الەمدەگى ەڭ تابىستى ستارتاپتاردىڭ كەيبىرىن وتە جاس ادامدار قۇرعانى بەلگىلى. مىسالى، بيلل گەيتس پەن مارك سۋكەربەرگ كومپانيالارىن نەبارى 19 جاسىندا باستاعان. ال جاساندى ينتەللەكت (AI) سالاسىندا بۇل ءۇردىس ودان ءارى كۇشەيىپ كەلەدى.
حالىقارالىق ۆەنچۋرلىق Antler قورى جاريالاعان جاڭا ەسەپكە سايكەس، AI-يۋنكورنداردىڭ (باعالانۋى 1 ملرد دوللاردان اساتىن ستارتاپتار) نەگىزىن قالاۋشىلاردىڭ ورتاشا جاسى 2021 جىلى 40 بولسا، 2024 جىلى 29 جاسقا دەيىن تومەندەگەن. زەرتتەۋ اياسىندا الەم بويىنشا 1 629 يۋنيكورن مەن 3 512 نەگىزىن قالاۋشى تالدانعان.
بۇل ءۇردىس تەك AI سالاسىنا ءتان. باسقا سالالاردا، كەرىسىنشە، ستارتاپ يەلەرىنىڭ جاسى ءوسىپ كەلەدى. مىسالى، 2014 جىلى يۋنيكورن قۇرعان كاسىپكەرلەردىڭ ورتاشا جاسى 30 بولسا، 2022–2024 جىلدارى بۇل كورسەتكىش 34 جاسقا جەتكەن.
سوڭعى جىلى جاس نەگىزىن قالاۋشىلار باسقارعان بىرنەشە ءىرى AI ستارتاپتار نازارعا ىلىكتى. ماسەلەن، Scale AI دەرەكتەردى بەلگىلەۋ كومپانياسىنىڭ تەڭ قۇرىلتايشىسى الەكساندەر ۆاڭ نەبارى 29 جاستا. كومپانيا 29 ملرد دوللارعا باعالانىپ، ۆاڭ 2025 جىلى Meta-عا شاقىرىلىپ، جاڭا AI زەرتتەۋ ءبولىمىن باسقاردى.
سونداي-اق Mercor اتتى AI-نەگىزدەلگەن كادر ىرىكتەۋ پلاتفورماسىن 22 جاستاعى ءۇش جاس كاسىپكەر قۇرعان. كومپانيانىڭ باعالانۋى 10 ملرد دوللاردان استى. AnySphere اتتى AI-كومەكشى باعدارلامالاۋ پلاتفورماسىن دا 20-جاس شاماسىنداعى ماماندار باسقارادى.
Antler سەرىكتەسى فريدتوف بەرگە جاس كاسىپكەرلەردىڭ باستى ارتىقشىلىعى — تەز قيمىلداۋ، ۇزدىكسىز تاجىريبە جاساۋ جانە باتىل شەشىم قابىلداۋ ەكەنىن ايتادى. ونىڭ سوزىنشە، بۇگىندە ۇزاق جىلدىق كورپوراتيۆتىك تاجىريبەدەن گورى يكەمدىلىك پەن ەكسپەريمەنت جاساۋ قابىلەتى ماڭىزدىراق.
زەرتتەۋ ناتيجەسى AI ستارتاپتارى باسقا سالالارعا قاراعاندا ەكى جىلعا جىلدامىراق دامىپ، ورتا ەسەپپەن 4،7 جىلدا يۋنيكورن دەڭگەيىنە جەتەتىنىن كورسەتتى. 2025 جىلى تەز وسكەن كومپانيالار قاتارىندا Mistral، Lovable جانە Suno AI بار.
ساراپشىلاردىڭ ايتۋىنشا، جاس نەگىزىن قالاۋشىلار كومپانيانى باستاپقى كەزەڭدە جىلدام وسىرە الادى، الايدا بيزنەس ۇلكەيگەن سايىن باسقارۋ تىزگىنى وزگەرۋى دە مۇمكىن. سوعان قاراماستان، قازىرگى AI داۋىرىندە جاس كاسىپكەرلەر يننوۆاسيانىڭ نەگىزگى قوزعاۋشى كۇشىنە اينالىپ وتىر.
