وسى جىل ساياسي ساحنادا دا، شوۋ-بيزنەس سالاسىندا دا جاڭالىقتارعا، جاڭا ەسىمدەرگە تولى بولدى. حالىقارالىق ارەنادا ءتۇرلى وزگەرىستەر ورىن الدى، ەل پرەزيدەنتتەرى اۋىستى، بۇرىن تانىلماي جۇرگەندەر اتاققا يە بولىپ، تالانتتاردى ەل مويىندادى.

Qamshy.kz اقپارات اگەنتتىگى 2017 جىلى تانىمالدىلىققا يە بولعان، حالىقتىڭ كوزىنە ءتۇسىپ، ەل ەلەۋلىسىنە اينالعان ادامداردىڭ ءتىزىمىن جاساپ كوردى.

دونالد ترامپ

2017 جىلدىڭ 20 قاڭتارىندا اقش تاريحىندا ساياسي جاڭالىق بولدى: 45-پرەزيدەنت بيلىككە كەلدى.

بۇرىندارى كوپشىلىك  دونالد ترامپتى امەريكالىق كاسىپكەر رەتىندە تانيتىن، ءتىپتى كەيبىرەۋلەر ونى مۇلدەم بىلمەيتىن دە ەدى. بۇگىندە حالىقارالىق جاڭالىقتاردىڭ تەڭ جارتىسى وسى تۇلعانىڭ فاميلياسىمەن تىعىز بايلانىستى.

بۇعان دەيىن ساياساتكەر، قوعام قايراتكەرى رەتىندە تانىمال بولعان ترامپ اقش تەلەراديو سالاسىندا اتاقتى تۇلعا، جازۋشى. سونىمەن قاتار اقش-تاعى ءىرى قۇرىلىس Trump Organization كومپانياسىنىڭ پرەزيدەنتى جانە الەم بويىنشا كازينو مەن قوناق ۇيلەرى بار Trump Entertainment Resorts كومپانياسىنىڭ نەگىزىن قالاۋشى. الايدا، 45-پرەزيدەنت اتانعاننان كەيىن عانا، بۇكىل الەم ونى تاني باستادى.

ەممانۋەل ماكرون

تاعى ءبىر حالىقارالىق كوكجيەكتەگى جاڭا ەسىم - ەممانۋەل ماكرون. فرانسيانىڭ بۇرىنعى ساياساتكەرى ە.ماكرون ەندى  فرانسيانىڭ 25-پرەزيدەنتى. «العا رەسپۋبليكا!» ساياسي پارتياسىنىڭ ليدەرى. 2017 جىلى وتكەن پرەزيدەنتتىك سايلاۋدا جەڭىسكە جەتىپ، فرانسيانىڭ ەڭ جاس پرەزيدەنتى اتاندى.

 لۋيس فونسي

وسى جىلدىڭ «حيت» انىنە اينالعان Despacito-نىڭ ورىنداۋشىسى لۋيس فونسي ماسكەۋگە كونسەرت بەرەتىنىن حابارلاعاندا ونىڭ تىڭدارماندارى بارلىق بيلەتتەردى ساناۋلى ساعاتتاردا ساتىپ العان ەكەن. ءبىراق، كەيىننەن تىڭدارماندار پۋەرتوريكولىق ءانشىنىڭ ءبىر جارىم ساعاتتىق كونسەرتىندە  Despacito ءانىن  عانا تىڭدايمىز با دەگەن ويعا كەلىپ، ءانشىنىڭ تاعى 9 البومى بار ەكەنىن بىلگەندە تاڭىرقاپ قالعان. شىن مانىندە، 2017 جىلى Youtube جەلىسىندە بەينەبايانى 4،5 ملرد كورىلىم جيناعان لۋيس ءفونسيدى وسى جىلى جۇلدىزى جارقىراپ، باعى جانعان ادام رەتىندە ايتۋعا بولادى.

ديماش قۇدايبەرگەن

قازاقستان مەن تمد ەلدەرىندە بۇرىندارى دا  تانىمالدىلىققا يە ديماش وسى جىلى قىتايعا عانا ەمەس، بارلىق الەمگە ەسىمىن ايگىلى ەتتى.   ديماش ۆيتەبسك قالاسىندا وتكەن XXIV حالىقارالىق ەسترادالىق ءان ورىنداۋشىلار «سلاۆيان بازارى-2015» بايقاۋىندا گران-پري جەڭىپ العان، «حالىق سۇيىكتىسى» ۇلتتىق سىيلىعىنىڭ لاۋرەاتى، «قازاقستان حالقىنىڭ بىرلىگىن نىعايتۋعا لايىقتى ۇلەس قوسقانى ءۇشىن» قازاقستان رەسپۋبليكاسىنىڭ پرەزيدەنتى قۇرمەت گراموتاسىمەن ماراپاتتالعان، «ABU TV song» حالىقارالىق فەستيۆالىنىڭ قاتىسۋشىسى. وسى جىلى قىتايدا وتكەن "I am a Singer" جوباسىندا ەكىنشى ورىن الدى.

 دانەليا تولەشوۆا

11 جاستاعى الماتىلىق دانەليا تولەشوۆا وسى جىلدىڭ ۇزدىك تالانتى دەگەن اتقا لايىقتى دەپ تانىلدى.  ول ۋكراينادا وتكەن «داۋىس.بالالار» جوباسىنىڭ جەڭىمپازى. تىم جاس بولۋىنا قاراماستان، قىزدىڭ داۋسى مەن ءان ايتۋ شەبەرلىگى، شىن مانىندە تاڭقالدىرارلىق.  «مەنىڭ ارمانىم—ءوز سالامنىڭ كاسىبي مامانى بولۋ»-دەيدى جەتكىنشەك.

ابزال مىرزاش

12 جاستاعى ۆۋندەركيند بالا ابزال مىرزاش ءقازىر قازاق-بريتان تەحنيكالىق ۋنيۆەرسيتەتىنىڭ ستۋدەنتى. جاقىندا اتالعان وقۋ ورنىنىڭ رەكتورى ابزالعا  تەگىن وقۋعا ارنالعان گرانت تابىستاعان. مەكتەپ باعدارلاماسىن بىرنەشە جىلدا ۇيرەنىپ شىققان ابزال بۇگىن 1-كۋرس ستۋدەنتى جانە جارقىن بولاشاعىنا دەگەن سەنىمى مول.

جۇلدىز ابدىكارىموۆا

جۇلدىز ابدىكارىموۆانىڭ اكتەرلىك شەبەرلىگى تۋرالى ءبىراز سىن دا، ءمىن دە، ماداقتاۋلاردا ايتىلدى. وسى ۋاقىتقا دەيىن وتباسىلىق ومىردەن قول ۇزبەي جۇرگەن جاس اكتريسا تەك 2017 جىلى عانا ءوز ونەرىن پاش ەتىپ، جۇلدىزى جارقىراپ شىعا كەلدى.

وسى جىلدى قورىتىندىلاي كەلە، جىل بارىسىندا تالانتىمەن، ەڭبەگىمەن، اقىل-بىلىمىمەن، ارەكەتتەرىمەن تانىلعان ەسىمدەردىڭ ءبىرسىپىراسىن قاراستىردىق. الداعى ۋاقىتتا دا بۇل ەسىمدەردىڭ  ءتىزىمى  تولىعا تۇسەدى دەگەن ءۇمىت بار.  ال ءسىز، وسى جىلى تانىلعان جاڭا ەسىمدەرگە كىمدەردى جاتقىزار ەدىڭىز؟

نازەركە مۇسا