13 ماۋسىم كۇنى استاناداعى ينكليۋزيۆتى سپورت ورتالىعىندا Prime Green Clinic ۇيىمداستىرعان «باقىتتى بالا» قايىرىمدىلىق اكسياسى ءوتتى. يگى باستاما اياسىندا كلينيكا ماماندارى 4 پەن 18 جاس ارالىعىنداعى بالالارعا تەگىن پروفيلاكتيكالىق مەديسينالىق تەكسەرۋ (چەك-اپ) جۇرگىزدى.
جاس سپورتشىلاردى بالالار ەندوكرينولوگى، پەدياتر، بالالار نيەۆرولوگى، بالالار كارديولوگى، تراۆماتولوگ-ورتوپەد جانە مەيىرگەرلەر قارادى. اكسيانىڭ باستى ماقساتى – ينكليۋزيۆتى سپورتپەن اينالىساتىن بالالاردى قولداۋ جانە تۇراقتى پروفيلاكتيكالىق تەكسەرۋلەر مادەنيەتىن ناسيحاتتاۋ.
اتا-انالاردىڭ ايتۋىنشا، مۇنداي باستامالار ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلار ءۇشىن اسا ماڭىزدى.
«ۇلىمنىڭ اتى – سانجار، جاسى 4-تە، وعان اۋتيزم دياگنوزى قويىلعان. ءبىزدىڭ بالالار ءۇشىن مۇنداي تەكسەرۋلەر وتە ماڭىزدى، سەبەبى ولار جىلىنا كەمىندە ەكى رەت وسىنداي چەك-اپتان ءوتۋى كەرەك. بۇگىن تەكسەرۋدەن تەگىن ءوتۋ مۇمكىندىگىنە يە بولعانىمىزعا وتە قۋانىشتىمىز. ءقازىر ءبىر ماماننىڭ قابىلداۋى 10-15 مىڭ تەڭگە تۇرادى. سوندىقتان وسىنداي قايىرىمدىلىق باستاما كوتەرىپ، بالالارىمىزعا ەرەكشە كوڭىل بولگەنى ءۇشىن كلينيكاعا شىن جۇرەكتەن العىسىمىزدى بىلدىرەمىز. بىزگە ورتوپەدتىڭ كەڭەسى قاجەت ەدى، وسى چەك-اپ اياسىندا تەكسەرۋدەن وتە العانىمىزعا قۋانىشتىمىز»، – دەيدى سانجاردىڭ اناسى اقسۇلۋ ساتتاروۆا.
دارىگەرلەردىڭ ايتۋىنشا، تۇراقتى پروفيلاكتيكالىق تەكسەرۋلەر دەنساۋلىقتاعى وزگەرىستەردى ەرتە كەزەڭدە انىقتاپ، اۋىر اۋرۋلاردىڭ الدىن الۋعا مۇمكىندىك بەرەدى.
«وسىنداي پروفيلاكتيكالىق چەك-اپتار دەنساۋلىقتاعى ماسەلەلەردى ەرتە انىقتاۋعا كومەكتەسەدى. قارالۋعا كەلگەن بالالاردىڭ اراسىندا سال اۋرۋىنا شالدىققان بالالار عانا ەمەس، دامۋ ەرەكشەلىكتەرى بار باسقا دا بالالار كەزدەسەدى. تەكسەرۋ بارىسىندا ءبىز ءجيى اتا-انالار بۇرىن بايقاماعان دەنە قالپىنىڭ بۇزىلىستارىن، تىرەك-قيمىل اپپاراتىنىڭ دەفورماسيالارىن انىقتايمىز. سونداي-اق سكوليوزدىڭ باستاپقى بەلگىلەرىن، جالپاقتاباندىلىقتى جانە قوسىمشا تەكسەرۋ مەن باقىلاۋدى قاجەت ەتەتىن باسقا دا جاعدايلاردى بايقايمىز. ەرتە دياگنوستيكا دەر كەزىندە تۇزەتۋ جۇمىستارىن باستاپ، بۇزىلىستاردىڭ ودان ءارى اسقىنۋىنىڭ الدىن الۋعا مۇمكىندىك بەرەدى»، – دەيدى تراۆماتولوگ-ورتوپەد دارىگەر مەرۋەرت ساعىنعازى.
«باقىتتى بالا» اكسياسى بالالارعا پروفيلاكتيكالىق مەديسينالىق كومەكتىڭ قولجەتىمدىلىگىن ارتتىرۋعا جانە ينكليۋزيۆتى سپورتتى دامىتۋعا قولداۋ كورسەتۋگە باعىتتالعان.
ۇيىمداستىرۋشىلاردىڭ ايتۋىنشا، بالانىڭ دەنساۋلىعىنا قامقورلىق تۇراقتى پروفيلاكتيكالىق تەكسەرۋلەردەن باستالادى. مۇنداي تەكسەرۋلەر ىقتيمال قاۋىپتەردى دەر كەزىندە انىقتاپ، بالالاردىڭ ءومىر ساپاسىن ساقتاۋعا كومەكتەسەدى.
«سالاۋاتتى بولاشاق – بۇگىنگى قامقورلىقتان باستالادى». دارىگەرلەردى، اتا-انالاردى جانە جاس سپورتشىلاردى بىرىكتىرگەن قايىرىمدىلىق جوباسىنىڭ نەگىزىنە ءدال وسى يدەيا الىندى. بارلىعىنىڭ ماقساتى ءبىر – ءوسىپ كەلە جاتقان ۇرپاقتىڭ دەنساۋلىعى
