ءبىر جىلعا جۋىق ۋاقىت قوعامدا قىزۋ تالقىلانىپ، قولدانىستاعى قۇقىقتىق قۇجاتتارعا 300-گە جۋىق وزگەرتۋ ەنگىزىلگەن ب ا ق تۋرالى زاڭ بۇگىن پارلامەنت سەناتىنىڭ ەكىنشى وقىلىمىندا ماقۇلداندى. بۇل تۋرالى Qamshy.kz اقپارات اگەنتتىگى 24.kz-كە سىلتەمە بەرىپ  حابارلايدى.  جيىندا جاۋاپتى سالا باسشىسى جاڭاشىلدىقتاردى جان-جاقتى باياندادى.

ونىڭ ايتۋىنشا، زاڭ جوباسى ارقىلى تۇلعا مەن رەداكسيا اراسىنداعى دالەلسىز اقپاراتقا قاتىستى داۋ-دامايلاردى سوتقا دەيىن شەشۋ ءتارتىبى ازىرلەنگەن. سونداي-اق تەلەارنالار مۇمكىندىگى شەكتەۋلى ازاماتتار ءۇشىن سۋبتيتر مەن سۋردواۋدارمانى قولدانۋ قاجەتتىگى ەسكەرىلدى. اقپارات قۇرالدارىندا ازاماتتاردىڭ سۋرەتىن ولاردىڭ رۇقساتىنسىز جاريالاۋ مۇمكىندىگى دە پايدا بولدى. بۇل رەتتە تەك زارداپ شەككەن بالا تۋرالى جەكە مالىمەتتەر ونىڭ ءوزىنىڭ نەمەسە زاڭدى وكىلدەرىنىڭ كەلىسىمىنسىز قولدانىلماۋى قاجەت. ال بۇقارالىق اقپارات قۇرالدارى ءۇشىن مەملەكەتتىك ورگاننان رەسمي مالىمەت الۋ مەرزىمى قىسقارماق.

باقىتجان جۇماعۇلوۆ، ق ر پارلامەنتى سەناتىنىڭ دەپۋتاتى: - باق-تىڭ اۋىزشا جانە جازباشا سۇراۋ سالۋلارى بويىنشا ولارعا اقپارات بەرۋ پروسەسى رەتتەلگەن. ب ا ق پەن جۇمىستى جۇزەگە اسىرۋ جونىندەگى وكىلەتتى تۇلعالاردىڭ نەمەسە بولىمشەلەردىڭ فۋنكسيالارى العاش رەت زاڭنامالىق تۇرعىدان ناقتىلانعان.

داۋرەن ابايەۆ، ق ر اقپارات جانە كوممۋنيكاسيالار ءمينيسترى: - قورىتا ايتقاندا، زاڭ جوباسىندا 16 زاڭعا، 6 كودەكسكە 280-نەن استام وزگەرىس پەن تولىقتىرۋ ەنگىزۋ قاراستىرىلىپ وتىر. باسپا ب ا ق ءۇشىن تاعى ءبىر جەڭىلدىك گازەتتىڭ نەمەسە جۋرنالدىڭ وكىلەتتى ورگانعا وتكىزەتىن مىندەتتى داناسىن ەندى ەلەكتروندى تۇردە تاپسىرۋعا رۇقسات بەرىلمەك.