قازاقستاندا Telegram مەسسەندجەرى ارقىلى تارالاتىن ونلاين الاياقتىقتىڭ جاڭا ءتۇرى تىركەلدى. باس پروكۋراتۋرا ازاماتتاردى “تەگىن ەلەكتروندى كىتاپتار” تۋرالى جارنامالارعا سەنبەۋگە شاقىردى.

قاداعالاۋشى ورگاننىڭ حابارلاۋىنشا، الاياقتار ينتەرنەت قولدانۋشىلارىن تەگىن ەلەكتروندى كىتاپتار قورى بار دەگەن سىلتاۋمەن الداپ ءجۇر. ارنايى بوتتار بەلگىلى ءبىر كىتاپتاردى ۇسىنىپ، ولاردىڭ قىسقاشا سيپاتتاماسىن كورسەتەدى. الايدا تولىق نۇسقاسىن جۇكتەۋ ءۇشىن ۇسىنىلاتىن فايل — كىتاپ ەمەس، زياندى قوسىمشا بولىپ شىعادى.

مۇنداي قوسىمشانى سمارتفونعا ورناتۋ جەكە دەرەكتەردىڭ قاۋىپسىزدىگىنە تىكەلەي ءقاۋىپ توندىرەدى. اتاپ ايتقاندا، قۇپيا سوزدەر مەن بانك دەرەكتەرى ۇرلانۋى، جەكە حات-حابارلار مەن فوتوسۋرەتتەرگە قول جەتكىزىلۋى، سونداي-اق قۇرىلعىنى قاشىقتان تولىق باسقارۋ مۇمكىندىگى پايدا بولۋى ىقتيمال.

باس پروكۋراتۋرا بەلگىسىز جانە كۇماندى كوزدەردەن الىنعان فايلدار مەن قوسىمشالاردى ورناتۋدىڭ ءقاۋىپتى ەكەنىن ەسكە سالدى. ازاماتتارعا كۇدىكتى سىلتەمەلەردى اشپاۋعا، مەسسەندجەرلەر ارقىلى تارالعان باعدارلامالاردى جۇكتەمەۋگە جانە كيبەرگيگيەنانىڭ نەگىزگى تالاپتارىن قاتاڭ ساقتاۋعا كەڭەس بەرىلدى.

مامانداردىڭ ايتۋىنشا، ونلاين قاۋىپسىزدىك ەرەجەلەرىن ساقتاۋ — الاياقتىقتان قورعانۋدىڭ باستى جولى.