قازاقستاندا وزدىگىنەن قوزعالۋ مۇمكىندىگى شەكتەۋلى I توپتاعى مۇگەدەكتىگى بار ازاماتتارعا جەكە كومەكشىلەردىڭ قىزمەتى كورسەتىلەدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى حابارلادى.
مينيسترلىكتىڭ مالىمەتىنشە، جەكە كومەكشىلەر مۇگەدەكتىگى بار ادامدارعا مەديسينالىق، الەۋمەتتىك جانە وزگە دە مەكەمەلەرگە بارۋعا، ۇيدەن شىعۋعا، سونداي-اق كۇندەلىكتى تۇرمىستا قاجەتتى كومەكتى الۋعا جاردەمدەسەدى. كومەكشى ابيليتاسيا جانە رەابيليتاسيانىڭ جەكە باعدارلاماسىنا سايكەس تاعايىندالادى.
اتالعان قىزمەت جەرگىلىكتى اتقارۋشى ورگانداردىڭ قاراجاتى ەسەبىنەن قارجىلاندىرىلادى جانە ازاماتپەن زاڭناماعا ساي جاسالعان شارت نەگىزىندە كورسەتىلەدى. سونىمەن قاتار مەملەكەت جەكە كومەكشىلەر ءۇشىن الەۋمەتتىك اۋدارىمدار جۇرگىزەدى، بۇل كەزەڭ كەيىن زەينەتاقى تاعايىنداۋ كەزىندە ەڭبەك ءوتىلى رەتىندە ەسەپكە الىنادى.
ەگەر I توپتاعى مۇگەدەكتىگى بار ازاماتتىڭ جەكە كومەكشىسى بولماسا، وعان تۇراقتى كۇتىم جاسايتىن ادامعا جاردەماقى بەلگىلەنەدى. بۇل تولەم الەۋمەتتىك كودەكسكە سايكەس اي سايىن رەسپۋبليكالىق بيۋدجەتتەن تولەنىپ، كۇتىم كورسەتەتىن وتباسىلاردى قولداۋعا باعىتتالعان.
سونداي-اق 2026 جىلعى 1 قاڭتاردان باستاپ كۇشىنە ەنەتىن وزگەرىستەرگە سايكەس، I توپتاعى مۇگەدەكتىگى بار ازاماتتىڭ جۇبايى زەينەت جاسىنا جەتكەن جاعدايدا دا جەكە كومەكشى بولا الادى.
مينيسترلىك مۇگەدەكتىگى بار ادامداردى قولداۋ شارالارى الداعى ۋاقىتتا دا جەتىلدىرىلىپ، ولاردىڭ قوعام ومىرىنە بەلسەندى ارالاسۋىنا جانە ءومىر ساپاسىن ارتتىرۋعا باعىتتالاتىنىن اتاپ ءوتتى.
