«قىز تاربيەسى – ۇلت تاربيەسى» دەگەن حالقىمىزدىڭ تەرەڭ ماعىنالى دانالىق ءسوزى قىز بالانىڭ بولاشاق انا، وتباسىنىڭ ۇيىتقىسى، ۇرپاق تاربيەسىنىڭ نەگىزىن قالاۋشى ەكەنىن ايقىندايدى. جاراتىلىسىنان نازىك، سەزىمتال ءارى اسەرگە بەيىم قىز بالانىڭ تاربيەسى – قوعام بولاشاعىنا تىكەلەي ىقپال ەتەتىن ماڭىزدى قۇندىلىق.

وسى باعىتتا جاس ۇرپاقتىڭ تاربيەسىنە، اسىرەسە قىز بالالاردىڭ بويىنا ۇلتتىق جانە زاماناۋي قۇندىلىقتاردى قاتار سىڭىرۋگە ۇلەس قوسىپ كەلە جاتقان ۇيىمداردىڭ ءبىرى – «سەنىمەن بولاشاق» رەسپۋبليكالىق قوعامدىق بىرلەستىگى. ۇيىمنىڭ باستاماسىمەن الماتى قالاسى اۋەزوۆ اۋدانىنداعى №141 جالپى ءبىلىم بەرەتىن مەكتەپتە 9–11 سىنىپ وقۋشىلارىنا ارنالعان كەزەكتى سەمينار-ترەنينگ ءوتتى.

شارانى مەكتەپ ديرەكتورىنىڭ تاربيە ءىسى جونىندەگى ورىنباسارى ۋسپانوۆا ايگۇل قازبەك قىزى اشىپ، كەزدەسۋدىڭ ماڭىزى مەن ماقساتىنا توقتالىپ ءوتتى. ول قىز بالانىڭ تاربيەسى – تەك وتباسىنىڭ ەمەس، تۇتاس قوعامنىڭ جاۋاپكەرشىلىگى ەكەنىن اتاپ ءوتتى.

سەمينار بارىسىندا «سەنىمەن بولاشاق» رقب الماتى فيليالىنىڭ جەتەكشىسى مەرۋەرت ماۋلەت قىزى زاماناۋي قازاق قىزىنىڭ الەۋمەتتىك جانە ەتنوالەۋمەتتىك بەينەسىن جان-جاقتى تالداپ، بۇگىنگى قوعامداعى قىز بالانىڭ رولىنە توقتالدى. ول قىزداردىڭ كوشباسشىلىق قابىلەتىن دامىتا وتىرىپ، ۇلتتىق قۇندىلىقتاردان اجىراماۋدىڭ ماڭىزىن ەرەكشە اتاپ ءوتتى.

– قىز بالا – بولاشاق انا، بولاشاق جار عانا ەمەس، ول – ۇلتتىڭ رۋحاني وزەگى. سوندىقتان قازىرگى كەزەڭدە قىز بالانىڭ بويىندا جاۋاپكەرشىلىك، مادەنيەت، پاراسات پەن ۇلتتىق تاربيە قاتار قالىپتاسۋى قاجەت. بابالارىمىز ۇستانعان قىز تاربيەسىنىڭ نەگىزى بۇگىن دە ءوز وزەكتىلىگىن جوعالتقان جوق، – دەگەن مازمۇندا وي ءبولىستى.

سەميناردىڭ نەگىزگى سپيكەرى – فيزيولوگ، بيولوگ، نۋتريسولوگ، «سەنىمەن بولاشاق» رقب-نىڭ ەكسپەرت-جاناشىرى ەركەجان مارات قىزى قىز بالالارعا دەنساۋلىق مادەنيەتى، دۇرىس تاماقتانۋ، جەكە باس گيگيەناسى جانە ەرتە جۇكتىلىكتىڭ الدىن الۋ تاقىرىپتارىندا جان-جاقتى اقپارات بەردى. سونىمەن قاتار ول ءجاسوسپىرىم كەزەڭىندەگى فيزيولوگيالىق جانە پسيحولوگيالىق ەرەكشەلىكتەردى ءتۇسىندىرىپ، رەپرودۋكتيۆتى دەنساۋلىقتى ساقتاۋ جولدارىن ناقتى مىسالدارمەن باياندادى.

قاتىسۋشىلار مامانعا وزدەرىن تولعاندىرعان سۇراقتارىن قويىپ، ومىرلىك ماڭىزى بار پايدالى كەڭەستەر الدى. جاسوسپىرىمدەر ءۇشىن مۇنداي اشىق ءارى شىنايى اڭگىمە ولاردىڭ دۇنيەتانىمىن كەڭەيتىپ، جاۋاپكەرشىلىك سەزىمىن ارتتىرا ءتۇستى.

9 «ءا» سىنىپ وقۋشىسى ينابات الجيگيتوۆا ءوز اسەرىمەن ءبولىستى:

– قازىرگى تاڭدا اقپارات وتە كوپ. قايسىسى دۇرىس، قايسىسى بۇرىس ەكەنىن اجىراتۋ قيىن. ءتىپتى كۇندەلىكتى تۇرمىستا قولدانىلاتىن زاتتاردىڭ دا پايداسى مەن زيانى تۋرالى بىلە بەرمەيمىز. بۇل سەميناردا ءبارى اشىق ايتىلىپ، ماعان وتە پايدالى اقپارات بەرىلدى. كوپ نارسەنى ءتۇسىنىپ الدىم، – دەدى ول.

شارا سوڭىندا مەكتەپ ۇجىمى مەن قاتىسۋشىلار قىز تاربيەسىنە ارنالعان مۇنداي مازمۇندى كەزدەسۋلەردىڭ ماڭىزى زور ەكەنىن اتاپ ءوتتى. №141 جببم ديرەكتورى عازيزا قاراعۇل قىزى باسقاراتىن وقۋ ورنىندا وتكەن بۇل ءىس-شارا قىز بالالاردىڭ تاربيەسىنە باعىتتالعان جۇيەلى جۇمىستاردىڭ ءبىر بولىگى رەتىندە جوعارى دەڭگەيدە ۇيىمداستىرىلدى.

وسىلايشا، «سەنىمەن بولاشاق» رقب جۇزەگە اسىرىپ وتىرعان مۇنداي سەمينار-ترەنينگتەر جاس ۇرپاقتىڭ سانالى، دەنى ساۋ، ۇلتتىق قۇندىلىقتى بويىنا سىڭىرگەن تۇلعا بولىپ قالىپتاسۋىنا ىقپال ەتىپ كەلەدى. بۇل – تەك ءبىلىم بەرۋ ەمەس، تۇتاس ۇلتتىڭ رۋحاني ساۋلىعىنا قوسىلعان ماڭىزدى ۇلەس.

 بيفات ەلتايەۆا