كەشە، 19 ءساۋىر كۇنى قازاقستاننىڭ حالىق جازۋشىسى، كورنەكتى اقىن ءارى قوعام قايراتكەرى مۇحتار شاحانوۆ 84 جاسىندا ومىردەن وتكەن بولاتىن. بۇگىن الەۋمەتتىك جەلىدە اقىننىڭ جارى حانشايىم شاحانوۆانىڭ مۇحتار شاحانوۆ ءحال ۇستىندە جاتقاندا جازعان حاتى تارالدى. مارقۇمنىڭ جارى حالىق جازۋشىسىنىڭ سوڭعى اماناتى – ءوزىن ارىستان باب كەسەنەسىنە جەرلەۋ بولعانىن ايتىپ ەدى.
كەيىن بەلگىلى بولعانداي، اقىن ەرتەڭ، 21 ءساۋىر كۇنى الماتىداعى كەڭساي زيراتىنا جەرلەنەدى. وسىعان بايلانىستى ءبىرقاتار قوعام بەلسەندىلەرى ءوز پىكىرىن ايتقان.
مادەنيەت جانە اقپارات ءمينيسترى ايدا بالايەۆا Azattyq Rýhy رەداكسياسىنا وسى ماسەلەگە قاتىستى كوممەنتاريي بەردى.
«ايدا عالىمعىزى، ءقازىر الەۋمەتتىك جەلىدە مۇحتار شاحانوۆتىڭ جەرلەنەتىن جەرى تۋرالى ءتۇرلى بولجام ايتىلىپ جاتىر. وسىعان بايلانىستى، ناقتى اقپارات بەرە الاسىز با؟»، - دەپ سۇرادىق مينيستردەن.
سۇراققا جاۋاپ بەرە كەلە ايدا بالايەۆا ارىستان باب كەسەنەسى ءقازىر تۋريستىك نىسان بولعاندىقتان، ونىڭ اۋماعىنان جاڭا زيراتتار قازۋ – ادامگەرشىلىك تۇرعىسىنان دا، ءدىني تۇرعىسىنان دا دۇرىس بولمايدى دەگەن پىكىرىن ايتتى.
«بىرىنشىدەن، ءوز عۇمىرىن ۇلت رۋحانياتىنا ارناپ، وسكەلەڭ ۇرپاققا مول مۇرا قالدىرعان اقىنىمىزدىڭ تۋعان-تۋىستارىنا قايعىرىپ كوڭىل ايتامىن. سۇراق جاۋابىنا كوشسەك، ءسوز جوق، ەلىمىزدە مۇحتار شاحانوۆتاي تاۋ تۇلعاعا ماڭگىلىك مەكەن بولۋعا لايىقتى جەر كوپ. دەسە دە، بۇگىنگى ەلىمىزدىڭ مۇراتى – ادىلەتتى قوعام قۇرۋ بولسا، بەرەكەسى – سول قوعامدا زاڭ مەن ءتارتىپتى ساقتاۋدا. بۇگىندە ارىستان باب كەسەنەسى دە، ونى قورشاعان ەسكى قورىم دا مەملەكەتتىڭ قورعاۋىنداعى نىساندار. ءيا، بۇرىن زيارات ەتەتىن جەر بولسا، ءقازىر بۇل – تاريحي مۇرامىز. ارىستان باب پانتەون-زيراتى ەمەس، ول ەڭ الدىمەن ۇلكەن مادەني-رۋحاني ورتالىق، تۋريستىك باعىتقا ەنگەن تاريحي-مادەني نىسان. سوندىقتان ول جەرگە جاڭا زيراتتار قازۋ ادامي تۇرعىدان دا، ءدىني تۇرعىدان دا دۇرىس بولمايدى دەپ سانايمىز. ال مۇحتار اعامىزدى تۇلعا قىلعان، ورتاسىن كەڭەيتىپ، رۋحىن شىڭداعان قالا، زيالىلاردىڭ ورتاسى – الماتى قالاسى. سوندىقتان ارتىنان ىزدەپ، دۇعا جاسايتىن جاماعات ۇلىلارىن كەڭسايدان تابادى. اقىننىڭ تۋىستارى وسى ماسەلەگە تۇسىنىستىكپەن قارايدى دەگەن سەنىمدەمىز»، - دەدى ايدا بالايەۆا.
