قازاقستاندا كيبەرقىلمىسقا قارسى ءىس-قيمىل دەپارتامەنتى ازاماتتاردى ونلاين تانىسۋلار كەزىندە ساق بولۋعا شاقىردى. ىشكى ىستەر مينيسترلىگىنىڭ مالىمەتىنشە، الەۋمەتتىك جەلىلەردە، اسىرەسە Threads پلاتفورماسىندا ءوزىن جالعىزبىن دەپ تانىستىرىپ، «شىنايى قارىم-قاتىناس» ىزدەيتىن اككاۋنتتاردىڭ ارتىندا الاياقتار تۇرۋى مۇمكىن، دەپ حابارلايدى Qamshy.kz Polisia.kz-كە سىلتەمە جاساپ.

ۆەدومستۆونىڭ تۇسىندىرۋىنشە، قاسكويلەر تارتىمدى جىگىت نەمەسە قىز بەينەسىن جاساپ، حات الماسۋعا بەلسەندى تۇردە كىرىسەدى. ولار تەز ارادا سەنىمگە كىرىپ، ەموسيالىق بايلانىس ورناتۋعا تىرىسادى. الايدا ءبىراز ۋاقىتتان كەيىن اڭگىمە قارجىلىق كومەك سۇراۋعا ۇلاسادى. كوبىنە الاياقتىق سحەمالار بىرنەشە كەزەڭنەن تۇرادى: الدىمەن جاقىن قارىم-قاتىناس ورناتۋ، كەيىن قيىن جاعداي، اۋرۋ نەمەسە «ءتيىمدى ينۆەستيسيا» تۋرالى اڭگىمە ايتۋ، سوڭىندا اقشا اۋدارۋدى سۇراۋ.

پوليسيا وكىلدەرى ەگەر ينتەرنەتتەگى تانىس ادام ۆيدەوقوڭىراۋدان نەمەسە جەكە كەزدەسۋدەن قاشقاقتاسا، اقشا اۋدارۋدى تالاپ ەتسە، بوگدە ادامداردىڭ فوتوسۋرەتتەرىن پايدالانۋى مۇمكىن بولسا، ساق بولۋعا كەڭەس بەرەدى. اسىرەسە شەتەلدىك كريپتوامياندارعا نەمەسە ءۇشىنشى تۇلعالار ارقىلى اقشا جىبەرۋ ۇسىنىلسا، بۇل – الاياقتىقتىڭ ايقىن بەلگىسى.

قۇقىق قورعاۋ ورگاندارى قازاقستاندىقتارعا ينتەرنەت ارقىلى تانىسقان ادامدارعا اقشا مەن جەكە دەرەكتەردى بەرمەۋگە، كۇماندى سىلتەمەلەرگە وتپەۋگە، جەكە فوتوسۋرەتتەردى جىبەرمەۋگە جانە پروفيلدەگى اقپاراتتى مىندەتتى تۇردە تەكسەرۋگە شاقىردى. كەز كەلگەن كۇمان تۋىنداعان جاعدايدا بايلانىسۋدى دەرەۋ توقتاتىپ، قاجەت بولسا پوليسياعا جۇگىنۋ ۇسىنىلادى.