قازاقستاندا مەرزىمدى اسكەري قىزمەت وتكەرىپ جۇرگەن ازاماتتارعا بانكتەر مەن ميكروقارجى ۇيىمدارىنىڭ نەسيە بەرۋىنە تىيىم سالۋ جوسپارلانىپ وتىر. بۇل نورما «اشىق نقا» پورتالىندا جاريالانعان قاۋلى جوباسىندا كوزدەلگەن.
قۇجاتتى قارجى نارىعىن رەتتەۋ جانە دامىتۋ اگەنتتىگى ازىرلەگەن. جوباعا سايكەس، قورعانىس مينيسترلىگى مەرزىمدى اسكەري قىزمەتكە شاقىرىلعان ازاماتتار تۋرالى اقپاراتتى نەسيەلىك بيۋرولارعا بەرەتىن بولادى. اتالعان مالىمەتتەر نەسيەلىك ەسەپتە بەلگى رەتىندە كورسەتىلەدى.
وسىدان كەيىن، ازاماتتار نەسيە الۋعا ءوتىنىم بەرگەن جاعدايدا، بانك نەمەسە ميكروقارجى ۇيىمى الدىمەن ونىڭ مارتەبەسىن تەكسەرۋگە مىندەتتى. ەگەر كرەديتتىك ەسەپتە ءوتىنىم بەرۋشىنىڭ قازىرگى ۋاقىتتا مەرزىمدى اسكەري قىزمەتتە جۇرگەنى كورسەتىلسە، نەسيە بەرۋدەن باس تارتىلۋى ءتيىس.
قاۋلى جوباسى 3 اقپانعا دەيىن قوعامدىق تالقىلاۋعا شىعارىلعان. قوعامدىق تالقىلاۋ ناتيجەسى بويىنشا قۇجاتقا وزگەرىستەر ەنگىزىلۋى نەمەسە ول بەكىتىلۋى مۇمكىن.
