الماتى وبلىسى مەن «كىتاپ وقيتىن ۇلت – چيتايۋششايا ناسيا» قوعامدىق قورى اراسىندا ىنتىماقتاستىق تۋرالى مەموراندۋمعا قول قويىلدى. بۇل كەلىسىم مەملەكەت باسشىسىنىڭ «كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى شارالار تۋرالى» جارلىعى اياسىندا ىسكە اسىرىلۋدا. جوبا بويىنشا وڭىردەگى كىتاپحانالار، مادەنيەت جانە ءبىلىم بەرۋ ۇيىمدارى ارقىلى بىرلەسكەن جوبالار مەن ءىس-شارالاردى ۇيىمداستىرۋ، جاستاردىڭ ينتەللەكتۋالدىق جانە رۋحاني دامۋىنا ىقپال ەتەتىن باستامالاردى جۇزەگە اسىرۋ جوسپارلانىپ وتىر، – دەپ حابارلايدى الماتى وبلىسى اكىمىنىڭ باسپا ءسوز قىزمەتى.
«كىتاپ وقيتىن ۇلت – چيتايۋششايا ناسيا» قوعامدىق قورى بىلتىر شىلدە ايىندا قۇرىلىپ، جۇمىسىن باستاعان. وتكەن جىلى قاراعاندى، قوستاناي وبلىستارى مەن شىمكەنت قالاسىندا العاشقى اعارتۋشىلىق جوبالارىن جۇزەگە اسىردى. ناتيجەسىندە 190 مىڭعا جۋىق ادام كىتاپ وقۋ داعدىسىن قالىپتاستىرعان. بيىل ولاردىڭ سانىن 1،5-2 ملن-عا ارتتىرۋ كوزدەلۋدە. ال الماتى وبلىسىندا 100 مىڭنان اسا ادامدى قامتۋ جوسپارلانعان.
شاراعا قاتىسقان وبلىس اكىمى مارات سۇلتانعازييەۆ ەل پرەزيدەنتى قاسىم-جومارت توقايەۆتىڭ كىتاپ وقۋ مادەنيەتى مەن كىتاپحانا ءىسىن دامىتۋ ماسەلەسىنە ەرەكشە ءمان بەرىپ وتىرعانىن اتاپ ءوتتى. ايماق باسشىسىنىڭ ايتۋىنشا، بۇگىندە وبلىستا 145 كىتاپحانا جۇمىس ىستەيدى. ولار 71 مىڭنان استام وقىرمانعا قىزمەت كورسەتۋدە. جالپى كىتاپ قورى 2،7 ملن-نان اسادى. كىتاپحانالار جانىندا كوۆوركينگ ورتالىقتارى، كلۋبتار مەن ۇيىرمەلەر جۇمىس ىستەپ، جاستاردىڭ شىعارماشىلىق جانە زياتكەرلىك دامۋىنا جاعداي جاسالۋدا.
«بيىل ۇيعىر اۋداندىق كىتاپحاناسى، قاراساي اۋدانىنداعى جاندوسوۆ اۋىلدىق كىتاپحاناسى جانە ەڭبەكشىقازاق اۋدانىنداعى شەلەك اۋىلدىق كىتاپحاناسى جاڭعىرتىلىپ، پايدالانۋعا بەرىلدى. الداعى ۋاقىتتا تاعى ەكى كىتاپحانانى جاڭارتۋ جوسپارلانعان.
2023 جىلدان باستاپ بارلىق اۋداندىق كىتاپحانالار ساب يربيس-64+ باعدارلاماسىنا كوشىرىلدى. بۇگىنگى تاڭدا ەلەكتروندىق كاتالوگقا جانە ەلەكتروندىق كىتاپحانا قورىنا 1،9 ملن-نان استام بيبليوگرافيالىق جازبا ەنگىزىلدى. سونداي-اق KazNEB پلاتفورماسىنا 1 943 كىتاپتىڭ سيفرلىق نۇسقاسى جولداندى. وبلىس بويىنشا قوعامدىق ورىندارعا 786 KazNEB QR-كودى ورنالاستىرىلىپ، 82 مىڭنان استام ەلەكتروندىق كىتاپتى پايدالانۋ مۇمكىندىگى جاسالدى»، – دەدى مارات ەلەۋسىز ۇلى.
جيىن بارىسىندا اتالعان قوعامدىق قوردىڭ ءتوراعاسى باقىتجان تۇرلىبەكوۆ جوبانىڭ ماقساتى مەن اتقارىلعان جۇمىستارى جايلى باياندادى.
«كىتاپحانا كىتاپ ساقتايتىن ورىن ەمەس، بۇل – ادامدار ءبىلىم الىپ، تانىم-تۇسىنىگىن تەرەڭدەتەتىن رۋحاني وردا. وسى ماقساتتا جۇزەگە اسىرىلىپ جاتقان جوبا اياسىندا كىتاپحانالارعا وقىرمانداردى تارتۋ جانە كىتاپ وقۋ مادەنيەتىن قالىپتاستىرۋعا ەرەكشە كوڭىل بولىنۋدە. ءبىزدىڭ باستى ماقساتتارىمىزدىڭ ءبىرى – كىتاپحانالاردى وقىرمانعا تولتىرۋ. جۇمىس بارىسىندا حالىقتىڭ كىتاپ وقۋعا ىقىلاسى جوعارى ەكەنىن بايقادىق. اۋەلدە ءار ايماقتان 25-30 مىڭ ادام قاتىسادى دەپ ويلاعانبىز. ءبىراق ناتيجە ءبىز ويلاعاننان دا جاقسى بولدى. جوباعا 190 مىڭعا جۋىق ادام قاتىسسا، ونىڭ 104 مىڭنان استامى ۇسىنىلعان 15 كىتاپتى تولىق وقىپ بىتىرگەن. بۇل تەست ناتيجەسىندە بەلگىلى بولدى.
ءبىز 7 باعىت بويىنشا جۇمىس ىستەيمىز. سوعان سايكەس مەكتەپ وقۋشىلارىن، كوللەدج بەن ۋنيۆەرسيتەت ستۋدەنتتەرىن، سونداي-اق پەداگوگتەردى، جەكە اۋلەتتەردى، مەملەكەتتىك قىزمەتشىلەر مەن سپورتشىلاردى كىتاپ وقۋعا باۋليمىز. ماسەلەن، مەكتەپ وقۋشىلارى جاس ەرەكشەلىكتەرىنە قاراي 5 توپقا بولىنگەن. ءار توپقا وقۋى ءتيىس 15 كىتاپتان ۇسىنىلعان. ءدال وسىلاي ورىس سىنىپتارىنا دا بولەك ءتىزىم جاسالعان. ونىڭ ىشىندە بەسەۋى قازاقستاندىق اۆتورلاردىڭ شىعارمالارى، بەسەۋى باتىس، ال قالعان بەسەۋى شىعىس اۆتورلارىنىڭ كىتاپتارى. بۇل سىني ويلاۋدى قالىپتاستىرۋدا وتە ماڭىزدى. ياعني مەكتەپ وقۋشىلارىنا ارنالعان باعىتتىڭ وزىندە عانا 150 كىتاپتىڭ ءتىزىمى بەكىتىلگەن»، – دەيدى باقىتجان تۇرلىبەكوۆ.
شارا قورىتىندىسىندا ەكى جاقتى مەموراندۋمعا قول قويىلىپ، قوس تاراپ بىرلەسىپ جۇمىس ىستەۋگە ۋاعدالاستى. وسىعان وراي مارات ەلەۋسىز ۇلى وبلىستىق مادەنيەت، ارحيۆتەر جانە قۇجاتتاما، ىشكى ساياسات، ءبىلىم جانە جاستار ساياساتى باسقارمالارىنا ارنايى مىندەتتەر جۇكتەدى. وڭىردە كىتاپ وقۋ مادەنيەتىن دامىتۋ، حالىقتىڭ، اسىرەسە بالالار مەن جاستاردىڭ كىتاپقا دەگەن قىزىعۋشىلىعىن ارتتىرۋ، وقىرمان قاۋىمداستىعىن قالىپتاستىرۋ جانە بىرلەسكەن مادەني-اعارتۋشىلىق جوبالاردى جۇزەگە اسىرۋدا قارقىندى جۇمىس ىستەۋ كەرەگىن باسا ايتتى.
قوعامداعى كەسەلدىڭ كوبى رۋحاني توقىراۋدان بولادى. ال ادامدى كەمەلدىك پەن تەرەڭ پايىمعا جەتەلەيتىن باستى قۇرال – كىتاپ. سوندىقتان اتالعان باستاما شىعارما وقۋمەن عانا شەكتەلمەيدى. بۇل قوعامداعى وزەكتى ماسەلەلەردى شەشۋگە ىقپال ەتەتىن ماڭىزدى جوبا بولماق.
