قازاقستاندىق Cybernet AI ستارتاپى تۇركى تىلدەرىنە ارنالعان اۆتوماتتى سويلەۋدى تانۋ (ASR) بويىنشا ەڭ اۋقىمدى مودەلدى تانىستىردى. بۇل – ورتالىق ازيادا جاسالعان وسىنداي كولەمدەگى العاشقى جوبا جانە اعىلشىن تىلىنەن بەيىمدەلمەي، بىردەن تۇركى تىلدەرىنىڭ ەرەكشەلىگىنە ساي جوبالانعان تولىققاندى ىى-مودەل.
جوبا Astana Hub، ق ر سيفرلىق دامۋ جانە جاساندى ينتەللەكت مينيسترلىگىنىڭ ستراتەگيالىق قولداۋىمەن، Microsoft GPU-ينفراقۇرىلىمىندا جۇزەگە اسىرىلعان.
Astana Hub باسقارۋشى ديرەكتورى تانات ۇسكەمبايەۆتىڭ ايتۋىنشا، بۇل ازىرلەمە تۇركى تىلدەس ەلدەرگە سيفرلىق سەرۆيستەردى انا تىلىندە، ساپانى جوعالتپاي جانە قولجەتىمدى باعامەن ماسشتابتاۋعا جول اشادى. قازاقستان ءۇشىن بۇل – دايىن شەتەلدىك ءىى شەشىمدەردى تۇتىنۋشىدان، ءوز تەحنولوگياسىن ەكسپورتتاي الاتىن ازىرلەۋشى ەلگە ءوتۋ.
ASR-مودەل قازاق، تۇرىك، وزبەك، قىرعىز، ازەربايجان جانە تاتار تىلدەرىندە وقىتىلعان. سونىمەن قاتار، كۇندەلىكتى ومىردە كەڭ تاراعان تۇركى-ورىس ارالاس سويلەۋدى دە ءدال تانيدى.
بۇعان دەيىن ءوڭىر ەلدەرى نەگىزىنەن اعىلشىن تىلىنە باعىتتالعان حالىقارالىق ASR-مودەلدەردى قولدانۋعا ءماجبۇر بولدى. ولار تۇركى فونەتيكاسى مەن اكسەنتتەرىن تولىق ەسكەرمەي، ساپانى شەكتەيتىن.
Cybernet AI بۇل تاسىلدەن باس تارتىپ، ءوڭىر ءۇشىن جانە وڭىردە جاسالعان جەكە مودەل قۇردى. كومپانيانىڭ تەحنيكالىق ديرەكتورى راشيد يسمايلوۆ بۇل جوبانى قازاقستاننىڭ تەحنولوگيالىق ەگەمەندىگىنە قوسىلعان ۇلەس دەپ باعالاد
جاڭا مودەل بانكتەرگە، تەلەكوم-كومپانيالارعا، بايلانىس ورتالىقتارىنا، لوگيستيكا مەن مەملەكەتتىك قىزمەتتەرگە باعىتتالعان. جوبانى دايىنداۋشىلاردىڭ ايتۋىنشا، ول شىعىندى ازايتىپ، كليەنتتەرگە 24/7 داۋىس ارقىلى قىزمەت كورسەتۋگە مۇمكىندىك بەرەدى.
