Threads جەلىسىندە "قازاقستان مامبەتتەرمەن تانىمال"، "مۇسىلماندار - شوشقالار" دەگەن مالىمدەمەلەر جاساعان كاسىپكەر اليكا مۇحامادييەۆا قاماۋعا الىندى. ءقازىر ول  تەرگەۋ يزولياتورىندا. بۇعان دەيىن ونىڭ الەۋمەتتىك جەلىدە جازعان بىرنەشە پىكىرى قوعام نارازىلىعىن تۋدىرعان بولاتىن. 

كەيىن قارجى ساراپشىسى ايبار ولجاي كاسىپكەردىڭ ۇستىنەن باس پروكۋراتۋراعا ارىز تۇسىرگەنىن جانە اليكا مۇحامەدييەۆانىڭ ۇستىنەن ءىس قوزعالعانىن حابارلاعان بولاتىن. 

ءقازىر اليكا مۇحامەدييەۆا Threads جەلىسىندەگى پاراقشاسىن ءوشىرىپ، حالىقتان كەشىرىم سۇراعان ۆيدەوسىن جاريالاعان. 

"بۇگىن تۇندە مۇلدە ۇيىقتاعان جوقپىن. تەك وسى جاعدايدى، ايتقان سوزدەرىمدى ويلاپ، ويلانىپ شىقتىم. بۇل ادامدار ءۇشىن قانشالىقتى اۋىر ەكەنىن ەندى ءتۇسىنىپ وتىرمىن. كىشكەنتاي قىزىم مەن كۇيەۋىمە قارادىم، وعان دا قاتتى كىنالى ەكەنىمدى سەزىندىم. مەنىڭ جۇرەگىم قانشالىقتى اۋىرىپ تۇرعانىن، سىزدەر ەلەستەتە المايمىزدار… مۇنى سوزبەن جەتكىزۋ قيىن. "قازاقستان وسى ءسوز ارقىلى تانىلدى" دەگەندە، بۇكىل حالىقتى ايتىپ تۇرعان جوقپىن. جالپى ەشقاشان مەملەكەتتى جامانداعان ەمەسپىن. ويتكەنى، ەگەر مەن وسى ەلدە تۇرىپ، وسى جەردە بيزنەس جاساپ جۇرسەم، بۇل ەلدى جاقسى كورەمىن دەگەن ءسوز"، – دەدى كاسىپكەر. 

ءبىراق ونىڭ كەشىرىم ۆيدەوسى جازادان سىتىلىپ شىعۋىنا كومەكتەسە المايدى. ويتكەنى پوليسيا اتالعان ءىس بويىنشا تەرگەۋ جۇمىستارىن باستاپ كەتكەن. ەندى ونىڭ كىناسى دالەلدەنسە، 2 جىلدان 7 جىلعا دەيىن سوتتالۋى مۇمكىن.