قوعامدىق قور NNEF قازاقستان-بريتان تەحنيكالىق ۋنيۆەرسيتەتىنىڭ اكسيونەرى بولدى.

2025 جىلدىڭ قىركۇيەگىندە «NNEF» قوعامدىق قورى قازاقستان-بريتان تەحنيكالىق ۋنيۆەرسيتەتىنىڭ (كبتۋ) اكسيونەرى اتاندى. قور قۇرىلتايشىلارىنىڭ ءبىرى – دينارا قۇلىبايەۆا. بۇل تۋرالى اقپارات قارجىلىق ەسەپتىلىك دەپوزيتارييىنىڭ رەسمي سايتىندا جاريالاندى.

بۇعان دەيىن كبتۋ «قايتارىلعان اكتيۆتەردى باسقارۋ كومپانياسىنىڭ» يەلىگىندە بولعان. اكسيونەردىڭ اۋىسۋى ۋنيۆەرسيتەتتىڭ مەنشىك قۇرىلىمىندا كەزەكتى وزگەرىس بولعانىن كورسەتەدى.

سونىمەن قاتار كورپوراتيۆتىك وقيعالار تۋرالى وزگە ەسەپتە كبتۋ عيماراتىنىڭ مەملەكەت مەنشىگىنە بەرىلەتىنى حابارلاندى. قۇجاتتا ۋنيۆەرسيتەتتىڭ اكىمشىلىك عيماراتىن سىيعا تارتۋ شارتى ارقىلى مەملەكەتكە وتكىزۋ جانە قابىلداۋ-تاپسىرۋ اكتىسىنە قول قويۋ كوزدەلگەنى جازىلعان.

«1957 جىلى سالىنعان، رەسپۋبليكالىق ماڭىزى بار تاريح جانە مادەنيەت ەسكەرتكىشى سانالاتىن، الماتى قالاسى تولە بي كوشەسى، 59 مەكەنجايىندا ورنالاسقان كبتۋ اكىمشىلىك عيماراتىن مەملەكەتكە بەرۋ جانە اتالعان نىسان بويىنشا سەنىمگەرلىك باسقارۋ شارتىن جاساسۋدى باستاۋ»، – دەلىنگەن اكسيونەر شەشىمىندە.

قۇجاتتارعا سايكەس، عيماراتتى پايدالانۋ ءارى قاراي سەنىمگەرلىك باسقارۋ تەتىگى ارقىلى جۇزەگە اسىرىلۋى مۇمكىن.