قاڭتاردان باستاپ رەسمي جۇمىس ىستەيتىن ازاماتتاردىڭ ايلىق تابىسى شامامەن 7 500 تەڭگەگە ارتۋى مۇمكىن. بۇل سالىقتىق شەگەرىمدەرگە ەنگىزىلگەن جاڭا وزگەرىستەردىڭ ناتيجەسى.

بۇرىن جالاقىنىڭ 55 مىڭ تەڭگەگە دەيىنگى بولىگى سالىقتان بوساتىلسا، ەندى بۇل شەك 130 مىڭ تەڭگەگە دەيىن كوتەرىلدى. سالىقتان بوساتىلاتىن سوما 75 مىڭ تەڭگەگە ۇلعايىپ، ونىڭ 10 پايىزى — 7 500 تەڭگە قىزمەتكەردىڭ ءوز تابىسىنا قوسىلادى.

قارجى ساراپشىلارى اتاپ وتكەندەي، جالاقىدان ۇستالعان سالىق جۇمىس بەرۋشىنىڭ ەمەس، قىزمەتكەردىڭ جەكە سالىعى بولىپ تابىلادى. جۇمىس بەرۋشى تەك ونى مەملەكەتكە اۋدارۋعا مىندەتتى اگەنت رەتىندە قىزمەت اتقارادى. سوندىقتان زاڭداعى جاڭا وزگەرىستەردەن تۋىندايتىن جەڭىلدىكتەر تىكەلەي قىزمەتكەردىڭ تابىسىنا قوسىلادى.

ساراپشىلار قىزمەتكەرلەرگە ەسەپ بولىمىنە بارىپ، جالاقىنىڭ ءوسۋىن ناقتىلاپ سۇراۋعا كەڭەس بەرەدى. بۇرىن قولدانىلعان ستاندارتتى شەگەرىم 14 ايلىق ەسەپتىك كورسەتكىشكە نەگىزدەلسە، ەندى 30 ايلىق ەسەپتىك كورسەتكىشكە ساي بازالىق شەگەرىم قولدانىلادى. الايدا بۇل جەڭىلدىك اۆتوماتتى تۇردە جۇزەگە اسپايدى — سالىقتىق شەگەرىم تەك قىزمەتكەر ەسەپ بولىمىنە رەسمي ءوتىنىش تاپسىرعان جاعدايدا عانا قولدانىلادى.