التىن مەن كۇمىس باعاسى تاريحي قۇلدىراۋدان سوڭ قايتا قالپىنا كەلە باستادى. جۇما كۇنى التىن ءبىر كۇندە شامامەن 10%-عا، ال كۇمىس 30%-عا دەيىن ارزانداپ، ونداعان جىلداعى ەڭ ءىرى تومەندەۋدى كورسەتتى.

سەيسەنبى كۇنى سپوت-التىن شامامەن 6%-عا ءوسىپ، ۋنسياسى $4 938 دەڭگەيىنە جەتتى. كۇمىس تە 10%-عا جۋىق قىمباتتاپ، ۋنسياسى $86–87 ارالىعىندا ساۋدالاندى.

ساراپشىلار بۇل قۇلدىراۋدى نارىقتاعى قىسقا مەرزىمدى پوزيسيالاردى قايتا رەتتەۋ دەپ باعالاپ، التىن مەن كۇمىستىڭ ۇزاقمەرزىمدى ينۆەستيسيالىق تارتىمدىلىعى ساقتالعانىن ايتتى. ولاردىڭ پىكىرىنشە، گەوساياسي تاۋەكەلدەر، رەزەرۆتەردى ءارتاراپتاندىرۋ جانە ينفلياسيا فاكتورلارى قىمبات مەتالداردى قولداي بەرەدى.

ال كۇمىسكە قاتىستى ساراپشىلار سۇرانىستىڭ، اسىرەسە كۇن ەنەرگەتيكاسى، دەرەكتەر ورتالىقتارى جانە AI ينفراقۇرىلىمى سالاسىندا، الداعى جىلدارى ايتارلىقتاي وسەتىنىن اتاپ ءوتتى.