ەلوردادا ايەلدەر دەنساۋلىعى، كونتراسەپسيا جانە قوعامنىڭ ايەلدەردىڭ رەپرودۋكتيۆتى قۇقىقتارى تۋرالى حاباردارلىعىن ارتتىرۋ ماسەلەلەرىنە ارنالعان اشىق تالقىلاۋ ءوتتى.

ءىس-شارانى قازاقستاننىڭ بارلىق ايماقتارىندا جۇمىس ىستەيتىن ەڭ ءىرى فارماسيەۆتيكالىق كومپانيالاردىڭ ءبىرى بولىپ تابىلاتىن Gedeon Richter Kazakhstan كومپانياسى Kazakhstan Women’s Health جوباسى اياسىندا ۇيىمداستىردى. جيىن ق ر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى نازىم جانعازينوۆا جۇرگىزۋىمەن ءوتتى.

كەزدەسۋدە قوعام نازارىنان تىس قالىپ جۇرگەن تاقىرىپتار اشىق تالقىلاندى. جوعارى ساناتتى اكۋشەر-گينەكولوگ، مەديسينا عىلىمدارىنىڭ دوكتورى اينۇر تولەتوۆا كەڭ تارالعان گينەكولوگيالىق اۋرۋلار، جىنىستىق جولمەن بەرىلەتىن ينفەكسيالار، زاماناۋي كونتراسەپسيا ادىستەرى جانە جاسوسپىرىمدەردىڭ جىنىستىق تاربيەسىنىڭ ماڭىزى تۋرالى تىڭ اقپاراتتارىمەن ءبولىستى.

اينۇر تولەتوۆا بايانداماسىندا جەدەل كونتراسەپسيا پرەپاراتى بەدەۋلىككە اكەلىپ سوقتىرادى دەگەن پىكىرگە قاتىستى تۇسىنىك بەردى.

­­­- "جەدەل كونتراسەپسيا پرەپاراتتارى ۇرپاق ءوربىتۋ قابىلەتىنە اسەر ەتپەيدى. ولاردىڭ اسەر ەتۋ مەحانيزمى ۋاقىتشا جانە رەپرودۋكتيۆتى جۇيەگە زيان كەلتىرمەيدى. بۇل - عىلىمي دالەلدەنگەن فاكت. پرەپاراتتار وۆۋلياسيانى نەمەسە ۇرىقتانۋدى بولدىرمايدى. ءبىراق جۇكتى بولعان جاعدايدى ۇزبەيدى. كونتراسەپسيا – بۇل دەنساۋلىققا ءقاۋىپ ەمەس، كەرىسىنشە، كۇردەلى جاعدايلاردىڭ الدىن الۋ مۇمكىندىگى"، ­­­- دەيدى.

ال "گەدەون ريحتەر قازاقستان" كومپانياسىنىڭ وكىلى دينارا بىرماعانبەتوۆا الداعى ۋاقىتتا دا ايەلدەر دەنساۋلىعىنا قاتىستى ماسەلەلەر اشىق تالقىلاناتىنىن ايتتى.

-  ايەلدەر دەنساۋلىعى تاقىرىبىنىڭ اشىق تالقىلانا باستاعانىنا قۋانىشتىمىز. ايەلدەر سەنىمدى اقپاراتقا قول جەتكىزىپ، دەنساۋلىعىنا "ايەلدەر دەنساۋلىعى تاقىرىبىنىڭ اشىق تالقىلانا باستاعانىنا قۋانىشتىمىز. ايەلدەر سەنىمدى اقپاراتقا قول جەتكىزىپ، دەنساۋلىعىنا قاتىستى شەشىمدەردى ۋاقىتىلى قابىلداي الۋى وتە ماڭىزدى"، - دەدى كومپانيا وكىلى.

سونداي-اق جيىنعا بەلگىلى قوعام قايراتكەرلەرى مەن مەديا تۇلعالار قاتىستى. ولاردىڭ ىشىندە تەلەجۇرگىزۋشى، جۋرناليست جانە مەديامەنەدجەر، «Maryam» قورىنىڭ نەگىزىن قالاۋشى ءلايلا سۇلتان قىزى جانە «جاقسىلىق كلۋبى» قايىرىمدىلىق قوزعالىسىنىڭ نەگىزىن قالاۋشى گۇلميرا ابدراشيەۆا قاتىسىپ، ءتۇرلى قيىن جاعدايلارعا تاپ بولعان ايەلدەرگە كومەك كورسەتۋ تاجىريبەسىمەن ءبولىستى.

    كەزدەسۋ سوڭىندا ءلايلا سۇلتان قىزى، گۇلميرا ابدراشيەۆا، اينۇر تولەتوۆا جانە نازىم جانعازينوۆا Kazakhstan Women’s Health جوباسىنىڭ امباسسادورلارى بولىپ تاعايىندالدى.