دانيادا مىڭداعان ادام اقش پرەزيدەنتى دونالد ترامپتىڭ گرەنلانديانى اننەكسيالاۋ جونىندەگى مالىمدەمەلەرىنە قارسىلىق ءبىلدىرىپ، كوشەگە شىقتى.
نارازىلىق اكسياسى ەلدىڭ ەكىنشى ءىرى قالاسى – ورحۋس قالاسىندا ءوتتى. ميتينگكە گرەنلانديالىق وتباسىلار، ازاماتتىق بەلسەندىلەر جانە جەرگىلىكتى تۇرعىندار قاتىستى. جينالعاندار «گرەنلاندياعا قول سۇقپاڭدار!» جانە «امەريكانى ەلدەن كەتىرۋ كەرەك!» دەگەن ۇراندار جازىلعان پلاكاتتار كوتەردى.
شەرۋ بارىسىندا قاتىسۋشىلار گرەنلانديانىڭ ساياسي بولاشاعىن تەك وسى ايماقتىڭ حالقى عانا ايقىنداۋى ءتيىس ەكەنىن اتاپ ءوتتى. ولاردىڭ ايتۋىنشا، ارالدىڭ تاعدىرى سىرتقى ساياسي مۇددەلەردىڭ قۇرالىنا اينالماۋى كەرەك.
سونىمەن قاتار ميتينگكە قاتىسقاندار دانيا ۇكىمەتى ءوز اۋماعىنان ەشقاشان باس تارتپايتىنىن جانە گرەنلانديانىڭ ەگەمەندىگىنە نۇقسان كەلتىرەتىن كەز كەلگەن ارەكەتكە جول بەرىلمەيتىنىن جەتكىزدى.
اكسيا بەيبىت تۇردە ءوتىپ، قوعامدىق ءتارتىپ بۇزىلعان جوق.
