الماتىدا قازاقستان مەديسيناسىنىڭ تاريحىندا العاش رەت شالا تۋىلعان نارەستەلەرگە ەرتە باستان ۆيترەكتوميا جاساۋ – سابيلەردىڭ كورۋ قابىلەتىن ماڭگىلىككە جوعالتپاۋعا مۇمكىندىك بەرەتىن جوعارى تەحنولوگيالىق وپەراسيا بويىنشا حالىقارالىق شەبەرلىك سىنىبى ءوتتى.

👏بۇل حيرۋرگيالىق تاجىريبەنىڭ ءتورت كۇنى عانا ەمەس ەدى – وسى ءتورت كۇننىڭ ىشىندە شىن مانىندە جانارلار، جارىق الەم مەن بولاشاق قۇتقارىلدى. ويتكەنى ءسابي شاقتان كورۋ قابىلەتىنەن ايرىلىپ قالۋ  – تەك مەديسينالىق دياگنوز ەمەس. بۇل – الەمنەن، گۇلدەردەن، انانىڭ جۇزىنەن، نۇرعا جاناسۋدان، قوزعالۋعا قورىقپاۋدان، ۇيرەنۋ، ويناۋ، ارمانداۋ مۇمكىندىكتەرىنەن دە ايىرىلۋ دەگەن ءسوز. سوقىرلىق – بۇل بۇكىل تىرشىلىگىڭدى قاراڭعىلىققا كومەتىن ءتۇپسىز تىنىشتىق. ءبىراق، ەگەر دەر كەزىندە ۇلگەرسەڭىز – وسى تىنىشتىقتى توقتاتۋعا بولادى.

شەبەرلىك ءدارىسى بالالارعا جەدەل مەديسينالىق كومەك كورسەتۋ ورتالىعىندا (الماتى ق.) شالا تۋىلعان نارەستەلەر رەتينوپاتياسىنىڭ اۋىر تۇرلەرىن ەمدەۋگە ماماندانعان الەمگە ايگىلى ءۇندى وفتالمولوگيالىق حيرۋرگى، دوكتور نيحيل پالدىڭ قاتىسۋىمەن ءوتتى. ءتورت كۇن ىشىندە ونىڭ جەتەكشىلىگىمەن دارىگەرلەر بريگاداسى قازاقستاننىڭ 12 وبلىسىنان كەلگەن 14 بالاعا 20 وتا جاسادى. ەڭ كىشكەنتاي ناۋقاستىڭ جاسى  نەبارى – 2،5 ايلىق.

شەبەرلىك ءدارىسىنىڭ وزەكتى تاقىرىبى بالالار وفتالمولوگياسىنداعى ەڭ كۇردەلى دە قورقىنىشتى دياگنوزداردىڭ ءبىرى: شالا تۋعانداردىڭ رەتينوپاتياسى (رن) بولدى. 

❕دۇنيەجۇزىندە كوز تورىنىڭ وسىناۋ اۋرۋى جاڭا تۋعان نارەستەلەردى سوقىرلىققا دۋشار ەتەتىن نەگىزگى سەبەپتەرىنىڭ ءبىرى. قازاقستاندا جىل سايىن 22 مىڭنان استام شالا تۋعان نارەستە دۇنيەگە كەلسە، ولاردىڭ 4 مىڭعا جۋىعى رەتينوپاتيا قاۋپىمەن بەتپە بەت كەلەدى.  

«سوڭعى جىلدارى رەتينوپاتيا قازاقستاندا سابيلەر سوقىرلىعىنىڭ ناعىز ىندەتىنە اينالدى. بۇل كۇن سايىن ەمەس، ساعاتتاپ ءورشيتىن اۋرۋ. ەگەر كەشىكتىرسەڭىز، بالا اناسىنىڭ ءجۇزىن ەشقاشان كورمەي ءوتۋى مۇمكىن»، - دەيدى ەلىمىزدىڭ جەتەكشى بالالار وفتالمولوگى اسەل ءشارىپوۆا.

سوڭعى 10 جىلدا وسى ماسەلەدە قازاقستاندا ايتارلىقتاي جەتىستىكتەرگە قول جەتكىزىلدى: ەرتە دياگنوستيكالىق حاتتامالار ەنگىزىلدى، 40-تان استام وفتالمولوگ وقىتىلدى، ايماقتىق بريگادالار قۇرىلدى. ءبىراق، وسى ۋاقىتقا دەيىن اۋىر، تەرمينالدى كەزەڭدەردە بالالاردى ەمدەتۋ ءۇشىن شەتەلگە بارۋعا ءماجبۇر بولدى، ويتكەنى ەلىمىزدە ەڭ كۇردەلى ۆيترەكتوميا  وتاسى جاسالمايتىن.

بۇرىن بالالار كورۋ قابىلەتىن قايتارۋ ءۇشىن وسىنداي كۇردەلى ارالاسۋلار جاساۋ ءۇشىن شەتەلگە جىبەرىلەتىن.

👉ەندىگى جەردە، شەبەرلىك ساباعىنىڭ ارقاسىندا مۇنداي كومەك قازاقستاندا دا قولجەتىمدى بولىپ وتىر. بۇل تەك تەحنولوگيالىق سەرپىلىس قانا ەمەس، سونىمەن قاتار ەڭ كىشكەنتاي پاسيەنتتەرگە كومەك كورسەتۋدىڭ جاڭا ءداۋىرى – ولاردىڭ ەمدەلۋى ءۇشىن شەكارا اسۋعا تاۋەلدىلىكتەن ارىلۋ كەزەڭى.

وسىناۋ ۇمتىلىستاردا وپەراسيالار جاسالعان بالالارعا جەدەل مەديسينالىق كومەك كورسەتۋ ورتالىعىنىڭ وپەراسيالىق بولىمشەسىنىڭ جابدىقتارى ەرەكشە ءرول اتقاردى. 

AYALA قورىنىڭ «الەمدى كورەمىن» جوباسىن قولداعان Chevron كومپانياسىنىڭ ارقاسىندا مۇندا زاماناۋي Constellation لازەرلىك حيرۋرگيالىق جابدىعى پايدا بولدى، وعان قوسا بۇل ەرتە ۆيترەورەتينالدى حيرۋرگيا ءۇشىن دە وسىنداي كۇردەلى وتانى جۇرگىزۋدىڭ قاجەتتى شارتى بولاتىن. ءبىر جاعىنان بۇل ناقتى قۇتقارۋ جۇيەلەرىن قۇرۋدا ءارتۇرلى قورلاردىڭ بىرلەسكەن كۇش-جىگەرى قالاي كومەكتەسەتىنىنىڭ جارقىن ۇلگىسى.

شەبەرلىك ءدارىسى اياسىندا استانا، شىمكەنت جانە الماتى قالالارىنان 10 وتاندىق دارىگەر بىلىكتىلىگىن ارتتىرعانى ماڭىزدى ەكەندىگىن اتاپ وتكەن ءجون.

بۇل ۇزاق مەرزىمدى كەلەشەكتە تۇراقتى كاسىبي بازانى قالىپتاستىرۋعا جانە ەل ىشىندە جوعارى تەحنولوگيالىق وفتالمولوگيالىق حيرۋرگيانىڭ مۇمكىندىكتەرىن كەڭەيتۋگە مۇمكىندىك بەرەدى – وسىلايشا مۇنداي كومەك شەتەلگە بارماي-اق، وسى جەردە، ۇيدە دە قولجەتىمدى بولىپ وتىر.

✔️وپەراسيالاردان بولەك، ماماندار وفتالمولوگيالىق كومەك جۇيەسىن دامىتۋ، قازاقستاندىق دارىگەرلەردى وقىتۋ ماسەلەلەرىن، سونداي-اق بالالار وفتالمولوگياسى مەن مەديسينالىق تۋريزم سالاسىنداعى حالىقارالىق ىنتىماقتاستىق كەلەشەگىن دە تالقىلادى.

🤝بۇگىن قازاقستان تەحنولوگيالىق تاۋەلسىزدىك تۇرعىسىنداعى عانا ەمەس، ەلدەگى ءاربىر بالانىڭ كوزى كورىپ، بالالىق شاعىنا، جارىق الەمگە جولداما بەرەتىن قادامىن باستادى.