايىپتاپ، «قانالعان» حالىقتى قاشان دا قولدايتىنىن جەتكىزدى.

 6 جەلتوقساندا اقش پرەزيدەنتى دونالد ترامپ يەرۋساليمدى ءيزرايلدىڭ استاناسى رەتىندە رەسمي مويىنداپ، اقش ەلشىلىگىنىڭ سول قالاعا كوشكەنىن مالىمدەگەن.

ترامپتىڭ اتالمىش شەشىمىنە گەرمانيا كانسلەرى انگەلا مەركەل، فرانسيا پرەزيدەنتى ەممانۋەل ماكرون جانە ۇلىبريتانيا پرەمەر-مينيسترى تەرەزا مەيدىڭ نارازىلىعىن تۋدىردى. ولار اق ءۇيدىڭ بۇل شەشىمىن قولدامايتىندارىن جەتكىزدى.

يەرۋساليمدە تارتىپسىزدىك ورنادى. اراب بەلسەندىلەرى مەن يزرايل پوليسەيلەرىنىڭ كوتەرىلىسىنەن ونداعان ادام زارداپ شەكتى.

تۇركيا، تۋنيس، اۋعانستان، پاكىستان، ەگيپەت، ليۆان، يران جانە وزگە دە مەملەكەتتەر ترامپتىڭ شەشىمىنە قارسى شىقتى.

بۇۇ قاۋىپسىزدىك كەڭەسى دە اق ءۇيدىڭ يەرۋساليمگە قاتىستى شەشىمىنە قولداۋ تانىتپادى.

اراب مەملەكەتتەرىنىڭ ليگاسى ترامپتى شەشىمىنەن باس تارتۋعا شاقىرعان.