قاسىم-جومارت توقايەۆ جاڭا سالىق كودەكسىنە قول قويدى، دەپ حابارلادى Aqorda.

كودەكس بويىنشا سالىقتاردىڭ سانى 20 پايىزعا ازايادى، ال جەڭىلدىكتەر مەن الىمدار وڭتايلاندىرىلادى.

ماسەلەن، ءبىرىڭعاي جەر سالىعى قىسقارتىلدى، جەكە تولەماقىلار بويىنشا مولشەرلەمەلەر مەن الىمداردىڭ سانى ازايتىلدى.

كودەكستىڭ نەگىزگى جاڭالىقتارى:

• قوسىلعان قۇن سالىعى بويىنشا مىندەتتى ەسەپكە قويۋ ءۇشىن اينالىمنىڭ تومەنگى شەگى 10 مىڭ ايلىق ەسەپتىك كورسەتكىشكە (40 ميلليون تەڭگە) دەيىن تومەندەتىلەدى؛
• قوسىلعان قۇن سالىعىنىڭ جاڭا بازالىق مولشەرلەمەسى - 16 پايىز؛
• دارى-دارمەك پەن مەديسينالىق قىزمەتتەرگە تومەندەتىلگەن ققس مولشەرلەمەسى بەلگىلەندى (2026 جىلدان – 5 پايىز، 2027 جىلدان – 10 پايىز)؛
• مەرزىمدى باسپا باسىلىمداردى وتكىزۋ بويىنشا قوسىلعان قۇن سالىعى 10 پايىز.

ال تەگىن مەديسينالىق كومەكتىڭ كەپىلدىك بەرىلگەن كولەمى مەن مىندەتتى الەۋمەتتىك مەديسينالىق ساقتاندىرۋ اياسىنداعى قىزمەتتەر، ورفاندىق جانە الەۋمەتتىك ءمانى بار اۋرۋلاردى ەمدەۋ، سونداي-اق، باسپا تۇرىندەگى كىتاپ شىعارۋ، ارحەولوگيالىق جۇمىس جۇرگىزۋ قىزمەتتەرى قوسىلعان قۇن سالىعىنان بوساتىلادى.

"ءبىرىڭعاي زەينەتاقى جيناقتاۋشى قورىنان تولەنەتىن زەينەتاقى تولەمدەرى جەكە تابىس سالىعىنان بوساتىلادى. پايدالانىلۋ مەرزىمى 10 جىلدان جوعارى اۆتوموبيلدەر ءۇشىن كولىك سالىعى تومەندەتىلدى. مۇگەدەكتىگى بار ادامدارعا الەۋمەتتىك سالىقتىق شەگەرىمدەر 882-دەن 5000 اەك-كە دەيىن ۇلعايتىلدى"، - دەلىنگەن رەسمي حابارلامادا.

ارناۋلى سالىق رەجيمدەرى وڭتايلاندىرىلدى. ونى تەك ءوزىن-وزى جۇمىسپەن قامتىعاندار، وڭايلاتىلعان دەكلاراسيا نەگىزىندە جۇمىس ىستەيتىندەر جانە شارۋا قوجالىقتارى قولدانا الادى.

ءوزىن-وزى جۇمىسپەن قامتىعاندار تولەمدەردى موبيلدىك قوسىمشا ارقىلى ەسەپتەپ، تولەي الادى.

بايلىققا سالىناتىن سالىق ارتادى

الداعى ۋاقىتتا جەكە تابىس سالىعىنىڭ پروگرەسسيۆتى مولشەرلەمەسى ەنگىزىلەدى. وعان سايكەس، جىلدىق جالپى تابىسى 8 500 ايلىق ەسەپتىك كورسەتكىشتەن (2025 جىلدا – 33،4 ملن تەڭگەدەن) اساتىن ازاماتتارعا 15 پايىز سالىق مولشەرلەمەسى قولدانىلادى.

"سول سياقتى ديۆيدەنتتەرى مەن تابىس كولەمى جىلىنا 230 مىڭ اەك-تەن اساتىن كاسىپكەرلەر وسىنداي مولشەردە سالىق تولەيدى. ال فەرمەرلەردىڭ وسى مەجەدەن اساتىن تابىسىنا بۇرىننان ساقتالعان 70 پايىز جەڭىلدىكتى ەسەپكە الا وتىرىپ، 4،5 پايىز سالىق سالىنادى"، - دەلىنگەن زاڭدا.

بۇدان بولەك، 10 پايىز اكسيز تۇرىندە سالىق قىمبات ونىمدەرگە سالىنادى.

ولار:

• قۇنى 75 ميلليون تەڭگەدەن اساتىن اۆتوكولىكتەر؛
• قۇنى 100 ميلليون تەڭگەدەن اساتىن كەمەلەر؛
• ءار ءليترىنىڭ قۇنى 500 مىڭ تەڭگەدەن اساتىن الكوگول؛
• ءار داناسىنىڭ قۇنى 10 مىڭ تەڭگەدەن اساتىن تەمەكى ونىمدەرى؛

سونىمەن قاتار جالپى قۇنى 450 ميلليون تەڭگەدەن اساتىن جىلجىمايتىن مۇلىك نىساندارىنا مۇلىك سالىعى جوعارىلايدى.

كورپوراتيۆتىك تابىس سالىعى نە بولادى؟

كورپوراتيۆتىك تابىس سالىعى 20 پايىز دەڭگەيىندە ساقتالادى. الايدا سارالانعان سالىقتىق مولشەرلەمە ەنگىزىلەدى:

• بانكتەر (بيزنەس سۋبەكتىلەرىن كرەديتتەۋدى قوسپاعاندا) مەن ويىن بيزنەسى ءۇشىن – 25 پايىز؛ الەۋمەتتىك سالا ۇيىمدارى ءۇشىن 2026 جىلى - 5 پايىز، 2027 جىلى 10 پايىز؛
• اۋىل شارۋاشىلىعى تاۋارىن وندىرۋشىلەرگە 3 پايىز جەڭىلدەتىلگەن مولشەرلەمە قالادى.

ال قور نارىعىن ىنتالاندىرۋ ءۇشىن بيرجالىق قۇندى قاعازدارعا تولەنەتىن ديۆيدەنتتەرگە سالىق جەڭىلدىكتەرى سول كۇيى ساقتالادى. "بايتەرەك" حولدينگى شىعارعان قۇندى قاعازداردان تۇسەتىن كىرىس 2031 جىلعا دەيىن كتس-تان بوساتىلادى. ال پايدالى قازبالاردى وڭدەۋ مەن گەولوگيالىق بارلاۋ سالاسىندا تيىمدىلىگى تومەن جاڭا ۋچاسكەلەر 5 جىلعا پايدالى قازبالاردى ءوندىرۋ سالىعىنان بوساتىلادى. كاسىپكەردىڭ سالىق بەرەشەگى از بولسا، ەسەپشوتتارى بۇعاتتالمايدى. قارىز سوماسىنا قاراي ەسكەرتۋ جانە باسقا دا شارالار كەزەڭ-كەزەڭىمەن قولدانىلادى.

جاڭا سالىق كودەكسى 2026 جىلعى 1 قاڭتاردان باستاپ كۇشىنە ەنەدى.