استانادا مەملەكەت باسشىسى قاسىم-جومارت توقايەۆتىڭ قاتىسۋىمەن پارلامەنتتىك رەفورماعا ارنالعان جۇمىس توبىنىڭ وتىرىسى ءوتتى. جيىندا پارلامەنتتىڭ قۇرامى مەن وكىلەتتىك مەرزىمى، سايلاۋ تەتىكتەرى، زاڭ شىعارۋ ۇدەرىسى جانە بيلىكتىڭ وزگە تارماقتارىمەن ءوزارا ءىس-قيمىل ماسەلەلەرى قارالدى.

پرەزيدەنتتىڭ ايتۋىنشا، رەفورماعا قاتىستى قوعامنان 1،6 مىڭعا جۋىق ۇسىنىس تۇسكەن. ولاردىڭ قاتارىندا ساياسي پارتيالار، ۇكىمەتتىك ەمەس ۇيىمدار، بيزنەس وكىلدەرى مەن ساراپشىلاردىڭ پىكىرلەرى بار. بۇل باستامانىڭ كەڭ قوعامدىق تالقىلاۋدان وتكەنىن كورسەتەدى.

قاسىم-جومارت توقايەۆ سوڭعى التى ايدا قوعام رەفورمانىڭ ءمانى مەن ماقساتىن تەرەڭ تۇسىنە باستاعانىن اتاپ ءوتتى. ونىڭ ايتۋىنشا، الداعى ۇلتتىق قۇرىلتاي وتىرىسىندا ول ءوز تاراپىنان ناقتى ۇسىنىستارىن جاريالايدى.

پرەزيدەنتتىڭ پىكىرىنشە، قولعا الىنعان وزگەرىستەر ساياسي جۇيەنى جاڭعىرتۋدى كوزدەيدى جانە مازمۇنى جاعىنان ەل ءۇشىن جاڭا كونستيتۋسيا قابىلداۋمەن تەڭ. رەفورما مەملەكەتتىك باسقارۋ مودەلىن قايتا قالىپتاستىرۋعا باعىتتالعان.