2016 جىلى تامىز ايىندا بالقاش قالاسىندا توپ بولىپ زورلاۋ ءىسى بويىنشا شىققان سوت ۇكىمى وزگەرتىلمەدى دەپ حابارلايدى جۇما كۇنى سوتقا سىلتەمە جاساعان جەرگىلىكتى اگەنتتىكتەر. بالقاش قالالىق سوتى قازان ايىندا بۇل ءىس بويىنشا جەرگىلىكتى ەكى تۇرعىندى كىنالى دەپ تانىپ، 12 جىلعا باس بوستاندىعىنان ايىرۋ جازاسىن كەسكەن، Qamshy.kz اقپارات اگەنتتىگى ازاتتىققا سۇيەنىپ جازادى. 

قاراعاندى وبلىستىق سوتىنىڭ حابارلاۋىنشا، اپەللياسيالىق القا سۋديالارى تاراپتاردىڭ ەشقايسىسىنىڭ تالاپتارىن قاناعاتتاندىرماۋ تۋرالى شەشىم شىعارعان. سوتتالۋشىلار اپەللياسيالىق شاعىمىندا ايىپتاۋ ۇكىمىن جويىپ، وزدەرىن اقتاۋدى سۇراعان. ال جابىرلەنۋشىنىڭ ادۆوكاتى سوتتالۋشىلارعا كەسىلگەن جازانى قاتاڭداتۋدى جانە ازاماتتىق شاعىمدى قاناعاتتاندىرۋ ءۇشىن العاشقى سوت ينستانسياسىنىڭ شەشىمىن قايتا قاراۋدى سۇراپ شاعىمدانعان بولاتىن.

«اپەللياسيالىق القا تاراپتاردىڭ شاعىمىن قاراپ، بالقاش قالالىق سوتىنىڭ ۇكىمىن وزگەرتۋدەن باس تارتتى» دەپ حابارلادى بالقاش قالالىق سوتىنىڭ باسپا ءسوز قىزمەتى.

جابىرلەنۋشىنىڭ ادۆوكاتى ايمان وماروۆا اپەللياسيالىق سوت شەشىمىنە قارسى جوعارعى سوتقا ارىزداناتىنىن ايتتى. ادۆوكاتتىڭ سوزىنشە، جابىرلەنۋشى بۇعان دەيىن سوتتالۋشىلاردان وزىنە 30 ميلليون تەڭگە كولەمىندە مورالدىق شىعىن تولەتۋ تۋرالى ازاماتتىق تالاپ-ارىزىن قايتا كوتەرمەك نيەتتە ەكەنىن ايتتى.

جابىرلەنۋشىنىڭ سوزىنە قاراعاندا، ەكى ەر ادام 2016 جىلى تامىزدا ءوزىن زيراتقا اپارىپ قورلاپ، ۇرىپ-سوققان. ول ءوزىن قورلاعانداردان ارەڭ دەگەندە قاشىپ شىعىپ، پوليسياعا ارىزدانعان. بۇل ءىس بويىنشا باستالعان تەرگەۋ اۋەلى جابىلىپ، كەيىن وقيعا باق-تا جاريالانعان سوڭ قايتا تەرگەلىپ، سوتقا جەتكەن. سوت بۇل ءىس بويىنشا كۋاگەر، جابىرلەنۋشىنىڭ تانىسىن سوتتالۋشىلار پايداسىنا جالعان كۋالىك بەردى دەپ تانىعان. سوت وعان راقىمشىلىق جاساپ، ەكى جارىم جىل مەرزىمگە شارتتى جازا تاعايىنداعان.