قايعىلى وقيعا 18 قاڭتار كۇنى كەشكە سولتۇستىك قازاقستان وبلىسىنىڭ قىزىلجار اۋدانىنداعى ولشانكا اۋىلىندا تىركەلدى. توتەنشە جاعدايلار دەپارتامەنتىنىڭ مالىمەتىنشە، ءورت جەكە تۇرعىن ۇيدە شىققان.

الدىن الا دەرەكتەرگە سايكەس، ۇيدە ەرەسەكتەر بولماعان. الەۋمەتتىك جەلىلەردە تاراعان اقپاراتتا اتا-اناسى قوناققا كەتكەن ساتتە بالا ۇيدە جالعىز قالعانى ايتىلادى. ءورت سوندىرۋشىلەر ءتىلسىز جاۋدى ءسوندىرۋ بارىسىندا بەس جاسار قىزدىڭ ءمايىتىن تاپقان.

ءورتتى سوندىرۋگە 35 قۇتقارۋشى مەن 11 بىرلىك ارنايى تەحنيكا جۇمىلدىرىلدى. جالىن قىسقا ۋاقىتتا سوندىرىلگەنىمەن، بالانى امان الىپ قالۋ مۇمكىن بولماعان.

الدىن الا بولجام بويىنشا، ءورتتىڭ شىعۋىنا پەشتى پايدالانۋ كەزىندە ءورت قاۋىپسىزدىگى تالاپتارىنىڭ ساقتالماۋى سەبەپ بولۋى مۇمكىن. قازىرگى تاڭدا وقيعانىڭ بارلىق ءمان-جايى انىقتالىپ جاتىر.

توتەنشە جاعدايلار قىزمەتى تۇرعىنداردى قاۋىپسىزدىك ەرەجەلەرىن قاتاڭ ساقتاۋعا، اسىرەسە بالالاردى قاراۋسىز قالدىرماۋعا شاقىردى.