تانىمال ايتىسكەر اقىندار جانداربەك بۇلعاقوۆ پەن سىرىم اۋەزحان كونستيتۋسيالىق رەفورما مەن جاڭا اتا زاڭ جوباسىنا قاتىستى ايرىقشا تاسىلمەن ءۇن قاتتى.
بۇعان دەيىن قوعامداعى ايتۋلى وقيعالار تۋرالى كەيدە قولداپ، كەيدە ءزىلدى سوزبەن تۇيرەپ، ءازىل-قالجىڭ تۇرىندە ءان شىعارىپ ورىنداپ جۇرگەن ولار بۇل جولى ساياسي تاقىرىپتى دا قوزعاپ كورۋگە بەكىنسە كەرەك.
ەندى اقىنداردىڭ انمەن ارلەگەن جىر جولدارىنا كەزەك بەرسەك:
 
«ادام كوپ بۇگىن اتا زاڭدى ويلاعان.
ول زاڭدى وقىماسا، تالداي ما ادام؟
سەنزۋرا جوق دەپ تۇر عوي، ءبارىن ايتام،
باۋىرىم، اڭگىمەڭ بار قانداي ماعان؟
بولامىز قانداي قوعام؟
 
زاڭدى ايتىپ بىزدەر تالاي داۋلاسىپ ەك،
مىنانىڭ انا تىلدە شارۋاسى جوق.
ورىسشا جازىلدى عوي بۇرىن زاڭدار،
قازاقشا زاڭ جازىلدى العاش رەت.
تىلىمدە بار قاسيەت.
 
ال ەندى پارلامەنتتىڭ قايدا ءمانى؟
ول ەندى قۇرىلتايعا اينالادى.
زاڭ شىقسا، دەپۋتاتتار ازايادى،
ازايسا، كوبەيەدى پايدالارى.
 
بىرەۋلەر تويىپ الىپ شارابىنا،
«قازاق ەل بولماعان» دەپ لاعادى ما؟
«مىڭ جىلدىق تاريحى بار ۇلى دالا»
دەپ جازدىق اتا زاڭنىڭ پاراعىنا.
بىزدىكى دالا مىنا!
 
سوزىڭنەن سەنىڭ بىرەۋ قايمىقتى ما؟
كەڭ دالاڭ تيەسىلى قاي مىقتىعا؟
بۇل زاڭ دا «حالىقتىكى» دەپ جازدىردىق،
جەردى دە، جەردەگى بار بايلىقتى دا.
باعىتتى قويدىق تۋرا!
 
ءبارىنىڭ رەفەرەندۋم ويلاعانى،
زيان با بىرەۋدىڭ قول قويماعانى؟
ءبىر ەلگە اينالعاندا بۇكىل قازاق،
ۇلى ەلگە عالامداعى اينالادى.
 
جىگىت كوپ قىز سەكىلدى قىلىقتارى،
قانداي زاڭ ارسىزداردى قۇرىقتادى.
بۇل زاڭدا ەر مەن ايەل عانا ۇيلەنىپ،
توقتايدى قىزتەكەنىڭ بىلىقتارى.
كەتەدى قۇرىپ ءبارى.
 
وزگەرىپ كۇندە زاڭ مەن باپتارىمىز،
باقىتتى قاشان كەلەدى شاقتارىمىز؟
ب ا ق دەگەن ءدال وسىلاي بەيبىت ەلدە
ءان ايتىپ، زاڭدى تالداپ جاتقانىڭىز.
بۇلىكتەن ساقتانىڭىز!
 
سي سزينپين، ءپۋتيننىڭ كوپ ايلالارى،
ترامپتىڭ بولماي جاتىر قاي قالاۋى؟
توقايەۆ تىنىشتىقپەن باسقارىپ تۇر،
جاتقاندا سوعىس قاپتاپ اينالانى.
ەل امان بولسا، كۇندە توي بولادى!».
 
اقىندار پوستتىڭ استىنا: «مەملەكەتىمىز ماڭىزدى كەزەڭدەردەن ابىرويمەن ءوتىپ، ازاتتىعىمىز ماڭگى بولسىن! ەر ازاماتتارىمىز وتباسىنىڭ دا، وتاننىڭ دا الدىنداعى جاۋاپكەرشىلىكتى سەزىنىپ، ۇرپاق پەن ۇلتقا قورعان بولسىن! سابيلەرىمىز جىلاماي، قازاقتىڭ ءار ارۋى ماحابباتقا پەن مەيىرىمگە شومىلىپ، باقىتتى عۇمىر كەشسىن! ەلىمىز امان، جۇرتىمىز تىنىش بولسىن!» دەپ جازدى.